Proverbs 13

Quechuan (Tayta Diospa Wilakuynin) 2003

← Chapter 12 Jump to: Chapter 14 →

1Shumaq tantiyakuq wamraqa papänin yätsishqanta chaskikunmi. Awilan ashmashqa wamraqa manami chaskikuntsu.

2Shimilanpitami ali rikashqa o mana ali rikashqapis kanqa. Ishkay cära runaqa chikipashqami kanqa.

3Alikunalata rimaq runaqa wanuypitapis qeshpinmi. Shimin tarishqanta rimaq runami itsanqa ushakanqa.

4Qela runaqa mayjina munarpis manami imatapis tarintsu. Aruq runami itsanqa munashqanta imatapis tarin.

5Ali runaqa lulakuyta manami munantsu. Fiyu runaqa penqaypaqmi imatapis ruran.

6Ali runaqa alita rurashqanpita alimi kawanqa. Fiyu runami itsanqa jutsata rurashqanpita ushakanqa.

7Wakin runakunaqa imaykanpis mana kaykaptinmi rïcu tukärin. Wakin runanami imaykanpis kaykaptin waktsa tukärin.

8Rïcu runaqa qellayninwanmi wanuypitapis salvakun. Waktsa runataqa manami pipis suwapänanpaq yarpantsu.

9Ali kawaq runaqa shumaq atsikyaq mechërunömi kaykan. Fiyu runami itsanqa atski upiqno ushakanqapaq.

10Runa tukuq runaqa pitapis rabyanätsinmi. Yätsishqanta chaskikuq runaqa tantiyakuqmi kaykan.

11Mana nakaylapa tarishqan qellayqa yakunömi ushakäkun. Walka walkala shuntakuq runaqa rïcuyanmi.

12Yarpashqanno mana kamakaptinqa pipis pasaypami lakikun. Yarpashqanno kamakaptinmi itsanqa kushikun.

13Mandaqnin nishqanta mana cäsukurqa castigashqami kanqa. Mandaqnin nishqanta cäsukurmi itsanqa premiuta chaskinqa.

14Tantiyakuq runa yätsishqanta chaskikurqa ali kawaytami tarin. Tsaynöpami wanuypitapis qeshpin.

15Ali yarpayniyuq runataqa pïmaypis respitanmi. Mana cäsukuq runataqa desgraciami pasanqa.

16Tantiyakuq runaqa shumaq yarpachakuykurmi imatapis ruran. Mana tantiyakuq runaqa lutanta rurarpis sumätsikunmi.

17Mana yärakuypaq runaqa kachaqninta rabyanätsinmi. Yärakuypaq runami itsanqa kachaqninta kushikatsin.

18Yätsishqanta mana chaskikuq runaqa penqaypaqmi waktsayanqa. Anyapashqanta chaskikuq runami itsanqa respitashqa kanqa.

19Yarpashqanno imapis kamakaptinqa pipis kushikunmi. Mana tantiyakuq runaqa lutan ruraykunata manami kachayta munantsu.

20Tantiyakuq runawan purirqa tantiyakuqmi rikakun. Mana tantiyakuq runawan purirqa mana alikunatami yachakun.

21Jutsa ruraq runaqa mana alimi kawan. Ali runami itsanqa jawka kawakun.

22Ali runapa herencianqa wilkankunapaqpis kanqami. Fiyu runapa herencianmi itsanqa ali runakunapa makinman chayanqa.

23Waktsa runapa chakrancho mikuy ali wayuptinpis fiyu runami ushapan.

24Wamranta mana corrigirqa manami rasunpatsu kuyan. Rasunpa kuyarqa juklami corrigin.

25Ali runapa wayinchöqa mikuynin putsuy putsuymi kaykan. Fiyu runapa wayinchömi itsanqa wayrala tumaykan.

← Chapter 12 Jump to: Chapter 14 →

Recommended Reading

Commentary Proverbs Commentaries → Devotional Proverbs Devotional Guide → Get This Bible Quechuan (Tayta Diospa Wilakuynin) Study Bible →