Zechariah 11

Romani Ursari 2018 (Biblia Ande Chib Romani)

← Chapter 10 Jump to: Chapter 12 →

1¡Libano, putar che udara, te phabarel e iag che sedrura!

2Tu sipres, ¡rov soke e sedrura peletar, soke e bare kasta si peradine! ¡Roven tumen ensine katar o Basan, soke chinde e kasta katar o baro vos!

3¡Te asunen tumare avazura dukhake, chobanura, soke o sukaripe katar e zeledina achilo zatrime! ¡Te asundol kai basen lionura, soke e dragostia katar o Jordan inai ios!

4Gia phenda mange o Del: Arak me bakren kai inllaren len te mundardon,

5kai ni lenge chobanura inai lenge zao lendar, ta gola llene kai chinen len, mundaren len ta ni acharenpe dosale. Ta kana bichinen len phenen: ¡Blagosime te avel o Del, soke akana sem barvalo!

6Goleke ni ka prostiv e llenen katar e phuv. Ka cherav te avel dino suako lleno ande pe phlaleke va, ta kai lengo charo te del pe suako iek. Von ka zatrin e phuv, ta me ni ka kurtuliv len katar lenge va. Me o Del phenav le.

7Ondaka thodem man te arakhav e bakren kai sea te mundaren len, kai sea e mai chorre katar e stoka. Ta cherdem dui rovlia, iekha ikhardem Dragostia ta e ogola ikhardem Sole.

8Ando chon llive chudiem trinen chobanonen kai nasti terpisardem len ios, ta i kai murzina pe ma.

9Ondaka phendem lenge: Ni ka arakhav tumen ios. Ko tumendar ka merel, te merel. Ko tumendar ka jasaol, te jasaol. Ko tumendar ka achel llundo, te jal pe phlaleko mas.

10Mapalal liem o rovli kai ikhardem la Dragostia ta phaglem le, gia te pharruvav o alav kai achilem e foronenchar.

11Gua llive o alav phagilo, ta gia e chorre katar e stoka acharde kai gua saia alav e Devleko.

12Ondaka phendem: Te dikhen tumen kai si sukar, pochinen mange me llivesa radoke. A te na, muklen isto gia. Ta so pochinde mange sea tranda tolaria rupune.

13Ta o Del phenda mange: Dik soia pochinde mange pala sa e ezgode lache kai cherdem lenge. ¡Le e tranda tolaria rupune ta thov len ando barvalipe! Ta liem e tranda tolaria rupune ta thodem len ando barvalipe katar o cher e Devleko.

14Mapalal phaglem o aver rovli kai ikhardem la Sole, ta gia phagilo o volipe maskar o Juda ta o Israel.

15Mapalal o Del phenda mange: Thou pe tute patave katar iek chobano bilacho,

16soke me ka cherav te avel ande phuv iek chobano kai ni ka chitilpe leke e bakre, ni ka rodel e bakre jasarde, ni ka sastarel e bakre kai phagla pe porrno ta ni ka del te jal e bakre kai si suko, a ka jal e bakren mai thule ta ni ka mukel lendar ni o porrne.

17¡Tesko e chobanoke kai mukel e bakren! ¡Te perel o jarni pe leke va ta pe leki iak e chachi! ¡Te achel leko va sa phago, ta te korraol katar e iak e chachi!

← Chapter 10 Jump to: Chapter 12 →