Proverbs 10

Quechuan (Tayta Diospa Wilakuynin) 2003

← Chapter 9 Jump to: Chapter 11 →

1Kaychömi qelqaraykan Salomón rimashqan yätsikuykuna. Tsurin tantiyakuq kaptinqa mamanpis y papäninpis kushikunmi. Mana tantiyakuq kaptinmi itsanqa lakikärin.

2Suwakuypa rïcuyaqkunaqa manaraqpis probicharmi wanupäkunqa. Arukur kawaqkunami itsanqa wanuypitapis qeshpinqa.

3Ali runataqa mana muchünanpaqmi Tayta Dios yanapan. Fiyu runatami itsanqa mana yanapantsu munashqanta tarinanpaqpis.

4Qela runaqa waktsayanmi. Arukuq runami itsanqa rïcuyan.

5Usya witsan pirwakuq runaqa tantiyakuqmi kaykan. Cosëcha witsan punukuq runami itsanqa penqaypaq kaykan.

6Ali runaqa bendiciontami chaskin. Fiyu runaqa ali shimilanpa parlaparpis shonqunchöqa rabyapaykanmi.

7Ali runapaqqa pipis yarparkunmi. Fiyu runapaqmi itsanqa pipis mana yarpannatsu.

8Tantiyakuq runaqa mandaqninta cäsukunmi. Manakaqkunata parlaq runaqa chikipashqami kanqa.

9Alilata ruraq runaqa jawkalami kawakun. Mana alita ruraq runami itsanqa elaqpita ushakanqa.

10Jutsa rurashqanta tsapänanpaq runa mayinta qewsapaq runaqa lakikuymanmi chayanqa. Lutanta rimaq runaqa chikipashqami kanqa.

11Ali runa yätsiptinqa pipis kushishqami kawan. Fiyu runa shimita jatipaptinmi itsanqa rimanakular kawapäkun.

12Chiki runaqa pïmaytapis rimanakatsinmi. Kuyakuq runami itsanqa imata ruraptinpis perdonan.

13Tantiyakuq runaqa pïmaytapis alimi tantiyatsin. Mana tantiyakuq runaqa maypis wirukuypaqmi kaykan.

14Tantiyakuq runaqa manami imatapis lutalaqa rimakuntsu. Mana tantiyakuq runaqa lutala rimashpan pïmaytapis rabyanätsinmi.

15Rïcu runapaqa riquëzan kaykanmi tsapakunanpaq. Waktsa runapami itsanqa tsapakunanpaq imanpis mana kantsu.

16Ali runaqa alimi kawan. Fiyu runaqa jutsa ruraylachömi kawan.

17Anyapashqanta chaskikuq runaqa alimi kawan. Anyapashqanta mana chaskikuq runami itsanqa mana ali kawan.

18Chikiykarpis ali shimilanpa parlaparqa lulapaykanmi. Mana tantiyakuq runaqa manakaqkunalatami wilapäkur purin.

19Aläpa rimaq runaqa manakaqtapis rimanmi. Shumaq tantiyakuq runami itsanqa ali kaqlata riman.

20Ali runa rimashqanqa yoraq qellaynömi kaykan. Fiyu runa rimashqanmi itsanqa imapaqpis mana alitsu.

21Ali runa yätsiptinqa pïmaypis ali kawananpaqmi tantiyakun. Fiyu runaqa mana tantiyakuq kashqanpitami wanun.

22Tayta Diospa bendicionninwanmi imaykantsipis kaykan. Bendicionninta chaskirmi kushikärintsi.

23Mana tantiyakuq runaqa kushikun lutanta rurashpanmi. Tantiyakuq runami itsanqa kushikun alita rurashpan.

24Fiyu runataqa mana munashqan kaqmi imapis pasan. Ali runaqa imatapis munashqantami tarin.

25Fiyu runataqa huracán wayranömi nakaykuna ushakätsin. Ali runami itsanqa ima nakaycho karpis salvakun.

26Kiruta vinagri shimpashqanno y nawita qoshtay rawrätsishqannömi qela runapis kachaqninpaq uma nanay kaykan.

27Tayta Diosta mantsakuq runaqa awkinyashqanyaqmi ali kawan. Lutan ruraq runami itsanqa manaraqpis aykäta wanun.

28Ali runakunataqa kushikuymi shuyaran. Fiyu runakunatami itsanqa lakikuy shuyaran.

29Tayta Diosmi ali rikan pay munashqanno kawaq runataqa. Lutan ruraq runatami itsanqa ushakätsin.

30Ali runaqa nakay shamuptinpis manami ushakanqatsu. Fiyu runami itsanqa ushakanqapaq.

31Ali runaqa pitapis shumaqmi yätsin. Fiyu runaqa shimilanpitami castigashqa kanqa.

32Ali runaqa alikunalatami imatapis riman. Fiyu runami itsanqa lutankunalata imatapis riman.

← Chapter 9 Jump to: Chapter 11 →

Recommended Reading

Commentary Proverbs Commentaries → Devotional Proverbs Devotional Guide → Get This Bible Quechuan (Tayta Diospa Wilakuynin) Study Bible →