Zechariah 7

Romani Ursari 2018 (Biblia Ande Chib Romani)

← Chapter 6 Jump to: Chapter 8 →

1Ando starto llive katar o iniato chon, kai si o chon kai ikharen le Kisleu. Ando starto burs sar kana thodape te charoil o Dario, avilo o alav e Devleko kai o Zakarias.

2E llene katar o Belen bichaldea e Sarezere ta e Regene Meleke pe llenenchar te molinpe e Devle,

3ta te puchen e poponen ta e porauken kai sea ando cher e Devleko, dal saia te thovenpe patave zalosne, ta te cheren o alluno ando panchto chon, sar cherenale ollikana.

4Ta o alav katar o Del kai si le sa e zor avilo mande, ta vacharda mange:

5Phen sa e llenenge katar e phuv gia: Sa gala eftavardes burs kai ando panchto ta eftato chon tumen cherena alluno ta thovena pe tumende patave zalosne, ¿cherenale pala ma?

6¿A kana tumen jan ta pien, ni cheren le isto tumenge?

7¿A inai isto gala alava kai o Del phenda katar e poraukura kai zivina omanglal, kana ando Jerusalem saia pas, ta i ande forura kai sea truial sea pas, sargo ando Negev ta e Sefela?

8Ondaka o alav e Devleko avilo e Zakariaseke, ta phenda:

9Gia phenel o Del kai si le sa e zor: Chinen e kris orta ta chachimaia, suako iek tumendar te avel leke zao katar po phlal,

10na dukhaven e phivlien ta e llenen kai si bidadenge, na dukhaven e llenen kai aven katar aver phuvia ta kai zivin maskar tumende, ta na dukhaven e llenen kai si chorre. Na mislin tumen te cheren o bilachipe tumare phlalenge.

11A von ni kam le te kanden, die e zea ta ucharde pe kan te na asunen.

12Zuriarde po lio sargo o mai zuralo barr sukar, te na asunen e alava kai o Del phenela pe duoia ta profetonenchar kai zivina omanglal. Goleke o Del jolailo but.

13Ta kana von ikharde e Devle, o Del ni asunda len, isto gia sar von ni asunde le kana o Del e milosoko ikharda len. Goleke phenda:

14Me rispisardem len sargo balav e phuvienge kai von ni pinllarena, ta palal pala lende e phuv achili sargo pusto, kai niko nasti zivila kote. ¡Iek phuv kai saia gia sukar, von cherde la bari zatrania!

← Chapter 6 Jump to: Chapter 8 →