Hebrews 4

nyankole

← Chapter 3 Jump to: Chapter 5 →

1Mbwenu okuraganisa kw'okutaaha omu kihuumuro kya Ruhanga ku kuraabe kukiriho, ka twerinde, hatakaagira omuriimwe owaashangwa aremirwe kukihikaho.

2Ahabw'okuba naitwe Amakuru Marungi gakatuhikaho, nkabo oku gaabahikireho. Kwonka obutumwa obu baahuriire tibwine ki bwabagasiire, ahabw'okuba abaabuhuriire bakashangwa bataine kwikiriza.

3Manya itwe abaikiriza, tutaaha omuri ekyo kihuumuro, nk'oku yaagizire ati: Nikyo naagiriire ekiniga, nkarahira nti: Tibaritaaha mu kihuumuro kyangye; n'obu emirimo ye eraabe yaahwaire obu ensi yaahangwa.

4Manya ahandi akagamba aha kiro kya mushanju ati: Ruhanga akahuumura aha kiro kya mushanju, yaareka kukora emirimo ye yoona.

5Kandi hoona aho niho yaagiriire ati: Tibaritaaha mu kihuumuro kyangye.

6Bariya abaabandize kuhurira Amakuru Marungi, bakaremwa kukitaahamu ahabw'okutaikiriza kwabo. Kwonka hariho abandi abaikiriziibwe kukitaahamu, bakahuumura hamwe na Ruhanga.

7Nikyo Ruhanga yaateereireho ekindi kiro ekirikwetwa Eri izooba, akakigambira omuri Daudi hahingwireho ebiro bingi, omu bigambo ebyaheza kugambwaho, ati: Eri izooba, ku muraahurire eiraka rye, mutagangaaza emitima yaanyu.

8Manya kuri Yoshua yaabahikize omuri ekyo kihuumuro, Ruhanga takugambire bwanyima aha rindi izooba.

9N'ahabw'ekyo hakiriyo ekihuumuro kya Sabato ekibiikiirwe abantu ba Ruhanga.

10Ahabw'okuba weena otaaha omu kihuumuro kya Ruhanga, arekyera aho kukora emirimo ye, nk'oku Ruhanga yaarekire eye.

11Reero nu, ka twezirikye kutaaha omuri ekyo kihuumuro, hatakaagira owaagwisibwa okugoma kw'omuringo nk'ogwo.

12Manya ekigambo kya Ruhanga kiine amagara kandi nikikora; kiine obwogi okukira rurara y'amoogi abiri. Nikicumita, kihika ei kitaanisiza omutima n'amagara, engingo n'omushokooro; kandi kimanyira kimwe ebiteekateeko by'omuntu, n'ebi omutima gwe gurikwenda kukora.

13Tihariho kihangirwe kyona ekisherekirwe omu maisho ga Ruhanga, kureka byona byerwirwe biri entangaare, omu maisho g'Ogwo ou turi ab'okweshoboororaho.

14Mbwenu nk'oku twine omuhongyerezi omukuru, owaataahire omu iguru, niwe Yesu Omwana wa Ruhanga, ka tuhamire omu kwikiriza kwaitu oku twayatwire.

15Ahabw'okuba titwine Muhongyerezi omukuru, otarikubaasa kusaasira hamwe naitwe omu bweremwa bwaitu, kureka ogwo owaayohiibwe omu miringo yoona nkaitwe, kwonka atakore kibi.

16N'ahabw'ekyo, n'obwesigye bwingi, ka twirire haihi ekitebe kya Ruhanga ow'embabazi, tubone kugirirwa esaasi n'okutunga emigisha y'okutuhwera omu bunaku bu turikugyetengyeramu.

← Chapter 3 Jump to: Chapter 5 →