Amos 6

Quechuan QXO (Biblia en Quechua del sur de Conchucos)

← Chapter 5 Jump to: Chapter 7 →

1¡Allaw Siónchö tranquïlu täkuq autoridäkuna! ¡Allaw Samaria jirkanchö kushishqa täkuq yachaq runakuna! Qamkuna alli yachaq kayanqaykita yarparmi Israel mayikikuna tantiyatsiyänaykipä shayämun.

2Calne markaman aywar paykunata ima päsanqantapis rikayay. Hamat markamanpis aywar paykunata ima päsanqantapis rikayay. Filistea nacionchö kaykaq Gat markata ima päsanqantapis rikayay. Tsay markakunachö täraq runakunapita ¿mas alli pelyaq kayanqaykitaku yarpäyanki? Markaykikunapis tsay markakunapita ¿mas jatun y mas atskaq runakuna kayanqantaku yarpäyanki?

3Qamkunaqa yarpäyanki ima desgraciapis mana päsayäshunaykipä kanqantam. Tsaynö yarparpis llutankunata rurarmi desgraciaman ishkiykäyanki.

4Qamkunaqa marfilpita rurashqa kuyayllapä catrichörämi jitaräyankipis. Üshakunata y wera torïtukunata mikurmi jamaräyankipis.

5Arpakunatapis waqay waqaytarä tukarmi cantukunatapis mushuq cantukunatana cantaykäyanki. Instrumentukunatapis Davidnörämi tukuy niraqta ruraykäyanki.

6Jatusaq väsukunawanrämi vïnutapis upyaykäyanki. Allinnin perfümikunatarämi wiñakuykäyanki. Qamkunataqa manam imapis qokuyäshunkitsu Israel nación ushakätsishqa kananpä kaptinpis.

7Tsaynö kaykaqtam qamkunatarä puntata jäpa markaman prësu apayäshunki. Apayäshuptikim fiesta ruraypis kanqanatsu.

8Llapanta mandaq Tayta Diosmi kikinpa jutinchö jurar nin: «Jacobpita miraq runakuna runa tukuyanqan pasaypam rabyanätsiman. Palaciunkunata rikaytapis manam munätsu. Tsaymi markanta y llapan imaykankunatapis contrankunapa poderninman churashä.

9Tsaynöpam juk wayichö chunka runakuna kawaykar quëdaqkunapis wanuyanqa.

10Wanuq runakunapa ayanta qoriskir rupatsinanpämi mayqan castallanpis aywanqa. Wayiman chaykur rurichö pillatapis rikarmi tapur ninqa: «¿Pillaqa qamwan tsaychö kaykanku?» Tsaymi ruripita nimunqa: «Manam pipis kaychö kantsu». Mastam nimunqa: «Upälla kay. Cuidädutä Tayta Diospa jutinta joqarishwan. Jutinta joqarishqaqa masmi castigamäshun.

11Tayta Diosmi permitinqa jatusaq wayitapis taksha wayitapis juchutsiyänanpä».

12¿Pillaqa caballun muntakurkur qaqapa cörrinmantsurä? ¿Pillaqa törukunawan lamarchö jarunmantsurä? Tsay yarpaykuna upa yarpay kanqannömi qamkunapis mana tantiyakuq kaykäyanki. ¿Imanirtä mana allikunata rurar Tayta Diospa leyninkunata venënumannö tikraykätsiyanki? Runakunata kushitsiyänaykipa rantin ¿imanirtä mana allikunata rurar llakikuyman churaykäyanki?

13Qamkunaqa manakaqkunapita alabakurmi niyanki: «Kikintsikpa kallpantsikwanmi poderyuq kaykantsik».

14Llapanta mandaq Tayta Diosmi nin: «Israel runakuna, shumaq wiyayämay. Noqam juk nación runakunata pushamushä Hamat partipa lindërunpita hasta Arabá pampayaq poderninchö tsararäyäshunaykipä».

← Chapter 5 Jump to: Chapter 7 →