Zechariah 14

Romani Ursari 2018 (Biblia Ande Chib Romani)

← Chapter 13 Jump to:

1Avel o llive e Devleko, kana ka fulaven so achela tut, Jerusalem.

2Gua llive o Del ka chidel sa e phuvien te marenpe e Jerusalemea. Ta ka den po foro, ka vazden e chera, ka den ando lallao e diskinien, ta dopas katar o foro ka inllaren le phanglo. A ni ka jasaol sa o foro.

3Mapalal ka likel o Del, ta ka marelpe gole phuvienchar, isto gia sar mardape ando llive marimako.

4Ta ka thovelpe pe porrne po Burdo e Maslinkengo kai si angla o Jerusalem, pe rig kai likel o kham. Ta o burdo ka putaol po maskaral ande dui kotora, ta ka cherdol iek bari umal. Iek kotor katar o burdo ka miskolpe karing o norte, ta o gua kotor karing o sur,

5ondaka tumen ka nasen ande bari umal, soke e bari umal ka resel llik o Azal. Tumen ka nasen sargo kana dermosaili e phuv ande llivesa katar o Uzias, o charo e Judaeko. Ta ka avel mo Del, ta lea sa e santura.

6Gua llive ni ka avel villelo ni truniariko.

7Gua llive samo o Del pinllarel le, soke inai ollivesea ta ni orachaia, soke i kana ka perel o kham ka avel villelo.

8Ta katar o Jerusalem ka likel pai katar e phuv. Dopas katar o pai ka llal karing e Mora Londi, ta o gua dopas karing o Mediterraneo, ando milai ta ando viend.

9Ta o Del ka avel o charo pe sa phuv. Gua llive o Del ka avel iek, ta iek leko anav.

10Sa e phuv ka avel sargo umalia, katar o Geba llik o Rimon ando sur katar o Jerusalem. O Jerusalem ka avel vazdino ta kote ka zivin llene ande po than, katar o udar katar o Benjamin llik kai o purvo udar, gua si o udar kai maladon e dui droma, ta katar o cher baro katar o Jananeel llik kai e thana e charoke kai moren e drak.

11Ta ka zivin ande le, ta nikada ios ni ka avel armaia, soke e llene ka zivin esmiro ando Jerusalem.

12Ta o Del ka cherel te perel gaia muka pe sa e phuvia kai mardepe e Jerusalemea: Lengo mas llundo ka cherniol, ta ka chernion lenge akha, ta lengi chib ka bilaol ande lengo mui.

13Ande gua llive o Del ka cherel te daran but, ta suako iek ka istarel pe phlaleko va, ta ka marenpe iek averea.

14Ta o Juda ka marelpe ando Jerusalem. Ondaka ka chiden sa o barvalipe e phuviengo: sunakai, rup ta patave.

15Ta isto gia ka avel e muka kai ka perel pe gra, pe magarche, pe deve ta pe sa e zivirinie kai ka aven lenchar ande lengo pero.

16Sa e llene kai avile te marenpe e Jerusalemea ta kai ni mule, ka aven suako burs te blagosin e Charo, e Devle kai si le sa e zor, ta te cheren e slava katar e charorra patrenge.

17A te si kai iek foro ni llal ando Jerusalem te blagosil e Charo, e Devle kai si le sa e zor, ni ka delpeke ande lengi phuv.

18A te na avena e ejipsiura, i pe lende ni ka delpeke. Ta o Del ka cherel te perel iek muka pe sa e phuvien kai ni avena ando Jerusalem te cheren e slava katar e charorra patrenge.

19Gaia si e patnia katar o Ejipto ta katar sa e phuvia kai ni avena te cheren e slava katar e charorra patrenge.

20Ande gua llive ka avel pisime ande kampanille katar e gra: Chinado e Devleke. Ta e kavie katar o cher e Devleko ka aven sargo e tasura katar o altar.

21Ta suako kavi ando Jerusalem ta o Juda ka avel chinadi e Devleke kai si le sa e zor, suako lleno kai ka del kurbano ka chiravel ande lende e kurbanura. Ta ni ka aven ios llene kai ka chinen ta ka bichinen ando cher e Devleko kai si le sa e zor.

← Chapter 13 Jump to: