Song of Solomon 6

Quechuan (Tayta Diospa Wilakuynin) 2003

← Chapter 5 Jump to: Chapter 7 →

1Pïmaypitapis mas kuyaylapaq jipash, ¿maypataq kuyashqayki mözu aywashqa? ¿Maypataq aywanan kashqa? Wilapäkamay ashïshinäpaq.

2Kuyamaqnïqa huertanmanmi urashqa. Ali asyaq wayta huertanmanmi yaykushqa. Huertakuna kaqcho mikunanpaqmi aywashqa. Tsaychömi liriu waytakunata palanqa.

3Kuyaynïqa noqalapaqmi kaykan. Noqapis paylapaqmi kaykä. Payqa liriu waytakuna kaqchömi mitsikun.

4Qamqa Tirsa markano y Jerusalén markanömi kuyaylapaq kaykanki, mamïta. Atska soldädukuna pelyaman aywashqan espantaypaq kashqannömi kuyaylapaq kashqaykipis kaykan.

5Amana rikapämaynatsu. Rikapämashpaykiqa löcutätsimankimi. Aqtsaykipis atska cabra malwakuna Galaad jirkakunapa pañar puriqnömi kaykan.

6Kiruykikunapis majädacho tsayraq armatsishqa yoraq uyshakunanömi kaykan. Parninpa parninpa kuyaylapaqmi kaykan. Manami juklaylapis pishintsu.

7Vëluyki rurincho qaqlaykipis granädanömi ishkan lädu kuyaylapaq pukaraykan.

8Mandaq reypa soqta chunka (60) warminkuna kaptinpis pusaq chunka (80) concubïnankuna kaptinpis y yupaytapis mana atipaypaq jipashninkuna kaptinpis

9kuyashqä palumalämi lapanpitapis mas kuyaylapaqqa kaykan. Paytami mamanpis pasaypa kuyan. Jipashkunapis kuyaylapaq kashqanta rikarmi alabapäkun. Reypa warminkunapis y concubïnankunapis ali warmi kashqantami rimapäkun.

10Manami pipis kantsu kuyashqayki jipashnöqa. Waraq lucëru atsikyaqnömi y killa kuyaylapaq kashqannömi kaykan. Inti chipchipyaykaqnömi kuyaylapaq kaykan. Atska soldädukuna pelyaman aywashqan espantaypaq kashqannömi kuyaylapaq kashqanpis kaykan.

11Nogal yörakuna kaykashqan huertamanmi yaykushqä. Tsayman yaykushqä mayu kuchun pampa verdiraykaqta rikanäpaq, üva tsintsiraykaqta rikanäpaq y granäda tukturaykaqta rikanäpaqmi.

12Tsaychömi elaqpita rikakushqä reypa carrëtancho kaykaqnöraq.

13¡Kutikamuy, Sulamita, kutikamuy! ¡Qamta rikaytami munarkaykä! ¡Kutikamuy! ¡Kutikamuy! ¿Imano kaykaqtataq rikamayta munarkaykanki? ¡Campamentucho qatswaykaqtanömi rikayta munarkaykä!

← Chapter 5 Jump to: Chapter 7 →