Song of Solomon 1

Quechuan (Tayta Diospa Wilakuynin) 2003

Jump to: Chapter 2 →

1Kaychömi qelqaraykan lapanpitapis mas kuyaylapaq kaq cantakuna. Kay cantakunaqa Salomónpami kaykan.

2¡Shumaq mutsarkamankiman itsanqa! Kuyamar mutsamashqaykiqa vïnupitapis masmi mishkin.

3Perfümikipa ali asyaynin maypis mushkiräkuypaqmi kaykan. Jutikipis perfüminömi kuyaylapaq kaykan. ¡Tsaymi jipashkunapis pasaypa kuyashunki!

4¡Cuartuykiman jukla pushakalämay, tayta rey! Tsaychömi pasaypa kushishqa qoyäshun. Vïnuta upur kushikushqantsipitapis masmi kuyanakur kushikushun. ¡Rasuntachari jipashkuna kuyashunki!

5Jerusalén jipashkuna, noqaqa yanala karpis Cedar runakunapa toldunno kuyaylapaqmi kaykä. Salomón ruratsishqan cortïnakunano kuyaylapaqmi kaykä.

6Shanaywan yanayashqa kashqätaqa ama rikapämaytsu. Turïkunami rabyapämashpan üva chakrakunata täpanäpaq churamarqan. Tsaymi kikïpa üva chakräta mana täpashqätsu.

7Kuyaylapaq mözu, wilaykalämay. Uyshaykikunata ¿maychötaq mitsikunki? Pulan junaq fiyupa shanaptin ¿may lantumantaq qatinki? Wilamaptikiqa manami amïguykikuna mitsikushqancho qamta ashir pantakashqa purishaqtsu.

8Lapan jipashkunapitapis mas kuyaylapaq jipash, ashiykashqayki mözu maychöpis kashqanta mana musyashpaykiqa uyshakunapa yupilanpa ayway tarinaykiyaq. Mitsikuqkunapa tsuklankuna kaqman chayaykur cabraykikunata mitsikuy.

9Mamïta, Faraónpa carrëtanta qarachaq fïna yëwanömi kuyaylapaq kaykanki.

10Zarcïlluykita jatikuptikiqa qaqlaykipis kuyaylapaqmi kaykan. Perlasyuq walqaykita walqakuptikiqa kunkaykipis kuyaylapaqmi kaykan.

11Qellaywan adornashqa qori zarcïllutami rurapäshayki.

12Perfümïpa ali asyayninqa chayan kuyashqä rey jamaraykashqanyaqmi.

13Taksha bolsawan tsararashqä mïrra perfümi pëchulächo kashqannömi kuyaynï pëchulächo warayta punun.

14En-gadi parti üva chakracho kaykaq kuyaylapaq alheña waytanömi kuyaynïqa kaykan.

15Pasaypa kuyaylapaqmi kaykanki, mamïta. Maypis kuyaykuylapaqmi kaykanki. Nawikipis ishkay palumano kuyaylapaqmi kaykan.

16Papïtu, pasaypa kuyaylapaqmi kaykanki. Kamaraqla karmi munapaypaq kaykanki. Verdiraykaq qewami cämantsipis kaykan.

17Cedru yörami wayintsipis. Ciprés yörami lantuntsipis.

Jump to: Chapter 2 →