Daniel 12

Romani Baltic Latin (Biblija - Pe Baltitko Romani čib (Romanes) 2019)

← Chapter 11 Jump to:

1I uštéla dro dolé dyvesá o Miha, thagári baró, kon javéla terdó pal čhavénde tyré narodóstyr; i javéla časo pharó, savó na sys dolé dyveséndyr, syr javné manušá pe svéto ke/žýko akaná; ne zrakhenape dro dová časo saré manušá tyré narodóstyr, konés lathéna dre lylvarí.

2I but kodolé, savé isyn suté dro phuvjákiro práho, džangadjona, jekh vaš viéčno džiibén, javír pe viéčno ladžaipén i obrakiriben.

3I god'varé javéna te ziainen, syr duda (svietily) pe bolybnáskiro svódo, i kodolé, savé riskirena buten ke čačipén – syr čergeniá dro viéko, pe saré viéki.

4Ne tu, Danijelie, garav dalé lavá i zapiečatyn lylvarí ke palatunó (posliednjo) časo; but manušá proginena la, i javéla te barjol džinybén.”

5Tén'ci me, Danijéljo, dykhcjom, i, ake, terdé sys duj javír Jangóly, jekh pe davá brégo rekakiro (leniakiro), javír pe javír brégo rekakiro (leniakiro).

6I phendiá jekh Jangólo muršeske dro ĥandladytko (ljonytko) uribén, savó sys terdó uprál rekitka paní: “Kiéli javéla kónco (jagóro) dalé divenge?”

7I šunavas me, syr o murš dro gandladytko uribén, savó sys uprál rekitko paní, ĥazdyjá čačó i zérvo (liévo) vast ke bolybén, sovlahadiá viečnone Džidesa, so ke dyvesengiro kónco (jagóro) i ke časy i ke paš-časy, i, syr končynelape sarésa zor sventoné narodoskiri, to saró davá kerélape, čačipnása syr treindiá.

8Me šundjom davá, ne me na’ galyjom, paldavá phendjom: “Rajo miro! So isyn te javél paló davá?”

9I otphendiá jov: “Džá, Danijelie; pal-dová so isyn zakerde i zapiečatyme dalé lavá ke palatunó časo.

10Butdžine žužakirenape (čystinenape), parniakirenape i javéna piribilade vaš propatiakiriben; e fuj manušá javéna te kerén bipatyvales, i na ĥaljola nikón adalestyr lav bipatyvalendyr (fujé manušéndyr), ne e god'varé ĥaljona.

11Kodolé časostyr, syr pirijačena kažnoné-dyvesytka svénta dyibená, i syr javéla čhudo džungalypén čhučipnaskiro, prodžála (nakhela) tysjonco te dujšelá jeniadeša dyvesá.

12Bahtaló isyn odová, kon užakiréla i dodživela tysjonco te trinšelá trijánda pandž dyvesá.

13I tu, Danijelie, džá ke tyró kónco (jagóro) i tu javésa te otkhinjos, i te uštes, sob (kaj) te doreses tyró meknó mištypén pe kónco (jagóro) dyvesengiro.”

← Chapter 11 Jump to: