Daniel 10

Romani Baltic Latin (Biblija - Pe Baltitko Romani čib (Romanes) 2019)

← Chapter 9 Jump to: Chapter 11 →

1Pe tríto berš o Kiraskiro, Piersytkone Kralískiro, sys sykado čačipén Danijeljoske, savés khardé pir lav Valtasaro; i čačunó sys davá sykadyipen i drieván zoraló. Jov ĥalyjá davá čačipén i uĥalyja dykhibén.

2Dre kodolé dyvesá me sómas, Danijéljo, dre túga jasvénca trin eftytka (sied'miny) dyvesá.

3Lačhó maró me na xavas; mas i mol (vino) na giné dre miré uštá, i makhibnasa me na khosavas man ke/žýko dová, syr pherdine (spolnindlepe) trin eftytka dyvesá.

4Pe biš te štárto dyvés pervoné-čhonéskiro sómas me pe brégo baré-rekakiro (leniakiro) pašýl Tigro,

5i ĥazdyjom me miré jakhá, i dykhcjom: ake, jekh murš, uridó dro ĥandladytko (ljonytko) uribén, i kustýk pe léste sys suvnakástyr Ufazostyr.

6E masá léste – syr kuč bar topazo, o muj léskiro – syr o bliskavicakiro dykhibén; léskire jakhá – syr xačkirdé jagengire (fakiely), vastá léskire i ĥerá léskire sys syr ziaindly xarkóma (mied'), i zan léskire rakiribnaskiri – syr zan buté-manušéngiri.

7Féni (tóka) me jekhdžinó, Danijelie, dykhávas dasavo dykhibén, e manušá, savé sys mánca, na dykhné dasavo dykhibén; ne pyjá pe lénde bari dar i jone našné, sob (kaj) te garavenpe.

8Paldavá jacjompe me jekhdžinó, i dykhávas me dáva baró dykhibén, ne dre mánde na jaciápe zor, mina pe miro muj drieván parudiape darátyr, na jaciápe mánde nisavó sastypen.

9I šundjom me zan léskire lavengiri; i féni šunavas me zan (glos) léskire lavengiri, syr kaštaluno dyjompe (zamyjom) me muial i sómas paštó telé mósa ke phuv.

10Ne ake, čiladiá man o vast i čhudiá man pe mre čangá i pe burnyka (ladoni) mre vastengire.

11I phendiá jov mánge: “Danijelie, murš pir iló! ‘Galjov lavá, savé me phenáva túke, uštý mamúj (rovnes) pe ĥerá tyré; pal-dová so me som bičhadó akaná ke tu.” Kóli jov phendiá mánge dalé lavá, to me uštyjom, izdrandoj.

12Ne jov phendiá mánge: “Na andyrša, Danijelie; pervoné dyveséstyr, syr tu čhudián tyró iló, sob (kaj) te doreses ĥalyibén, i te teliakires pes angíl tyré Devléste, lavá tyré sys šundlé, i me javavas pal tyré lavá.

13Ne thagári (kniazjo) Piersytkone kralipnastyr terdjolas proti mánde biš te jekh dyvesá; ne, ake, Miha, jekh pervoné thagar'jendyr, javdiá te del vast mánge, i me jacjompe odój pašýl Piersytka kral'jénde.

14Akaná me javdjom te phenáv džiný (zvies') túke, saró, so javéla tyré manušénca dre dyvesá, so javéna angíl, adiáke, syr dykhibén sykavéla pe duratuné dyvesá.”

15Kiéli jov rakirélas mánge dasavé lavá, me pyjom mósa ke phuv i jacjom muto (niemo).

16Ne, ake, vari-kon, kon zdela (poddžála) pe manušytkoné čhavéste, čiladiá miré uštá, i me otkerdjom miré uštá, lyjom te rakiráv i phendjom odoléske, so sys terdó angíl mánde: “Rajo miro! Kadalé dykhibnastyr saré bidytka tugi miré obrisine pe mánde, i na jaciá mende zor.

17I syr saštý te rakirél o pishári kadasavé miré ráskiro, syr me, Danijéljo, syr tu san? Pal-dová so adral mánde nane zor, i phurdypen (dyhinyben) zamyjá dre mánde.”

18Tén'ci nevéstyr čiladiá man odová džino, savó sys dre patrín (óbrazo) manušýtko i sastiakirdia man,

19i phendiá: “Na andarša, o murš pir iló! Ramánjo (miro) te javél túke; lýdža pes murškanés, jav murškanó!” I kiéli jov rakirélas mánca, me sastijom i phendjom: “Rákir, Rajo miro; pal-dová so tu sastiakirdian man.”

20I jov phendiá: “Ci džinésa, palsó me javdjom ke tu? Akaná me risjováva, sob (kaj) te maravpe Piersytkone thagarisa; i kiéli me vydžava, to, ake, javéla Griekítko (Balamítko) thagári.

21Ne angíl me phenáva túke, so isyn čhindló dro čačunó čhinybén. I nane nikón, kon podrikirelas by man dre dová, apríč Mihaste, tumaré thagariste.”

← Chapter 9 Jump to: Chapter 11 →