Amos 9

Quechuan QXO (Biblia en Quechua del sur de Conchucos)

← Chapter 8 Jump to:

1Tayta Diostam revelacionchö rikarqä altarpa ñöpanchö ichiykur nimuqta: «Numbralkunapis kuyunqanyaq templupa paradorninkunata takay. Tsaynöpam runakuna jananman templu juchumunqa. Tsaypita qeshpiqkunata espädawan wanutsiptïmi ni jukllayllapis qeshpinqatsu.

2Patsa rurinman pakakuptinpis jipimushämi. Altu ciëluman witsaptinpis urätsimushämi.

3Carmelo jirkaman pakakuptinpis ashi ashiykurmi tsarimushä. Lamar rurinman pakakuptinpis mantsaypä culebrawanmi kanitsishä.

4Juklä markaman contrankuna prësu apayaptinpis espädawanmi wanutsishä. Israel runakunataqa maychö rikarpis yanapanäpa trokinmi castigashä».

5Llapanta mandaq Tayta Dios kay patsata yataykuptinmi tsullunqa. Tsaymi entëru Israel nacionchö täraq runakuna waqayanqa. Nilo mayu bunyaypa bunyar aywanqannömi patsapis janaman y uraman kuyur tsuktsukyanqa.

6Tayta Diosqa ciëluchömi wayinta rurashqa. Patsa jananpa azulyaraykaqtapis paymi kamashqa. Paymi lamarpita pukutaytapis shäritsir patsa jananman tamyatsimun. Jutinpis Yahwehmi.

7Tayta Diosmi nin: «Israel runakuna, qamkunata kuyanqänöllam Etiopía runakunatapis kuyä. Qamkunata Egiptupita jipiyämunqänöllam filisteo runakunatapis Caftor islapita jipimurqä. Aram runakunatapis Kir partipitam jipimurqä.

8«Noqa rikaykämi Israel nacionchö täraq runakuna pasaypa jutsata rurayanqanta. Tsaynö kayanqanpitam tsay nacionta ushakätsishä. Ushakätsirpis Jacobpita miraqkunata wakintaqa manam ushakätsishätsu». Tayta Diosmi tsaynö nin.

9«Trïguta zarandayanqannömi Israel runakunatapis llapan nación runakunatawan zarandashä. Rurupa kaqkuna yarquptinpis gransa kaqkuna mana yarquyanqannö manam jukllayllapis mana cäsumaqkuna castïgupita qeshpinqatsu.

10Mana cäsumaq kaqkunataqa llapantapis espädawanmi wanutsishä. «Manam imapis päsamäshuntsu» niqkunaqa llapanmi ushakäyanqa».

11«Tsay witsanmi Davidpa wayin juchushqa kaptinpis yapay shäritsishä. Unay kanqannö yapay kananpämi rachinqankunata tsapashä y juchushqa kaqkunata allïtsashä.

12Tsaynömi rurashä kawaykar quëdaq edomita runakunapis Israel runakunapa poderninchö kayänanpä. Tsaynöllam jutïta joqariq kaq wakin nacionkunapis poderninchö kayanqa». Tayta Diosmi tsaynö nin. Paymi tsaykunata ruranqa.

13Tayta Diosmi nin: «Shamuq watakunachö trïgu qoriyta manarä ushayaptinmi muruy tiempuna kanqa. Üva jaruyta manarä ushayaptinmi üva plantapakuy tiempuna kanqa. Jirkakunapapis y jirkankunapapis mayunörämi vïnu atska aywanqa.

14Karu nacionchö kayanqanpitam kuyanqä Israel runakunata kutitsimushä. Kutitsimuptïmi juchushqa markakunata allitsaskir tsaychö täyanqa. Yapay plantayanqan üvapitam vïnutapis upuyanqa. Murukuyanqan alli wayuptinmi mikuyninkunapis tsaytsika kanqa.

15Kikinkunapa nacionninman kutitsiptïmi imayyaqpis tsaychö täyanqa. Tsaypitaqa mananam pipis qarqunqanatsu. Noqa kuyashuqniki Tayta Diosmi tsaynö kananpä nï».

← Chapter 8 Jump to: