bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan (Tayta Diospa Wilakuynin) 2003
/
Proverbs 16
Proverbs 16
Quechuan (Tayta Diospa Wilakuynin) 2003
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 17 →
1
Imata rurananpaqpis runaqa yarpachakunmi. Mayjina yarpachakuptinpis Tayta Dios kamakätsiptinraqmi imapis kamakan.
2
Runaqa imata rurarpis alita ruraykashqantami yarpan. Tsayno kaptinpis Tayta Diosmi musyaykan ali yarpaywan o mana ali yarpaywan rurashqantapis.
3
Ima ruraytapis yarparqa yanapashunaykipaq Tayta Diosta manakuy. Tsayno manakuptikiqa yarpashqaykikuna kamakanqami.
4
Yarpashqanno kananpaqmi lapantapis Tayta Dios kamashqa. Fiyu runatapis kamashqa juzganan junaq castigananpaqmi.
5
Runa tukuqkunaqa Tayta Diosta pasaypami rabyanätsin. Paykunataqa imay junaq karpis castiganqami.
6
Rasunpa kuyakuq karqa jutsata ruraptinpis perdonanmi. Tayta Diosta mantsakurmi jutsa ruraypita witikun.
7
Tayta Diosqa munashqanno kawaqkunatami yanapan contrankunawanpis perdonanakur ali kawananpaq.
8
Suwakuypa rïcuyänanpa trukanqa mas alimi kanman arukur ichiklatapis gänashqan.
9
Runa imano kawananpaq yarpachakuptinpis Tayta Diosraqmi kamakätsin.
10
Reytaqa ali parlananpaq Tayta Diosmi tantiyatsin. Pitapis juzgarqa Tayta Dios munashqannölami juzgan.
11
Balanzawan karpis o tupuwan karpis pësu complëtuta rantikunantami Tayta Dios munan. Pësuwan y tupuwan engañaqkunataqa paymi juzganqa.
12
Ali juzgaptinqa reypa favorninmi runakuna karkaykan. Tsaymi reyqa pipis jutsata ruraptin mana kuyapaypa castigan.
13
Pipis rasun kaqlata rimaptinqa rey kushikunmi. Mana lulakuypa rimaq runataqa kuyanmi.
14
Rey rabyaptinqa runakuna yarpapäkun pitapis wanutsinanpaq kashqantami. Tantiyakuq runakunaqa imaykanöpapis kushikatsinmi.
15
Rey kushishqa kaptinqa pipis kushikunmi. Rey yanapashqanqa murukuy witsan tamyanömi kaykan.
16
Tantiyakuq kaymi qoripitapis mas ali kaykan. Yachaq kaymi qellaypitapis mas ali kaykan.
17
Ali runaqa jutsa ruraypita witikunmi. Jutsata kachariqkunaqa wanuypitapis qeshpinmi.
18
Runa tukuqtaqa desgraciami pasanqa. Orgullösuqa pasaypa nakaymanmi chayanqa.
19
Rïcuyayta munar orgullösukunawan juntakashqanqa manami alitsu kaykan. Tsaypa trukanqa mas alimi kanman waktsakunawan ali kawashqan.
20
Yachatsikuyta cäsukurqa alimi kawanqa. Tayta Diosman yärakurqa kushishqami kawanqa.
21
Tantiyakuq runataqa yachaq kashqantami nipäkun. Shakya shakyala parlaq runaqa pitapis shumaqmi yachatsin.
22
Shumaq tantiyakuq runaqa alimi kawan. Mana tantiyakuq runataqa manakaqlapaqmi pipis tantiyatsin.
23
Tantiyakuq runaqa shumaq tantiyakuykurmi riman. Pay yätsishqantaqa runakuna chaskikunmi.
24
Pipis ali shimilanpa rimashqanqa abëjapa mishkinnömi kaykan. Tsayno parlarmi pïmaytapis shakyätsin.
25
Wakin runaqa lutanta rurarpis alita ruraykashqantami yarpan. Tsaynöla kawarqa wanuymanmi chayanqa.
26
Waktsa kayta mana munarmi ima aruylachöpis arukun. Pachan qawlulünanta mana munarmi arukun.
27
Fiyu runaqa lutanta rurananpaqmi yarpachakun. Imata rimashqanpis ninanömi kaykan.
28
Fiyu runaqa pïmaytapis rimanakatsirmi purin. Tulu shimiqa ali amïgukunatapis chikinakatsinmi.
29
Fiyu runaqa amïguntapis lulapanmi. Ali kawaptinpis shimitami jatipan.
30
Lutan rurayta yarpaq runaqa nawilanwanmi qewsapan. Jutsata rurarkurpis upälakunmi.
31
Lutankunata mana ruraypa kawarqa soquyashqanyaqmi runa kawan. Tsaymi soquyashqa runataqa pïmaypis respitan.
32
Ali chölu kananpa trukanqa mana rabyakushqanmi mas ali kaykan. Markata dominananpa trukanqa kikinpa geniunta dominakushqanmi mas ali kaykan.
33
Imata rurananpaqpis wakin runaqa suertitaraqmi jitan. Tsayno kaptinpis Tayta Dios munaptinraqmi imapis kamakan.
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 17 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31