Amos 1

Quechuan QXO (Biblia en Quechua del sur de Conchucos)

Jump to: Chapter 2 →

1Kay libruchömi Amós willakunqan qellqashqa kaykan. Payqa Tecoa markachö täraq üsha mitsiq runam karqan. Amós willakunqan witsanmi Judá nacionchö Uzías rey kaykarqan y Israel nacionchönam Joáspa tsurin Jeroboam rey kaykarqan. Amós willakunqanpita ishkay wata päsaskiptinrämi pasaypa temblor karqan.

2Willakurmi Amós nirqan: «Tayta Diosmi Sión jirkanpita leonnö qayarämun. Jerusalénpita qayakamunqanmi maqakuynörä wiyakämun. Parlamuptinmi jirkachö qewakunapis illaqpita tsakinqa. Carmelo jirkachöpis qewakuna chipyaqmi tsakinqa».

3Tayta Diosmi nin: «Damasco markachö täraq runakunapa jutsankunaqa alläpanam kaykan. Paykunaqa ërachö trïguta trillaqnömi Galaad runakunata ushakätsiyashqa. Tsaynö rurayanqanpitam mana kuyapaypa castigashä.

4Tsaymi imaykatapis nina rupar ushanqannö rey Hazaelpa castankunata y rey Ben-adad shäritsinqan palaciuta ushakätsishä.

5Damasco markaman yaykuna punkukunatapis llapantam pakir ushashä. Bicat-avénchö y Bet-edénchö mandaqkunatapis chipyaqmi ushakätsishä. Tsaypitanam contran runakuna shamur Siria runakunata Kir partiman prësu apayanqa». Tayta Diosmi tsaynö nin.

6Tayta Diosmi nin: «Gaza markachö täraq runakunapa jutsankunaqa alläpanam kaykan. Paykunam juk marka entëruta edomita runakunaman runakunata rantikuyarqan. Tsaynö rurayanqanpitam mana kuyapaypa castigashä.

7Tsaymi imaykatapis nina rupar ushanqannö Gaza markapa murällanta y palaciunkunatapis chipyaq ushakätsishä.

8Asdod markachö y Ascalón markachö reykunatapis ushakätsishämi. Mana kuyapaypam Ecrón markachö täraq runakunatapis ushakätsishä. Tsaynöpam filisteo runakuna llapanpis wanuyanqa». Tayta Diosmi tsaynö nin.

9Tayta Diosmi nin: «Tiro markachö täraq runakunapa jutsankunaqa alläpanam kaykan. Paykunam castankunawan shumaq kawayänanpä pactuta rurashqa kaykarpis juk marka entëruta edomita runakunaman tsay castan runakunata rantikuyarqan. Tsaynö rurayanqanpitam mana kuyapaypa castigashä.

10Tsaymi imaykatapis nina rupar ushanqannö Tiro markapa murällanta y palaciunkunatapis chipyaq ushakätsishä».

11Tayta Diosmi nin: «Edom nacionchö täraq runakunapa jutsankunaqa alläpanam kaykan. Paykunaqa pasaypa rabyarmi castankuna kaykaptin Israel runakunata mana kuyapaypa espädawan wanutsiyarqan. Tsaynö rurayanqanpitam mana kuyapaypa castigashä.

12Tsaymi imaykatapis nina rupar ushanqannö Temán markata y Bosrachö palaciukunatapis chipyaq ushakätsishä».

13Tayta Diosmi nin: «Amón nacionchö täraq runakunapa jutsankunaqa alläpanam kaykan. Paykunaqa chakrankunata qechuyänanpämi Galaadchö täraq qeshyaq warmikunata espädawan pachanta qashar wanutsirqan. Tsaynö rurayanqanpitam mana kuyapaypa castigashä.

14Tsaymi imaykatapis nina rupar ushanqannö Rabá markapa murällanta y palaciunkunatapis chipyaq ushakätsishä. Pasaypa qayararrä mangäda tamyanörämi tsay markata ushayanqa.

15Mandaqnin reytapis yanapaqninkunatapis juklä nacionmanmi prësu apayanqa». Tayta Diosmi tsaynö nin.

Jump to: Chapter 2 →