bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Romani
/
Romani Ursari 2018 (Biblia Ande Chib Romani)
/
2 Kings 23
2 Kings 23
Romani Ursari 2018 (Biblia Ande Chib Romani)
← Chapter 22
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 24 →
1
Ondaka o charo ikharda e phuren katar o Juda ta katar o Jerusalem te chidiniaon lea.
2
Mapalal sa e murusa katar o Juda, sa e llene katar o Jerusalem, sa e popura, sa e poraukura, sa o foro katar o mai minono llik o mai phuro, sa llele ando cher e Devleko. Kote o charo bare avazea chitisarda lenge o lil katar e alava kai malade ando cher e Devleko.
3
Mapalal o charo thodape pe porrne pasa o direko ta achilo po alav e Devlea kai ka llan orta angla o Del sa pe liea ta sa pe zivotoia, ka guruven leko zakono ta leke alava ta ka cheren leki volia sar si pisime ando lil. Ta sa o foro achilo po alav kai ka cheren sa gala ezgode.
4
Ondaka o charo phenda e Jilkiaseke o baro popo, leke slugenge ta e llenenge kai arakhena e udara, te ikanen katar o cher e Devleko sa e ezgode cherde e Baaleke e Aserake ta sa e cheraienge. Ta phabarda len avri katar o Jerusalem ando vos katar o Sedron, ta inllarda o prajo iagako ando Betel.
5
Mapalal ikanda e poponen kai blagosina avere delen kai e charura katar o Juda thodea len te phabaren o taimano pe thana vazdine katar o Juda, ta truial katar o Jerusalem. Ta ikanda e poponen kai phabarena o taimano e Baaleke, e khameke, e choneke, e slikenge katar o sodiako, ta e cheraienge katar o miloso.
6
Ikanda avri katar o Jerusalem e slika katar e Asera kai saia ando cher e Devleko, ta phabarda la pasa o paiorro katar o Sedron, ta o prajo iagako rispisarda le pe limoria katar o foro.
7
Ta zatrisarda e sobe kote kai e murusa cherena o kurvaluko maskar pete te blagosin pe delen, ta e diskinie cherena e chare e Aserake.
8
Ta o charo cherda te aven sa e popura katar e forura e Judaeke, ta zatrisarda e thana vazdine kai phabarena o taimano, katar o Geba llik o Berseba. Zatrisarda e thana kurbanoke kai sea pe rig o stingo katar o udar e Josueeko, gazda katar o foro.
9
A e popura katar e thana vazdine ni llana kai o altar e Devleko ando Jerusalem, samo jana maskar pete marrno kai inai le levadura.
10
Zatrisarda e Tofete kai saia o than kai phabarena e minonen ande umal katar o Ben Inom, te na phabarel niko pe minonen e Molokeke.
11
Ikanda e gra kai e charura e Judaeke chinadea e khameke po udar katar o cher e Devleko, pasa e soba katar o eunuko Natan Melek, kai arakhela e umalia e foroke. Ta phabarda e bordona kai sea chinade e khameke.
12
Ta i o charo perada e altarura kai sea upral pe soba katar o Ajaz kai cherdea e charura katar o Juda, ta i e altarura kai cherdaia o Manases ande dui bar katar o cher e Devleko. Zatrisarda len, ta kotar prastio ta chudia o prajo ando paiorro katar o Sedron.
13
Zatrisarda e thana avere delenge kai sea ando oriente katar o Jerusalem, pe rig e chachi katar o burdo katar e zatrania, kai o Salomon, charo e Israeleko vazdiaia e Astoretake, o del gado katar e sidoniura, e Kemoseke, o del gado katar e moabitura, ta e Milkomeke, o del gado katar e amonitura.
14
Ta zatrisarda e estatue ta e slike katar e Asera, ta pherda kokala manusenge gola thana.
15
Ta i o Josias zatrisarda o altar kai saia ando Betel ta o altar kai saia po burdo kai vazdiaia o Jeroboam chavo katar o Nabat, kai cherda te cherel o bilachipe e Israele. Phagla gua altar ta phabarda le ta cherda le prajo. Ta i phabarda e slika katar e Asera.
16
Kana o Josias irisailo ta dikhla e limoria kai sea po burdo, bichalda llenen te ikanen e kokala ta phabarda len po altar te meliarel le, sar phendaia le o Del cheres o profeta kana phenda kai gia saia te avelpe.
17
Mapalal puchla: ¿So si gua kai me dikhav incha? Ta e llene phende leke: Gava si o limori katar o profeta kai avilo katar o Juda ta poraukisarda katar e ezgode kai tu cherdan po altar katar o Betel.
18
Ondaka o Josias phenda: Muken le kote. Niko te na dodil leke kokala. Gia mukle isto kote leke kokala ta e kokala katar o profeta kai aviloia katar e Samaria.
19
Ta sa e chera katar e altarura kai e charura katar o Israel vazdie avere delenge ande Samaria, kai pala gua joliarde e Devle, o Josias ikanda len ta cherda lenchar gia sar cherdaia ando Betel.
20
Ta mundarda pe altarura sa e poponen kai blagosina avere delen ta pe lende phabarda kokala manusenge. Mapalal irisailo ando Jerusalem.
21
Ondaka o charo phenda gia e foroke: Cheren e slava katar e paskua e Gazdake tumaro Del, sar si pisime ando lil katar gava alav.
22
Ni cherdea e paskua sar kana e krisaria gazdarina ando Israel, ta ni ando vreme katar e charura katar o Israel ta katar o Juda.
23
Kana nakhle desojto burs sar kana o Josias thoda te charoil, cherde e slava katar e paskua e Devleke ando Jerusalem.
24
O Josias chudia e llenen kai cherena chirimate, kai apogodina, e delen katar e familie ta sa e ezgode gado kai blagosina ando Juda ta ando Jerusalem. Gua cherda le te kandel so saia pisime ando lil katar o zakono kai maladaia o popo o Jilkias ando cher e Devleko.
25
Nikada ni saia ni iek charo sargo o Josias kai irisailo e Devleke sa pe liea, sa pe duoia ta sa pe zoriaia sar phenel le o zakono e Moiseseko. Ta mapalal letar ni avila niko sargo vou.
26
A e joli e Devleki ni liape, soke saia joliariko po Juda pala sa e ezgode bilache kai cherdaia o Manases.
27
Goleke o Del phenda gia: Ka mukav e Judae sar muklem e Israele. Ta i ka mukav e Jerusaleme kai esvirisardem, ta ka mukav o cher kai phendem kai andre saia te avel mo anav.
28
Sa so cherda o Josias si pisime ando lil katar so cherde e charura e Judaeke.
29
Ande gua vreme o charo katar o Ejipto o Faraon Nekao llelo po pai katar o Eufrates te marelpe e charoia katar e Asiria. Ta likisto o Josias te marelpe lea, a samo kana o Nekao dikhla le, mundarda le ando Megido.
30
Leke sluge thode leki esnaga ande iek bordon ta ande le katar o Megido llik kai o Jerusalem, kote prajosarde le ande leki limoria. Mapalal e llene katar o foro thode zeitino po Joakaz, chavo katar o Josias, ta thode le te charoil po than leke dadeko.
31
Kana o Joakaz thodape te charoil sea leke bis ta trin burs. Ta charoisarda ando Jerusalem trin chon. Leki dei saia e Jamutal chei katar o Jeremias katar e Libna.
32
A o Joakaz cherda o bilachipe angla e akha e Devleke, gia sar cherde leke purane.
33
Ta o Faraon o Nekao phangla le ande Ribla katar o Jamat, te na charoil ando Jerusalem. Ta pe zor cherda te pochinel o foro trin milie ta trin stotine kile rup, ta tranda ta trin kile sunakai.
34
Ta o Nekao thoda te charoil e Eliakime chavo katar o Josias. Pharruda o anav katar o Eliakim ta ikharda le Joakim. Ta e Joakaze inllarda le ando Ejipto ta kote mulo.
35
O Joakim pochinda o rup ta o sunakai kai mangela o Faraon, ta te sai pochinel leke, o Joakim phenda e llenenge katar e phuv te pochinen love pe zor. Ta suako lleno katar e phuv pochinda ando rup ta ando sunakai prema e phuv kai saia le. Llinde e love ta pochinde e Nekaoke.
36
Kana o Joakim thodape te charoil sea leke bis ta panch burs. Charoisarda ando Jerusalem desuiek burs. Leki dei saia e Zebuda, chorri katar o Pedaias katar e Ruma.
37
Ta cherda o bilachipe angla e akha e Devleke gia sar cherde leke purane.
← Chapter 22
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 24 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25