Song of Solomon 3

Quechuan (Tayta Diospa Wilakuynin) 2003

← Chapter 2 Jump to: Chapter 4 →

1Tsakaypapis cämächömi ashishqä shonqü kuyashqan mözuta. Wakpa kaypa tikraykacharpis manami tarishqätsu.

2Pasaypa yarpachakurmi sharkushqä. Intëru markapa aywarmi cällikunapa y pläzakunapapis kuyashqä mözuta ashishqä. Mayjina ashirpis manami tarishqätsu.

3Tsayno puriykaqtami marka täpaq wardiakuna tarimashqa. Paykunawan tinkurmi tapukushqä kayno nir: «¿Manaku rikalashqanki kuyashqä mözuta?»

4Paykunapita pasarilarmi kuyanakushqäwan tinkushqä. Makalakurkurmi mana kachaypa mamäpa wayinman pushashqä. Yurishqä cuartumanmi yaykatsishqä.

5Jerusalén jipashkuna, luychukunapa jutincho y tarushkunapa jutincho promitiykalämay kuyaynï punukuqta mana rikchatsinaykipaq. Punuyta yamashqanyaq punukutsun.

6Chunyaq jirkapita ¿imataq shamuykan? ¿Imataq qoshtatarraq aywaykämun? Mïrra perfümino, inciensuno y tukuy casta kuyaylapaq perfümikunano ¿imataq ali asyaykämun?

7¡Tsayqa kaykan Salomónpa andasninmi! Soqta chunka (60) soldädukunapa chawpinpami aywaykämun. Tsay soldädukunaqa Israelcho alinnin kaq soldädukunami karkaykan.

8Lapanpis karkaykan espäda manijayta y pelyayta yachaq soldädukunami. Tsakaypa imapis kaptin jukla pelyapäkunanpaqmi tseqlancho espädata puritsipäkun.

9Andasnintaqa Líbanupita apatsimushqan alinnin kaq qerukunapitami rey Salomón ruratsishqa.

10Andasninpa tushankunaqa qellaypitami kaykan. Tushakunapa jawiräkunanpis qoripitami kaykan. Reypa jamakunanpis granäti tëlapitami kaykan. Rurinpaqa Jerusalén warmikuna kushishqa bordashqanmi kaykan.

11Sión warmikuna, ¡shapäkamuy rey Salomón corönan jatishqa aywaykämuqta rikanaykipaq! Tsay corönataqa casarakunan junaqmi maman jatipashqa. Tsay junaqmi Salomónpa shonqun pasaypa kushikushqa.

← Chapter 2 Jump to: Chapter 4 →