Song of Solomon 2

Quechuan (Tayta Diospa Wilakuynin) 2003

← Chapter 1 Jump to: Chapter 3 →

1Saróncho rösa waytami noqaqa kaykä. Pampacho winaq liriu waytami kaykä.

2Mamïta, kashakuna chawpincho kaykaq liriu waytami kaykanki. Qamqa lapan jipashkunapitapis mas kuyaylapaqmi kaykanki.

3Munti rurincho manzäna wayuraykaqnömi qamqa lapan mözupitapis mas kuyaylapaq kaykanki, papïtu. Nawpaykiman jamaykurqa manami yarquytapis munätsu. Mishkinömi kuyakuynikipis kaykan.

4Ali alita mikukunayki wayikimanmi pushamashqanki. Tsaychömi kuyamashpayki makalarämashqanki.

5Qamta kuyaylawanmi shonqüpis shonqu niraqnatsu. Päsasnikita y manzänaykita jukla qaramay.

6Itsuq kaq rikraykita jawnapämay. Alawqa kaq rikraykiwan makalarkamay.

7Jerusalén jipashkuna, luychukunapa jutincho y tarushkunapa jutincho promitiykalämay kuyaynï punukuqta mana rikchatsinaykipaq. Punuyta yamashqanyaq punukutsun.

8¡Kuyashqä mözu rimamushqanta mayaykänami! ¡Payqa aywaykämunnami! ¡Puntakunapa y jirkakunapa pañaykacharraqmi aywaykämun!

9Kuyashqä mözuqa luychunöraqmi kaykan. Payqa kuyaylapaq tarushnöraqmi kaykan. ¡Wayï waqtanchönami kaykan! ¡Ventänapanami watqaraykämun! ¡Rejïllanpanami rikapaykäman!

10Mamïta, jukla sharkuy. Kuyashqä warmi, jukla aywakushun.

11Tamya tiempupis pasashqanami. Usya tiempuchönami kaykantsi.

12Intëru jirkachömi waytakunapis pashtaraykan. Cantanantsi tiempupis chayamushqanami. Kulkushkuna cantashqanpis maytsaychömi mayakaykan.

13Hïgus yörakunapis wayuraykanmi. Üva yörakunapapis ali asyaynin mayakaykämunmi. Jukla shamuy aywakunantsipaq, mamïta.

14Kuyashqä paluma, qaqakunacho y chunyaq jirkakunacho amana pakakuynatsu. Parlashqaykitami mayayta munä; qaqlaykitami rikayta munä. Qam rimashqaykiqa maypis mayakuylapaqmi kaykan. Qaqlaykipis kuyaylapaqmi kaykan.

15Üva yörantsikunaqa tuktuykanmi. Tsaykunataqa cuidädu atuq malwakuna ushanman. ¡Tsay atuqkunata wanutsishun!

16Kuyaynïqa noqalapaqmi kaykan. Noqapis paylapaqmi kaykä. Payqa liriu waytakuna kaqchömi mitsikun.

17Papïtu, manaraq patsa waraptin y lantuypis manaraq pasaptin luychunöraq y tarushnöraq Beter puntakunaman kutikalämuy.

← Chapter 1 Jump to: Chapter 3 →