Song of Solomon 8

Quechuan (Tayta Diospa Wilakuynin) 2003

← Chapter 7 Jump to:

1¡Alimi kanman mamäpa chuchunta chuchur qeshpiq turï kaptiki! Tsayno kaptikiqa cällicho tinkushpantsi mutsarkuptïpis manami pipis jamurpämanmantsu.

2Makipita janchakurkurmi mamäpa wayinman pushäman. Tsaychömi kuyakuq kayta yachatsimankiman. Granädapita qaptsishqa yakunwan talurkurmi noqapis alinnin kaq vïnuta qaräman.

3Itsuq kaq rikraykita jawnapämay. Alawqa kaq rikraykiwan makalarkamay.

4Jerusalén jipashkuna, promitiykalämay kuyaynï punukuqta mana rikchatsinaykipaq. Punuyta yamashqanyaq punukutsun.

5¡Rikapäkuy! ¡Chunyaq jirkapita jipash aywaykämun kuyaynin makalashqa! Manzäna yöra sikincho punukuykaqtami qamta rikchatsishqä. Tsaychömi mamayki qeshyaq rikakushqa. Tsaychömi mamaykita wachay nanay tsarishqa.

6Imaypis yarparämänaykipaq shonquykiman churaykalämay. Mana qonqamänaykipaq rikraykiman jutïta qelqaykulay. Kuyanakuytaqa wanuytano manami pipis tsapantsu. Waylunakuypitapis sepultürapitano manami qeshpintsitsu. Kuyanakuyqa Tayta Diospita shamuq nina karmi imaypis mana upintsu.

7Kuyanakuytaqa manami ni lamarpis ni mayupis upitsiyta kamäpakuntsu. Kuyanakuqkuna kachanakunanpaq rïcu runa lapan riquëzankunata munatsipaptinpis manami chaskipantsu.

8Panintsipaqa chuchunpis manami yurinraqtsu. Pipis payta ashiq shamuptinqa ¿imatataq nishun?

9Panintsi murällano kaptinqa qellaypita palaciuta ruratsiqnöchi adornashwan. Adornuynaq punkuno kaptinqa cedru tablakunawan adornaqnöchi adornashwan.

10Noqaqa murällanömi kaykä. Chuchükunapis rikachakuna törrikunanömi kaykan. Kuyamaqnïpa nawpanchöqa pasaypami kushikü.

11Baal-hamónchömi Salomónpa üva chakran karqan. Tsay chakrantami runakunata arriendakuykurqan. Cada wata cosëchata usharkurmi cada ünun waranqa (1,000) qellayta arrindunpita pägapäkuq.

12Salomón, tsay runakunapita waranqa qellayta chaskiptikipis y chakra rikaqkunata ishkay pachak (200) qellayta pägaptikipis noqaqa üva chakräta kikïmi rikaykä.

13Huertakunacho jamakuq reina, amïgükuna mayaq mayaqlami karkaykan rimashqaykita mayananpaq. Noqapis mayanäpaq imalatapis rimarkalämuy.

14Luychuno karpis o tarushno karpis ali asyaykaq jirkakuna jananpa cörrimuy, papïtu.

← Chapter 7 Jump to: