bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Nyankole
/
nyankole
/
Jeremiah 50
Jeremiah 50
nyankole
← Chapter 49
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 51
Chapter 52
Chapter 51 →
1
Ebi n'ebi Nyakubaho yaagambiise Yeremiya omurangi ahari Babulooni n'ensi y'Abakaludaaya.
2
Mugambire ab'omu mahanga enkuru, kandi mugirangirire! Mwimutsye orurango, haza murangirire. Mutakishereka, kureka mugire muti: Babulooni ekwatsirwe! Beli ehemukire, na Merodaaki ehahaarize omutima. Ebishushani bya Babulooni bihemwirwe; ebishushani byayo ebirikuramibwa bihahaire!
3
Manya eihanga rihurwire niriruga omu bukiizi-bwa-bumosho kugiteera, rikahindura ensi yaayo amatongo, hakabura owaagituuramu; abantu n'enyamaishwa bikahunga.
4
Nyakubaho naagira ati: Omu biro ebyo n'omu bunaku obwo, Abaisiraeli n'aba Yuda baryaija kumwe nibarira, bansherure, Nyowe Mukama Ruhanga waabo.
5
Baryahabuza omuhanda gurikuza Siyooni bahangireyo amaisho, nibagira bati: Nimwije twehongyere Nyakubaho, turagaane nawe endagaano etarihwaho kandi etaryeba.
6
Abantu bangye babaire nk'entaama zibuzire, abariisa baabo babahabiise, baabatooza okwo omu nshozi, baaruga omu rushozi baaza omu rundi, baayebwa eka yaabo.
7
Boona abaababugaine baabashonshomera, abazigu baabo baagira bati: Titwine rubanja, ahabw'okuba bakacumura ahari Mukama, Nyakubaho obutaaho bwabo, kandi amatsiko ga baishebo.
8
Nimuhungye, murugye omuri Babulooni; murugye omu nsi y'Abakaludaaya; mube nk'empaya z'embuzi ezeebembera obusyo.
9
Ahabw'okuba niinyija kwimukiiriza ekimbuuro ky'amahanga g'amaani, nkireete kiteere Babulooni nikiruga omu nsi y'omu bukiizi-bwa-bumosho, bagitengyere orugamba, haza bagikwate. Emyambi yaabo ni nk'omurwani rugambwa, otagaruka ngaro nsha.
10
Bukaludaaya eryanyagwa, boona abariginyaga bahaagye; Nyakubaho nikwo arikugamba.
11
Imwe abaanyagire abantu bangye, nobu muraashemererwe, nobu muraayekiite, nobu muraarinde nk'enyana erikwenda kwema, kandi mukabubura nk'engundu y'embaraasi;
12
kwonka nyokoimwe aryaitirwa kimwe enshoni, owaabazaire ahemukye. Ahabw'okuba Babulooni niyo erihereeruka enyima y'agandi mahanga, ekaba eihamba rikarangataine kandi ery'omusheenyi.
13
Ahabwa Nyakubaho kugigirira ekiniga kingi, terituurwamu bantu, kureka eryahindukira kimwe amatongo, omuntu weena oriba naaraba ahari Babulooni, ate engaro aha munwa, kandi ayeshaanye ahabw'akagwe kaagigwereire.
14
Nimutengye orugamba, muteere Babulooni, mugyehinguririize! Mwena abarikwinika amata, nimugirashe, mutatsigaza omwambi na gumwe; ahabw'okuba ecumwire ahari Nyakubaho.
15
Nimugiteerere akaari embaju zoona, ahabw'okuba yaagomooka. Ebigo byayo bigwire, n'ebisiika byayo bikumbagaziibwe. Manya oku n'okuhoora enzigu kwa Nyakubaho. Mbwenu nu nimugihoore, mugigire nk'oku yaakozire.
16
Mumare omuri Babulooni omubibi weena, n'orikukwata omusyo gw'engyesho omu igyesha. Ahabwa rurara etaine saasi, buri muntu agarukye omu baabo, ahungire omu nsi y'owaabo.
17
Isiraeli n'entaama ehiigirwe, ebingirwe entare. Omugabe wa Asiriya niwe yaabandize kugishonshomera; mbwenu aha muheru Nebukadenezaari omugabe wa Babulooni niwe amemeine amagufa gaayo.
18
Nikyo Mukama ow'amahe, Ruhanga wa Isiraeli, arikugirira ati: Reeba, niinyija kufubira omugabe wa Babulooni n'ensi ye, nk'oku naafubiire rubambansi wa Asiriya.
19
Abaisiraeli ndyabagarura omu mariisizo gaabo, barye eby'ahari Karumeeli n'eby'omuri Bashani; bahaagire omu bibungo bya Efuraimu n'omu bya Gileadi.
20
Nyakubaho naagira ati: Omu biro ebyo n'omu bunaku obwo, ebicumuro biryasherurwa omuri Isiraeli, haburemu na kimwe; n'ebibi bisherurwe omuri Buyuda, habure ekyashangwamu; ahabw'okuba ndyasaasira abu nditsigamu bari emponoka.
21
Hurura, oteere ensi ya Merataimu n'ey'abatwire Pekodi. Obaite, obacwekyerereze kimwe; okore byona ebi nkuragiire. Nyakubaho nikwo arikugamba.
22
Orwari rw'orugamba n'okucwekyereza kwingi biri omuri egyo nsi.
23
Ebishi egyo nyondo y'ensi yoona etemirwe, yaacwagurika! Ebishi Babulooni ebaire ekirikunugwa omu mahanga!
24
Iwe Babulooni 'we, nkakutega omutego gwakukwata, haza tiwaakimanya. Mbwenu obonekire waakwatwa, ahabw'okuba okahakanisa Nyakubaho.
25
Nyakubaho aigwire eibiikiro ry'eby'okurwanisa bye, yaihamu ebikwato bya kashanga ye, ahabw'okuba Mukama Ruhanga ow'amahe aine eki arikuza kukora omu nsi y'Abakaludaaya.
26
Nimwije mugirwanise, mugiturukire oku n'oku, mwigure ebitara byayo, mugirunde nk'ebitunda by'oburo. Haza mugicwekyerereze kimwe, hatagira ekyayo ekyatsigaraho!
27
Mwite enimi zaayo zoona, muzishuumye omu ibaagiro. Ebishi baagwerwa akagwe, ahabw'okuba eizooba ryabo ryahika ery'obunaku bwabo bw'okufubirwamu!
28
Nimuhurire! Abarikucwa nibahunga nibaruga omu nsi ya Babulooni kuza kurangirira omuri Siyooni oku Mukama Ruhanga waitu ahoire enzigu, naahoorera Nyaruju ye.
29
Nimuhuruze abarasi, abananuuzi b'amata boona bateere Babulooni. Mugyehingurizise ensiisira, hatagira owaacwa. Mugihoore nk'ebi yaakozire oku biri, mugigire nk'oku yaagizire kwona, ahabw'okuba ekagira amaryo yaahakanisa Nyakubaho Orikwera wa Isiraeli.
30
Nikyo abatsigazi baayo barigangaramira omu nguuto zaayo, abaserukare baayo boona bakacwekyerezibwa eryo izooba. Nyakubaho nikwo arikugamba.
31
Mukama Ruhanga ow'amahe naagira ati: Iwe munyamaryo 'we, reeba, nyine eki ndikufa naiwe. Manya eizooba ryawe ryahika ery'obunaku bw'okukufubira.
32
Ogwo munyamaryo aryateera entsibo, agwe, habure ow'okumwimutsya. Kandi endembo ze ndyazitweka omuriro, gucwekyereze byona ebimwehinguririize.
33
Mukama ow'amahe naagira ati: Abaisiraeli nibahatwa hamwe n'aba Yuda. Abaabatwaire bari enkwatwa babahamize, baayanga kubarekura.
34
Kwonka Omucunguzi waabo n'ow'amaani. Eiziina rye ni Mukama ow'amahe. Buzimazima naija kubarwanaho, abone kuha ensi obuhuumure, haza abatuuzi ba Babulooni abareetere omurabanamu.
35
Nyakubaho naagira ati: Rurara yaaza kwita Abakaludaaya n'abatwire Babulooni, n'abategyeki baayo n'abanyabwengye baayo.
36
Rurara yaaza kwita abafumu; nkaahenwa ki, baba ebifeera! Rurara yaaza kwita abarwani baayo; nkaahenwa ki, bacwekyerera!
37
Rurara yaaza kwita embaraasi zaayo hamwe n'ebigaari byayo! Eite n'amahe g'abanyamahanga abagitwiremu, nkaahenwa ki, baba abataine maani nk'abakazi! Rurara yaaza kucwekyereza eby'obutungi bwayo byona, nkaahenwa ki binyagwa!
38
Ekyanda kyaza kwomya amaizi gaayo; nkaahenwa ki, goomera kimwe! Ahabw'okuba n'ensi y'ebishushani, kandi ebishushani ebirikuramibwa bibahindwire abashazi.
39
N'ahabw'ekyo enyamaishwa enshaarizi na zaamuha ziryatuura omuri Babulooni, na zaamaaya zigituuremu, ebe etakirimu bantu ebiro byona, nobu kwakuba okutuurwamu, obusingye bwona.
40
Nyakubaho naagira ati: Nk'obu Ruhanga yaacwekyereize Sodoma na Gomora n'endembo ezihereraine nazo, nikwo nayo etarituurwamu muntu, nobu yaakuba ow'okugishuuhuukiramu.
41
Reeba, eihanga niriija niriruga omu bukiizi-bwa-bumosho, eihanga ry'amaani, kandi abagabe baingi nibahurura nibaruga omu bicweka by'ensi eby'aha muheru.
42
Bakwaitse amata n'amacumu; n'enshaarizi kandi tibaine mbabazi. Endigito yaabo ni nk'ey'enyanja erikuhoorera. Batembire embaraasi, bajwaire nk'abantu barikuza aha rugamba kukurwanisa iwe Babulooni!
43
Omugabe wa Babulooni ahuriire enkuru yaabo, yaagwa emikono, yaagira obujune n'obusaasi, nk'obw'omukazi orikurumwa.
44
Reeba, nk'oku entare etimbira omu kishaka kya Yorudaani kuteera eka y'entaama egumire, naanye nikwo ndaabareetere kuruhungamu ahonaaho, nkaruteeraho ou ndaasiime kurutegyeka. Mbwenu n'oha ori nkaanye? N'oha orikundagiira kwija? Ni mutegyeki ki owaakunza omu kaso?
45
Mbwenu nu, nimuhurire enaama ei Nyakubaho acumire kurwanisa Babulooni, n'oku amaririire kuteera ensi y'Abakaludaaya. Buzimazima abaana b'eka yaabo baryakurubanwa, haza ab'omuri egyo ka baitwe obwoba ahabw'ekyababaho.
46
Ensi ku erihurira orwari rw'abarikukwata Babulooni eryatetema; okuborooga kw'abaamwo kuhurirwe ab'omu gandi mahanga.
← Chapter 49
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 51
Chapter 52
Chapter 51 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48
49
50
51
52