2 Corinthians 12

Quechuan QXO (Biblia en Quechua del sur de Conchucos)

← Chapter 11 Jump to: Chapter 13 →

1Alabakunqäwan imata mana jipirpis kanan willayäshayki Señor Jesucristo revelacionkunata rikatsimanqanta.

2Chunka chusku watanam päsan Jesucristuman yärakuq reqinqä runata kimsa kaq ciëluman Tayta Dios apanqan. Peru manam musyätsu cuerpuntin aywanqanta o almallan aywanqanta. Tsaytaqa Tayta Diosllam musyan.

3Cuerpuntin aywanqanta o almallan aywanqanta Tayta Dioslla musyaptinpis

4paraísuman apanqantam musyä. Tsaychömi pipis mana wiyanqankunata wiyarqan. Tsay wiyanqankunataqa imanö tantiyatsiytapis manam puëdintsu.

5Tsay runa ciëluman chanqanpitam alabäman. Peru kikïmi sïqa alabakushätsu, sinöqa poderniynaq kanqätam willashayki.

6Alabakuyta munarqa rasun kaqtam alabaküman. Peru tsaynö kaptinpis santuna kanqäta runakuna yarpäyänanta mana munarmi alabakütsu. Manam alabakunqäta wiyartsu pipis alli runa kanqäta yarpanman, sinöqa imanö kawanqätapis rikar y imata parlanqätapis wiyarmi.

7Ciëluchö rikanqäkunapita mana alabakunäpämi pasaypa ñakanäpä Tayta Dios permitishqa. Tsay ñakayqa cuerpüchö kasha jatiraykaqnömi. Kikin Satanás mandamunqan ñakaynörämi pasaypa ñakatsiman.

8Tsay ñakaypita jipimänanpämi Señornintsikta kimsa kuti mañakurqä.

9Mañakuptïmi nimarqan: «Kuyanqalläwan contentakuy. Tsaynö ñakar kallpaynaq kaptikirämi podernïwan yanapashayki». Tsaynö nimaptinmi tsay ñakaywan ñakar kallpaynaq karpis kushikü. Kallpaynaq kaptïrämi Jesucristo yanapaykäman.

10Tsaymi Jesucristuta sirvir llakikütsu qeshyarpis, ashlliyämaptinpis, faltäpakurpis, chikiyämaptinpis y imanö ñakarpis. Kallpaynaq karpis kallpayuqmi kä.

11Löcunö alabakur parlanäpäqa kikikikunam ashipäyämarquyki. Alabakunäpa rantinqa qamkunam alabayämankiman karqan. Kikilläpita imatapis rurayta mana puëdirpis tsay apóstol tukuqkunapitaqa mas allirämi kä.

12Apóstol kanqäta tantiyakuyänaykipämi qamkuna kaqchö ñakarpis espantaypä milagrukunata y señalkunatapis rurarqä.

13Peru wakin markakunachö gastükunapä wawqikunata y panikunata mañakunqänöqa qamkunata manam mañakurqütsu. ¿Imanirtä tsaypita qallayashqa kayanki? ¿Mana mañakunqätsurä jutsä kashqa?

14Alistakushqanam kaykä qamkuna kaqman yapay shamunäpä. Kananwanqa kimsa kutinam shamushä. Manam kikïpä imatapis ashirtsu qamkunaman shamushä, sinöqa qamkunata kuyapar yanapanäpämi. Musyanqantsiknöpis manam pï papäpis wamrankunata mañakuntsu, sinöqa yanapanmi.

15Tsaynöllam noqapis qamkunata mañakunäpa rantinqa imäkunatapis ushashä y qamkuna raykur wanunäpäpis listu kä. Llapan shonqüwan qamkunata kuyapar yanapaykaptï ¿imanirtä noqapita qallayashqa kaykäyanki?

16Musyayanqaykinöpis yanapayämänaykipä manam mayqaykitapis mañakurqütsu. Tsaynö kaptinpis wakikish niyanki pobrikunapä niq tumpalla kikïkunapä qellayta qoritsiyanqäta.

17¿Imanirtä tsaynö yarpäyanki? Tantiyakuyay. ¿Imayllaqa qamkunaman mandamunqä wawqikuna mayqallanpis engañayäshurqaykiku?

18Juk wawqitawan Tituta qamkuna kaqman mandamuptï manam imatapis engañayäshurquykitsu. Tito mana engañakuq kanqannömi noqapis engañakütsu. Paywanqa tsay yarpayllam kayä.

19Kay cartata apatsiyämunqäta liyir capaz yarpäyanki favornïkunallapä qellqayämunqäta. Kuyay wawqikuna y panikuna, manam favornïkunallapätsu qellqaykämü, sinöqa tantiyakur Tayta Dios munanqannö kawayänaykipämi. Jesucristuta sirviq karmi Tayta Diospa puntanchö qamkunata yätsikä.

20Qamkuna kaqman shamur llutanta ruraykaqta tarinäpä kaqtam llakikü. Tsaynöllam llakikü tsaynö kaykaqta tarir ollqutupänäpä kanqanta. Capazchi qamkunata tarïman rimanakuykaqta, chikinakuykaqta, rabyatsinakuykaqta, jukpa wasanta rimaykaqta, manakaqman churanakuykaqta, runa tukuykaqta y mana allikunata ruraykaqta.

21Capazchi melanaypä kaqkunata, fornicación jutsata y jukwan jukwan puriyanqaykita jaqiyarquykitsu. Jutsata ruraykaqta tarir qamkunapita Tayta Diospa puntanchö penqakunäpä kanqanpitam llakikü.

← Chapter 11 Jump to: Chapter 13 →