Mark 8

Oromo Bible (Waadaa Haarawa) - No Year

← Chapter 7 Jump to: Chapter 9 →

1Haaganaa saniinitti deebi'anii namoonni baayi'een wol ni gayan, waan nyaatan'llee hin qaban, kanaaf Yesus barattoota isaa waamee akkana isaaniin ni jedhe.

2«Namoonni kunniin kunoo, ana woliin guyyaa sadihii turanii jiran, waan nyaatan womaa waan hin qabnneef, isaanii ni naya.

3Akkuma beelayan kanaan gara mana isaanii yoo isaan geegesse, karaa irratti ni dadhaban, gonkumaa tokko tokkoon isaanii'llee, worra fago'oo dhufan.»

4Barattoonni isaa'llee, «Eegaa, gammoojjii kanatti namoota kanniin maraaf buddeena gayu, argachu'uuf eennutu danda'a?» jechu'uun, ni deebisaniif.

5Yesus'llee, «Buddeena meeqa qabddan?» jedhee, isaan gaafate, Isaan'llee, «Buddeenna torbaa ni qabnna» jedhaniin.

6Inni'llee lafa irra akka taa'aniif ummata ni ajaje, buddeena torban'llee ol fuudhee Waaqa ni galateeffate, kukkutee'llee ummataaf akka dhiyeessan barattoota isaa titti ni kenne, isaan'llee ummataaf ni dhiyeessan.

7Qurxummiiwwan didiqqoo muraasa'llee ni qaban turan, waayee qurxummiiwwaniitiif'llee Waaqa eega galateeffateen duubatti, ummataaf akka dhiyeessan barattoota isaa ni ajaje.

8Namoonni marrinuu nyaatanii ni quufan, hanbbaa hafe'llee wolitti qabanii, ginddoo guguddoo torbaa guutuu ni kaasan.

9Namoonni nyaatan'llee haga kuma afurii ni ta'an turan, Yesus'llee isaan ni geegesse.

10Kanaan duubatti barattoota isaa woliin ta'ee hoboloo yaabbatee, gara konyaa Daalmaanuta'aa ni deeme.

11Fariisonni gara Yesusii dhufaniiti isaan woliin mormmuu jala ni qaban, isa qormaatuuf'llee yaadanii sami'ii maalalee tokko akka isaanitti muldhisuuf, ni gaafataniin.

12Yesus ufi keessatti hafuuraan kadhachu'uun, «Dhaloonni bara kanaa maalaleen akka isaa taasfamuuf, maali'iif barbaadaa? Dhugamaan isiniin jedha, dhaloota kanaaf maalaleen woyiituu hin taasfamuuf!» isaaniin jedhe.

13Isaan dhiisee'llee deebi'ee hoboloo yaabbatee, gara gamaa ni ce'e.

14Barattoonni isaa buddeena qabachuu waan irraafataniif hoboloo irratti buddeena tokko malee, ka bira'aa hin qaban ture.

15Yesus'llee, «Shiishaa Fariisotaatii fi Heerodisii irraa ufi eeggadhaa!» jedhee, isaan ni ajaje.

16Isaan'llee, «Kana jechuun isaa yookiin waan nu'u buddeenna hin qabnneef ta'a» jedhanii, ufii isaaniitii woliin ni haasayan.

17Yesus'llee yaada isaanii kana beekee akkana isaaniin jedhe, «Buddeenna waan hin qabatiniif jettanii maali'iif yaaddan? Amma'llee isin worra womaayyuu hin hubannee fi worra isiniif hin galle? Amma'llee onneen keessan akkuma hadoodetti moo?

18Ija uduu qabdan hin argitan? Gurra'llee uduu qabdan hin dhageettan? Attamitti'llee hin yaadanne?

19Haa ta'u malee buddeena shanan namoota kuma shaniif yeroo kukkutee kennetti, hambbaa isaa ginddoo meeqa guutuu kaafttan?» Isaan'llee, «Ginddoo kudha lama guutuu» ni jedhaniin.

20Akkuma kana buddeenna torbban namoota kuma afuriif yeroo kennetti, hanbbaa isaa ginddoo meeqa guutuu kaafttan jechu'uun, isaan ni gaafate. Isaan'llee, «Ginddoo torba guutuu» ni jedhaniin.

21Inni'llee, «Eegaa, amma'llee hin hubanne moo?» isaaniin jedhe.

22Gara Betsayida'aa yeroo gayetti'llee namoonni namicha jaamaa tokko gara Yesusii ni fidan, akka qaqabuuniif'llee ni kadhataniin.

23Inni'llee namicha ijaan arguu dadhabe harka qabee eemara'aa, ganda keessaa gara raasa'aa titti ni baaseen, ija namichaa irratti'llee hancufa isaa itti tufee harka isaa irra kaayeeti, «Waan tokko argitaa ree?» jechu'uun, ni gaafateen.

24Namichi jaamaa'llee ol jedhee, «Ee namoonni natti ni muldhatan, garuu akka mukkiin tarkaanfataniiti natti fakkaatan» jedhe.

25Deebi'ee'llee Yesus ija namichaa irra harka isaa ni kaaye, yeroo kanatti namichi guutatee ni laale, fayyee'llee waan maraa qulqulleessee arguu, jala ni qabe.

26Kanaan duubatti'llee Yesus, «Gara ganda kanaa hin aseenin!» jedhee, gara mana isaa akka deemuuf ni geegesseen.

27Yesusii fi barattoonni isaa gara gandoota konyaa Filiphos Qiisaariyaa jedhamu jiranii ni qajeelan, karaa irra uduu jiran'llee Yesus, «Namoonni anaan eennu jedhan?» jechu'uun, barattoota isaa ni gaafate.

28Isaan'llee «Tokko tokko Yohaannisii Cuupha'aa, kuunniin Eeliyaas, kuunniin'llee ammoo nabiyyoota keessaa tokko siin jedhan» jechu'uun, ni deebisaniif.

29«Isin hoo anaan eennu naan jettan?» jedhee, isaan ni gaafate. Phexiros'llee, «Ati Masihicha» jechu'uun, ni deebiseef.

30Yesus'llee, «Waayee kiyya eennutti'llee akka hin dubbanne» jedhee, isaan ufi ni eeggachiise.

31Yesus'llee barattoota isaa akkana jechu'uun isaan barsiisuu jala ni qabe, «Ilmi Namaa rakkinna baayi'ee fudhachuun isaa ni mala, jaarsotaan, itti gaafatamoota qeesotaatii fi barsiisota seeraa biratti'llee ni tuffatama, ni ajjeefama'lle'e, haa ta'u malee guyyaa sadihiin duubatti ni ka'a.»

32Waan kana ifan isaanitti ni hime, yeroo kanatti Phexiros addatti achi waameenii, itti baanachuu jala ni qabe. «Akkana hin jedhin!» jechu'uun, ni loleen.

33Yesus garuu garagalee gara barattoota isaa laaleeti Phexirosiin, «Ati sheexana nana narraa fagaadhu! Ati ka namaa malee waan Waaqaa hin yaadu!» jechu'uun, itti ni baanate.

34Kanaan duubatti Yesus ummata barattoota isaa woliin waamee akkana isaaniin ni jedhe, «Ana horddofuu ka barbaadu yoo jiraate mataa ufii haa waakkatu, fannoo isaa'llee baadhatee ana haa horddofu,

35lubbuu isaa fayyisu'uuf ka barbaadu marrinuu ni dhabaan, waayee kiyyaa fi waayee wongeelaatiif lubbuu isaa dabarssee ka kennu garuu, ni fayyisaan.

36Naminni qabeenna biyya lafaa mara yoo argatee, lubbuu isaa garuu yoo balleese maal isa fayyada?

37Yookiin naminni waayee fayyinna lubbuu isaatiif gatii maal kafaluu dandda'a?

38Dhaloota ganttichaa fi cubbamaa kana duranatti, ka anaa fi dubbii kiyyatti'llee saalfatu marattuu, ani'llee Ilmi Namaa ulfinna Abbaa kiyyaatiin maleyikkoota isaa Qulquluuwwan woliin yeroo dhufutti, isatti ni saalfadha» jedhe.

← Chapter 7 Jump to: Chapter 9 →