Revelation 13

Quechuan (Tayta Diospa Wilakuynin) 2003

← Chapter 12 Jump to: Chapter 14 →

1Tsaypitanami rikarqä lamarpita anticristo yarqaykämuqta. Payqa qanchis umayuq y chunka waqrayuqmi karqan. Cada waqranchömi corönata jatirarqan. Cada umanchönami Tayta Diospa contran qelqararqan.

2Cuerpun karqan leopardupa niraqmi. Chakinkunami karqan ösupa chakin niraq. Y shiminnami karqan leonpa shimin niraq. Paytami munayninta dragón qorqan lapanta mandananpaq.

3Anticristupa juk uman pasaypa aqulushqa kaykaqtami rikarqä. Aqulushqa kaykarpis wanunanpa trukan aliyarqanmi. Aliyaptinmi runakuna mantsakushpan nishqankunata cäsukärirqan.

4Anticristuta munayninta qoshqanpitami dragonta runakuna adorapäkurqan. Tsaynölami anticristutapis adorar kayno nipäkurqan: «¡Payno munayniyuqqa manami pipis kantsu! ¡Manami pipis payta vinciyta kamäpakuntsu!»

5Anticristutami Tayta Dios kachaparirqan yachaq tukur paypa contran rimananpaq. Tsaynöpis munayninta qorqan chusku chunka ishkay (42) killa munashqanta imatapis rurananpaqmi.

6Tsaymi anticristuqa Tayta Diospa contran, jana patsacho kaykaq templupa contran y jana patsacho kaykaqkunapa contran imaykatapis rimarqan.

7Tsaynöpis anticristuta Tayta Dios kachaparirqan payman yärakuqkunata atacar vincinanpaqmi. Tsaymi munaynincho tsarararqan maytsay trïbu runakunata, maytsay marka runakunata, ima idiömata rimaq runakunata y maytsay nación runakunatapis.

8Lapan runakunami anticristuta adorapäkurqan. Tsay adoraq runakunapa jutinkunaqa Libru de la Vïdacho manami qelqararqantsu. Tsay libruqa wanutsishqan Carnishpa librunmi kaykan. Tsay libruta Tayta Dios qelqarqan kay patsata kamashqan witsanmi.

9Rinriyuq kaqkunaqa nishqäkunata wiyakäritsun.

10Carcilcho wichqaränanpaq kaqkunaqa carcilchömi wichqaranqa. Wanutsishqa kananpaq kaqkunaqa wanutsishqami kanqa. Tsayno kaptinpis Diosman yärakuqkunaqa pacienciakäritsun. Imano nakarpis payman yärakäritsun.

11Nirkurnami rikarqä anticristupa profëtan patsa rurinpita yarqaykämuqta. Payqa carnishpa waqranno waqrashqami karqan. Itsanqa dragonnömi parlarqan.

12Anticristunömi munayniyuq karqan. Paymi lapan runakunata nirqan anticristuta adorapäkunanpaq. Anticristuqa uman pakishqa kashqanpita aliyashqanami kaykarqan.

13Tsaynöpis anticristupa profëtanqa milagrukunatami rurarqan. Runakuna rikaykaptinmi jana patsapita ninatapis ratatsimurqan.

14Anticristupa nawpancho milagrukunata tsayno rurarmi runakunata engañarqan. Nirkurnami runakunata mandarqan ïduluta rurananpaq. Tsay ïdulu karqan uman aqulushqa kashqanpita aliyashqa anticristo niraqmi.

15Anticristupa profëtanqa munayniyuq karmi ïduluta kawayta qorqan. Tsaymi tsay ïdulu parlar payta mana adoraq kaqkunata wanutsinanpaq nirqan.

16Tsaynöpis anticristuqa yachaq runata y mana yachaq runatapis, rïcu runata y waktsa runatapis, ashmaykunata y mana ashmaykunatapis lapantami alawqa kaq makinman karpis o urkunman karpis señalatsirqan.

17Tsay señal karqan anticristupa jutinpa nümerunmi. Señaläni kaq runakunaqa manami rantipakuyta ni rantikuyta kamäpakurqantsu.

18Anticristupa ima nümerun kashqantapis shumaq tantiyakäriy. Tsay nümerunqa kaykan soqta pachak soqta chunka soqtami (666). Runapa jutinmi tsay nümeru kaykan. Pipis yachaq kaqqa tantiyakutsun pï runapa jutin tsay nümeru kashqantapis.

← Chapter 12 Jump to: Chapter 14 →