Hebrews 13

nyankole

← Chapter 12 Jump to:

1Mugumizemu nimukundana nk'abanyaruganda.

2Mutarireka kukunira abagyenyi, ahabw'okuba omuri ekyo hariho abaakuniire baamaraika batabamanyire.

3Mugume mwijukye abari omu kihome, muri nk'abakirimu nabo, kandi mwijukye abarikwitwa kubi, ahabw'okuba naimwe mwine omubiri.

4Obushwere bugume buheebwe ekitiinwa omu bantu boona, n'ekitanda ky'abashweraine kishemereire kuba ekitahagaziibwe. Manya abakora eby'enshoni, n'abashambani, Ruhanga aryabacwera orubanja.

5Mugume mwerinde okururuuhira empiiha, munanurwe ebi mwine. Ahabw'okuba Ruhanga akagira ati: Tindikuhemukaho, n'obu kwakuba okukutsigaho.

6Nikyo turikugambira n'obwesigye tuti: Mukama niwe muhwezi wangye, tinditiina. Mbwenu omuntu akaabaasa kungira ata?

7Mwijukye abeebembezi baanyu, abaabagambiire ekigambo kya Ruhanga. Mwetegyereze ebiruga omu mitwarize yaabo, haza mutooreze okwikiriza kwabo.

8Manya Yesu Kristo tahinduka; oku abaire ari nyomwabazyo, nikwo ari n'eri izooba, kandi nikwo ariguma ebiro byona.

9Mutarihabisibwa enyegyesa zitari zimwe ezihangire. Haakiri mugire omutima oguhamiibwe amaani ga Ruhanga, etari migyenzo y'ebyokurya etaragasiire abaagikuratiire.

10Manya twine eitambiro eritaikirizibwa kuriirwaho abarikuheereza omu ihema.

11Ahabw'okuba enyamaishwa ezi eshagama yaazo omuhongyerezi omukuru atwara omu Mwanya Ogurikwera kuba ekitambo ky'okuhongyerera ekibi, emitumbi yaazo bagyokyeza aheeru y'orusiisira.

12Na Yesu nikwo yaabonaboneire aheeru y'eirembo, ngu abone kweza abantu n'eshagama ye.

13Naitwe nu, ka tushohore, tumushangye aheeru y'orusiisira, twemeire kujumwa ahabwe.

14Omu nsi omu titwinemu rurembo rw'entuura, kureka nitusherura oruribaho omu biro ebiriija.

15N'ahabw'ekyo ka tugume tuheereze Ruhanga ekitambo ky'okumuhimbisa, nitukirabya omuri Yesu, nikwo kwatura eiziina rye n'eminwa yaitu.

16Kandi mutaryehuzya kukorera abantu ebirungi, n'okukwatanisa nabo ebi mutungire, ahabw'okuba ebitambo nk'ebyo bigwisa gye Ruhanga.

17Mugume mworobere abeebembezi baanyu, mubahurire; ahabw'okuba batuura nibareeberera amagara gaanyu, nk'abantu abarigabuuzibwa Ruhanga. Ekyo bakikora bashemereirwe, bataine naku z'aha mutima. Ku kyakuba kitabaire kityo, imwe mukaaba mutaine ki mugasiirwe.

18Mutushabire. Nituhamya ku twine omutima gutarikweshinja, kandi nitwenda kutwaza gye omuri byona.

19Munomuno nimbeehanangiriza kunshabira, Ruhanga abone kubangarurira juba.

20Mbwenu Ruhanga okomookwaho obusingye, owaazoire Mukama waitu Yesu omu bafiire, Omuriisa w'entaama omukuru, ahabw'endagaano etarugaho ei yaahamiise eshagama ye,

21abahe ebirungi byona, mubone kukora ebirungi byona, mubone kukora ebi akunda, naakorera omuriitwe ebi asiima naabirabya omuri Yesu Kristo, oshemereire kuhimbisibwa ebiro byona. Amiina.

22Banyaruganda, nimbeshengyereza mwehangaane, muhikiirize ebi naabehanangiriza. Manya naabahandiikira nincwera hagufu.

23Mumanye ku omunyaruganda Timoteeho arekwirwe. Ku araabe yaizire juba, ndyaija nawe kubareeba.

24Mundamukize abeebembezi baanyu boona, n'abarikwera boona. Abanyaruganda abarugire Italiya nibabaramutsya.

25Embabazi za Ruhanga zigume naimwe mwena. Amiina.

← Chapter 12 Jump to: