Revelation 11

Quechuan (Tayta Diospa Wilakuynin) 2003

← Chapter 10 Jump to: Chapter 12 →

1Tsaychömi shoqushpita rurashqa värata ángel aptaparkamar kayno nimarqan: «Jerusalénpa ayway Tayta Diospa templunta y altarta tupumunaykipaq. Nirkur yupamunki tsaycho adoraq runakunata.

2Templu waqtancho kaykaq patiuta itsanqa ama tupumunkitsu. Tsay patiuta kachariykushqä mana cäsukamaq runakuna munaynincho tsararänanpaqmi. Paykunami chusku chunka ishkay (42) killa sagrädu Jerusalén markata munaynincho tsararanqa.

3Tsay witsanmi ishkay wilakuqnïkunata noqa nishaq juk waranqa ishkay pachak soqta chunka (1,260) junaq wilakuynïta wilakunanpaq. Paykunaqa qachqa röpan jatishqami wilakärinqa».

4Tsay ishkay wilakuqkunaqa kay patsata kamaq Tayta Diospa nawpancho kaykaq ishkay olïvukuna y ishkay candelabrukunami kaykan.

5Pipis paykunata wanutsiyta munaptinqa shiminpita nina yarqamurmi rupar ushanqa. Tsaynömi wanunqa paykunapa contran sharkuqkunaqa.

6Tsay ishkay wilakuqkunaqa munayniyuqmi kanqa tamyatapis mana tamyatsimunanpaq, yakutapis yawarman tikratsinanpaq y munashqan höra pesti qeshyawan runakunata ushakätsinanpaqpis.

7Tayta Dios munashqanno wilakuyninta wilakur usharkuptinnami wanwanyaykaqpita anticristo yarqamur paykunapa contran sharkur wanutsinqa.

8Wanutsiptinmi ayankuna jatun markapa pläzancho jitaranqa. Tsay markachömi Señor Jesucristutapis wanutsipäkurqan. Tsay markatami Sodomano y Egiptuno kashqanta nipäkun.

9Kimsa junaq pulanyaqmi maytsay marka runakunapis, maytsay trïbu runakunapis, ima idiömata rimaq runakunapis y maytsay nación runakunapis wanushqa jitarpaykaqta rikapäkunqa. Ayankunatapis pampananta manami kachapanqatsu.

10Tsay wilakuqkuna aläpa rabyanätsishqa kaptinmi runakuna kushikushpan regäluta jukninpis jukninpis aypunakunqa.

11Wanushqa jitarpaykashqanpita kimsa junaq pulantami tsay ishkay wilakuqninkunata Tayta Dios kawaritsimunqa. Tsayta rikaqkuna lapanmi pasaypa mantsakanqa.

12Kawarirkamurnami kayno nir jana patsapita qayakamuqta mayanqa: «¡Kayman shapäkamuy!» Chikiq runakuna rikarpaykaptinmi pukutay rurinpa jana patsaman aywakärinqa.

13Tsay höra patsa fiyupa siksikyaptinmi tsay markacho cada chunka wayipita juk wayi juchunqa y qanchis waranqa (7,000) runakuna wanupäkunqa. Kawaykar quëdaqkunaqa pasaypa mantsakashqami Tayta Diosta alabapäkunqa.

14Ishkay kaq nakay pasaptinpis juk masraqmi chayamunanpaq kaykan.

15Qanchis kaq ángel cornëtata tukamuptinmi jana patsacho angilkuna qayakur kayno nimushqan mayakämurqan: «¡Lapan nacionkunapis Señornintsi Tayta Diospa y Cristupa makinchönami karkaykan! ¡Paymi imayyaqpis rey kanqa!»

16Tsaymi Diospa nawpancho kaykaq ishkay chunka chusku (24) mayor runakuna trönunkunacho jamaraykashqanpita lätakuykur Tayta Diosta adorashpan

17kayno nipäkurqan: «Lapanpaq munayniyuq Tayta Dios, qamtami agradëcikärï. Unaypitami kaykanki, kananpis kaykankimi [y shamunaykipaqnami kaykanki]. Lapantami munaynikicho tsararaykanki. Kananqa qamnami mandayta qalaykushqanki.

18Qamta cäsukuyta mana munarmi maytsaychöpis runakuna pasaypa rabyakärirqan. Kananqa kikikimi rabyakur wanushkunata juzgankipaq. Tiempu chayamushqanami sirvishuqniki profëtakunata y qamman yärakur mantsakushuqnikikunata rïcu kaptinpis waktsa kaptinpis premiuta qonaykipaq. Runa mayinta wanutsiqkunataqa ushakätsinkipaqmi».

19Tsaymi jana patsacho kaykaq templu kichakaptin rikarqä tsaycho kaykaq Pactu Babulta. Elquypis, räyupis y runtu tamyapis fiyupami karqan. Kay patsapis fiyupami siksikyarqan.

← Chapter 10 Jump to: Chapter 12 →