Revelation 14

Quechuan (Tayta Diospa Wilakuynin) 2003

← Chapter 13 Jump to: Chapter 15 →

1Tsaypitanami rikarqä Sión jirkancho Carnish ichiraykaqta. Paypa nawpanchömi pachak chusku chunka chusku waranqa (144,000) runakuna kaykarqan. Paykunapa urkunchömi Carnishpa jutin y Carnishpa Taytanpa jutin qelqaraykarqan.

2Jana patsapitami mayakämurqan atska yaku raqrapa bunyaypa bunyar aywaqno y räyu bunruruqno. Tsay mayakämushqan karqan tsaytsika arpakunata tukamushqannömi.

3Tsayqa karqan mushuq alabanzata cantapäkushqanmi. Tsayta cantapäkurqan Tayta Diospa trönun nawpancho, chusku kawaykaqkunapa nawpancho y tsaycho kaq ishkay chunka chusku (24) mayor runakunapa nawpanchömi. Wakin runakunaqa manami tsay alabanzata yachakuyta kamäpakurqantsu. Tsaypa trukanqa tsay pachak chusku chunka chusku waranqa (144,000) salvashqa runakunalami yacharqan.

4Paykunaqa warmiwan mana kakuq runakuna karmi virgen jipashno püru karkaykan. Imano nakarpis Carnish munashqannömi kawapäkurqan. Paykunata salvarqan Tayta Diospaq y Carnishpaq primiciano kananpaqmi.

5Imaypis mana lulakur jutsaynaqmi karkaykan.

6Tsaypitanami rikarqä juk ángel altupa päriykaqta. Paymi mana ushakaq ali wilakuyta apamurqan. Tsay wilakuy kaykan maytsay nación runakunapaq, maytsay trïbu runakunapaq, ima idiömata rimaqkunapaq y maytsaycho taq runakunapaqmi.

7Tsay angilmi qayakuypa kayno nimurqan: «¡Tayta Diosta mantsakur payta alabapäkuy! ¡Höra chayamushqanami lapan runakunata juzgananpaq! ¡Jana patsata, kay patsata, lamarta y pashtaq yakukunatapis kamaq Tayta Diosta adorapäkuy!»

8Tsay angilpa qepanta juk angilpis aywarmi kayno nirqan: «¡Ushakashqanami, ushakashqanami jatunkaray Babilonia marka! ¡Babiloniami vïnuwan shinkatsiqnöpis lapan nación runakunata mana ali costumbrinkunata yachatsirqan!»

9Tsay angilpa qepantanami mas juk angilpis aywar qayakuypa kayno nirqan: «Mayqanpis anticristuta y ïdulunta adorar señalninta urkunman o makinman churatsikuq kaqkunataqa

10cöpa junta winaraykaq rabyaynintami Tayta Dios mana kuyapaypa uputsinqa. Carnish y santu angilninkunapis rikaykaptinmi tsay runakunaqa azufriwan talushqa nina rataykaqcho rupar nakapäkunqa.

11Paqasta junaqta mana upiypa rupaptinmi imaypis qoshtay sharkunqa. Tsaynölami anticristuta y ïdulunta adorar señalninta churatsikuqkunaqa paqasta junaqta nakapäkunqa».

12Tsay ángel nishqanno kananpaq kaykaptinqa Jesucristuman yärakuqkuna Tayta Diospa mandamientunkunata cäsukur mana ajayaypa payman yärakäritsun.

13Tsaypitanami mayarqä jana patsapita kayno nimuqta: «Kay nishqäta qelqay: «Kananpitaqa Jesucristuman yärakuykar wanuqkuna kushishqami kapäkunqa» ». Espíritu Santupis kaynömi nirqan: «¡Paykunaqa mananami nakanqanatsu, sinöqa jawkanami kawakärinqa! Payman yärakur alilata rurashqankunata Tayta Dios manami qonqanqatsu».

14Rikärishqächömi rikarqä yoraq pukutay janancho runapa tsurin niraq jamaraykaqta. Paymi kaykarqan qori coronashqa y mikuq ösin aptashqa.

15Tsaypitanami jana patsacho kaykaq templupita juk ángel yarqarkamur pukutay janancho jamaraykaqta qayakuypa kayno nirqan: «¡Cosëcha poquraykannami! ¡Cosechanaykipaq tiempu chayamushqanami! ¡Ösikita aptakurkur cosechamunaykipaq ayway!»

16Tsayno niptinmi pukutay janancho jamaraykashqanpita shamur ösinta aptakurkur kay patsacho runakunata shuntamurqan.

17Tsaypitanami mas juk ángel jana patsacho kaykaq templupita ali mikuq ösin aptashqa yarqamurqan.

18Altarcho kaykashqanpitanami yapay mas juk angilpis yarqamurqan. Paymi altarcho nina kawatsiq karqan. Tsay angilmi ösin aptashqa kaq angilta qayakur kayno nirqan: «¡Üva poquraykannami! ¡Ösikiwan lapanta shuntamuy!»

19Tsayno niptinmi tsay ángel ösinwan kay patsacho üvata shuntarqan. Shuntarkurnami üvata jarukunan jatunkaray pözuman winarqan. Tsay pözuqa Tayta Diospa rabyayninmi kaykan.

20Markapita juk läduman jorquykurmi üvata jaruqno runakunata wanutsirqan. Runakunapa yawarninmi cawallupa shiminman töpanan altu soqta chunka (60) lëwayaq aywarqan.

← Chapter 13 Jump to: Chapter 15 →