Ezra 1

Romani Baltic Latin (Biblija - Pe Baltitko Romani čib (Romanes) 2019)

Jump to: Chapter 2 →

1Dro pérvo berš kralískire Kiraskiro, kiéli Jov lyjá te kralinél pe Piérsija, sob (kaj) te spolninélpe lav Ráskire-Devléskiro, savó rakirdiá proróko Jeriemiéie, o Raj-Devél džangadia dúho (fáno) Kiraskiro, Piersijakire kralískiro, i jov dyjá priphenybén te phenén angíl sarénde pir saró kralipén, i adiáke-pac' te začhinen dalé lavá:

2“Adiáke rakiréla Kira, králi Piersijakiro: ‘O Raj Devél, Devél bolybnáskiro, dyjá mánge saré kralipená pe phuv. I Jov priphendiá mánge te čhuvav Kher (Khangirí) Léske dro Jerusalimo, pe Judéia.

3Kon isyn maškír tuménde Léskire manušéndyr, mek te javél Léskiro Devél lésa! Akaná, mek jov te džal dro Jerusalimo, savó isyn pe Judéia, i mek jov te čhuvél Kher (Khangirí) Ráske-Devléske, Savó isyn dro Jerusalimo.

4I pe kažno štéto, pir savé dživéna Judy dro pliéno, mek štetytka manušá te pomoginen lénge rupésa, suvnakása, i javire darenca, kheritkoné murdalénca, adiáke-pac' syr i te den svénto dyibén, so kon kaméla, vaš Kher (Khangirí) Devléskiro, savó isyn dro Jerusalimo.’”

5Tén'ci šeralé pe stréčy /dadengíre-ródy (pokolienii) Judastyr i Vienjaminostyr, i rašaja, i Lievíty, kažno manúš, dre savénde Devél džangadia dúho (fáno), ĥazdynépe te džán te čhuvén nevés Kher (Khangirí), Ráskire-Devléskiro, savó isyn dro Jerusalimo.

6I saré odolé, kon sys pašýl lénde, zorjakirde léngire vastá rupuvé čarenca, priedmietenca (čysénca) suvnakástyr, javire darenca majonkostyr, i kheritkoné murdalénca, i kučipnenca (drogoné priedmietenca), adiáke-pac', syr i saré darenca, so sys jandlo syr svénto dyibén, so kon kamdiá”.”

7I králi Kira lydžijá khoré (sasúdy). Kheréstyr (Khangirjátyr) Ráskire-Devleskirestyr, savé o Navuhodonosóro lydžijá krig Jerusalimóstyr i čhudiá dro léskire-devloreskiro kher.

8I o Kira, králi Piersijakiro, lydžijá javrí len Mifriedatoskire vastésa, kon sys rakhibnaskiro (xranitieljo) pe piralý (sokroviščo), savó pirigindia len Šešbacaroske, thagariske Judaskireske.

9Ake, isyn ginybén, so i kicý sys: trijánda suvnakuné baré čaré, jekh bar (tysjonco) rupuvé baré čaré, biš te jeniá čhurja;

10trijánda xor tahtaja (čašy) suvnakástyr, štar šelá te deš kadasavé-pac' tahtaja rupéstyr, i bar (tysjonco) javír khoré (sasúdy).

11Sys pandž bará štar šelá khoré (sasúdy) suvnakástyr i rupéstyr. Saré dalé dáry lyjá o Šešbacaro pliennonenca, savén lydžiné Vavilonóstyr ke Jerusalimo.

Jump to: Chapter 2 →