Amos 5

Quechuan QXO (Biblia en Quechua del sur de Conchucos)

← Chapter 4 Jump to: Chapter 6 →

1Israel runakuna, wanupakuy cantutanö kanan cantaptï shumaq wiyayämay.

2Doncëlla jipashnö kuyayllapä kaykarmi nacionniki ushakanqa. Chipyaq ushakätsishqa kaptinmi pipis shäritsiyta puëdinqatsu.

3Tayta Diosmi nin: «Israel nacionchö juk markapita waranqa (1,000) runakuna pelyaman aywar pachakllanam (100) kutiyämunqa. Juk markapita pachak runakuna pelyaman aywar chunkallanam kutiyämunqa».

4Tayta Diosmi nin: «Israel runakuna, noqata ashiyämay. Ashimarqa kawayankim.

5Bet-elman ama aywayaytsu. Gilgalman ni Beersebamanpis ama chäyaytsu. Gilgal markachö täraq runakunataqa juk nacionmanmi prësu apayanqa. Bet-el markatapis chipyaqmi ushakätsiyanqa».

6Tayta Diosta ashirqa kawayankim. Mana cäsukuyaptikiqa imaykatapis nina ushanqannömi llapaykikunata ushakätsishunki. Tsayöraqa Bet-elchö adorayanqayki ïdulukuna manam mayqanpis salvayäshunkitsu.

7Qamkunaqa pobrikuna quejakunqantapis manam arreglayankitsu. Jutsayuqpa janan shärirmi jutsaynaq kaqpa contran shäriyanki.

8Tayta Diosmi kamashqa Pléyades ninqan qoyllurkunata y Orión ninqan qoyllurkunatapis. Paymi paqastapis junaqman tikratsin. Junaqtapis paqasmanmi tikratsin. Lamarpita pukutayta shäritsirmi tamyatsimun. Jutinpis Yahwehmi.

9Kallpasapa runatapis ushakätsinmi. Altu murällayuq markakunatapis ushakätsinmi.

10Qamkunaqa demanduta alli arreglaq kaqtam chikiyanki. Rasun kaqta willakuq testïgukunatapis qarquyankim.

11Impuestukunata pobrikunata pägatsirmi mikuyänanpä qoriyanqantapis qechuykäyanki. Tsaynö kayanqaykipitam llaqllashqa rumiwan kuyayllapä wayikunata shäritsirpis täyankitsu. Üvata plantarpis vïnunta manam upuyankitsu.

12Musyämi jutsata rurar mana cäsuyämanqaykita. Qamkunaqa qarayta chaskipakurmi jutsayuqkunapa janan shäriyanki y jutsaynaq kaqta culpatsayanki.

13Culpatsayänaykipä kanqanta musyarmi tantiyaq runakunapis upällakuyan. Mana alli kayaptikim pïmaypis mantsa mantsallana kawayan.

14Kuyaypä kawayänaykipä llutankunata ama rurayaytsu, sinöqa alli kaqkunallata rurayay. Tsaymi llapanta mandaq Tayta Dios yarpäyanqaykinölla yanapayäshunki.

15Llutan ruraykunata dëjaskir alli kaqkunallatana rurayay. Despächuykikunachöpis shumaq arreglayay. Tsaynö rurayaptikiqa Josépita miraqkuna mana ushakäyänaykipä capazchi llapanta mandaq Tayta Dios kuyapaykuyäshunkimanpis.

16Poderösu y llapanta mandaq Tayta Diosmi nin: «Pläzakunachöpis waqayllam kanqa. Cällikunachöpis pasaypa llakikurmi qayaräyanqa. Chakrachö aruqkunatapis waqayiyänanpämi qayayanqa. Waqaqkunawanmi juntu waqayanqa.

17Shamur castigaptïmi llapan üva chakrakunachöpis Israel runakuna waqayanqa». Tayta Diosmi tsaynö nin.

18¡Ay, imanörä kayanki Tayta Dios juzganan junaq chämuptin! ¿Imanirtä munayanki tsay junaq chämunanta? Tsay junaq alli kananpä kanqanta yarpäyaptikipis pasaypa mantsariypämi kanqa.

19Tsay junaq leonpita qeshpir ösuwan tinkuqnömi kanqa. Tsaynöllam wayinman yaykur pirqaman tukmakuptin makinta culebra kaniqnö kanqa.

20Tsaymi Tayta Dios juzganan junaq shamuptin kushikuyänanpa trokin pasaypa llakikuyanqa. Tsakaychönö kar manam ima ruraytapis puëdiyanqatsu.

21«Noqapä fiesta rurayanqaykitapis pasaypam melanä. Tsaynö qorikar janan shonqulla adorayämanqaykitapis pasaypam ajayä.

22Rupatsina sacrificiukunata y tsaki mikuykunata noqapä kayayaptikipis manam chaskishätsu. Wera torïtuta alli päsakuy sacrificiupä rupatsiptikipis manam chaskishätsu.

23Arpata tukar kushishqa cantayanqaykitapis manam wiyayta munätsu.

24Noqaqa munä runa mayikikunawan alli kawar munanqänö kawayänaykitam. Mayu mana ushakaypa aywanqannö runa mayikikunawan imaypis alli kawayay.

25«Israel runakuna, chusku chunka (40) wata desiertupa purir manam noqapätsu ashmakunata y tsaki mikuykunata rupatsiyarqayki.

26Tsaypa rantinmi rey kanqanta yarpar Sicut jutiyuq ïduluta aparishqa puritsiyarqayki. Tsaynöllam qoyllur niraq Quiún ïduluta aparishqa puritsiyarqayki. Tsaykunataqa kikikikunam rurayarqayki diosnikikuna kayänanpä.

27Tsaymi Damascupita mas washa partiman qarqatsiyäshayki». Tsaynö rurayäshunaykipäqa Tayta Diosmi nin. Paypa jutinqa Llapanta Mandaq Tayta Diosmi.

← Chapter 4 Jump to: Chapter 6 →