1 Chronicles 22

Romani Baltic Latin (Biblija - Pe Baltitko Romani čib (Romanes) 2019)

← Chapter 21 Jump to: Chapter 23 →

1I phendiá Davído: “Ĥáda, isyn Kher Ráskire-Devléskiro i ĥáda, altárjo vaš célo shačkiribén Izrailjoskiro.

2I priphendiá Davído te keden manušén, savé javné javire rigéndyr, savé sys pe Izrailjoskiri phuv, i čhudiá butiarnen, sob (kaj) te občingiren bará vaš Devléskire-Kheréskiro čhuibén.

3I but sastýr vaš gvozdi (karfina) ke vudará portatyr i vaš sphandypen kerdiá Davído, i but xarkóma (mied'), na ublavi (na važyny),

4i kiedrytko veš, na giny, pal-dová so Sidoniani i Tiriani jandlé Davidóske but kiedrytko veš.

5I phendiá Davído: “Solomóno, čhavó miro, isyn ternó i nabaré-zorjakiro, a Kher, savó trej te kerés vaš Ráske-Devléske, musinel te javél drieván baró ke rajkanypen, ke sláva i šukaripén angíl saré phuvjá, i adiáke javáva me te keráv vaš léske.” I kerdiá Davído but ke leskiro meribén.

6I khardiá Solomonos, čhavés péskires, i phendiá léske te kerél Kher Ráske-Devléske, Izrailjoskire Devléske.

7I phendiá Davído Solomonóske: “Miro čhavó! Mánde sys pe iló te keráv Kher vaš miré Ráskire-Devléskiro, Devléskiro lav;

8ne sys ke me lav Ráskire-Devléskiro, i sys phendló: “Tu pročhudian but rat i lydžijan baré maribena; túke naštý (na musinesa) te kerés kherá lavéske Miréske, pal-dová so tu čhudián but rat pe phuv angíl muj Miro.

9Ĥáda, túte bijandjola čhavó: jov javéla manúš ramanjono (mírno); Me dáva léske ramánjo saré léskire vergéndyr trusciál: paldavá lav léske javéla Solomóno. I Me dáva ramánjo i spokojo Izrailjoske dre léskire dyvesá.

10Jov keréla Kher lavéske Miréske, i jov javéla Mánge čhavésa, a Me javáva léske Dad (Dadésa), i keráva tvardo trono pir léskiro kralipén pe Izrailjo pe viéko.”

11“I kakaná, miro čhavó! Mek te javél Raj Devél túsa, sob (kaj) túke te udelpe saró; i, sob (kaj) tu kerdián Kher tyré Ráske-Devléske, tyré Devléske, syr Jov rakirdiá pal túte.

12Mek te del túke Raj Devél ĥalyibén i godý i te čhuvél tut pe Izrailjo; i tu zrákh tyré Ráskire-Devléskiro, tyré Devléskiro Zakóno.

13Tedy tu javésa bahtaliakirdo, kóli te javésa te pričhuves zor (te starinespe) te spolnines uphenybená i zakóny, savé rakirdiá Raj Devél Mojzáske vaš Izrailjo. Jav zoralé-voliakiro (tvardo) i murškanó, na dar i na piridživ.

14I ĥáda, me pharipnasa skedyjom vaš Ráskire-Devléskiro Kher šel tysjoncy talánty suvnakáj i tysjonco tysjoncy talánty rup, a xarkomake (miediake) i sastyreske nane vaga, pal-dová so len sys drieván but; i vešá i bará me adiáke-pac' kerdjom; a tu iščo (inké) dočhuv ke davá.

15Túte isyn drieván but butiarné, i barunarja (kamienotjosy), i vyčhinybnarja, i kherá-keribnaskire (plotniki), i kažnonen manušén, savé moginéna te kerén kažno butý;

16suvnakái, rup, i xarkóma, i sastýr naštý te gines (te rahines): le i ker; Raj Devél javéla túsa.”

17I rakirdiá Davído saré thagar'jenge Izrailjoskirenge te den vast Solomonóske, léskire čhavéske;

18“Ci nane tuménca Raj Devél, Devél amaró, savó dyjá tuménge ramánjo (miro) saré rigéndyr, pal-dová so Jov otdyjá dre miré vastá manušén phuvjakiren, i poddyjape phuv angíl Raste-Devléste i angíl Léskire manušénde.

19I adiáke pričhuvén iló tumaró i di tumaró ke dová, sob (kaj) te lathes Ras-Devlés, Devlés tumares. Uštén i kerén svénto štéto Ráske-Devléske, Devléske, sob (kaj) te pirilydžas Ráskire-Devléskiro zavietóskiro kovčego i svénta khoré Devléskire dro Kher, savó javéla kerdó lavéske Ráskire-Devleskireske.”

← Chapter 21 Jump to: Chapter 23 →