Ezra 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to: Chapter 4 →

1I kiéli eftáto čhon javdiá, i čhavé Izrailjoskire sys dre fórja, e manušá skedynépe khetané so ke jekh dro Jerusalimo.

2Tén'ci uštyjá Johošuá (Isúso), čhavó Iosiediekoskiro (Jozadakoskiro), i pšála léskire, rašaja, i Zorovavieljo, čhavó Šoltiloskiro, i léskire pšála, i kerdé altárjo Izrailjoskire Devléske, sob (khaj) te janén céla shačkiribena, syr čhindló dro Zakóno Mojzáskiro, savó sys manúš Devléskiro.

3I jone kerdé altárjo pe léskiro fundámiento pal doiá dar, so sys lénde Najudytkoné manušéndyr dolé themendyr, i jone lyné te janén céla shačkiribena Ráske-Devléske, zlokoskire i bel'veliakire céla shačkiribena.

4Jone adiáke-pac' kerdé Svénko Kuščengiro (Šatrytko), syr isyn čhindló, i janénas kažno dyvés céla shačkiribena adákicy, kicý treindiá pir uphenybén vaš kažno dyvés;

5i paló davá jone jandlé bipirijačibnaskire svénta dyibená te xačkirén, i odolé, syr nevó čhon isyn i vaš saré uphendle svénki vaš Ráske-Devléske, so léske sys posvencyndle, i vaš kažno dáro, so javélas saré iléstyr, syr janéna svénto dyibén, konéske pir iló te del Ráske-Devléske.

6Pervoné dyveséstyr dro eftáto čhon jone lyné te janén céla shačkiribena Ráske-Devléske. Ne fundámiento tel Kher (Khangirí) Ráskire-Devléskiro na sys čhudo.

7Tén'ci jone adiáke-pac' dénas lové barengire spiecenge i kherá-keribnáskirenge, i xabén, i pibén, i maslinitko dzet manušénge Sidonostyr i Tirostyr, sob (kaj) jone te janén kiedrytko veš Livanostyr pir mórjo (derjáv) pašýl Jafa pir otmekibnaskiri (razriešenijo), saví sys lénde Kirastyr, kralístyr Piersijakirestyr.

8Pe javír berš, syr jone javné ke Kher (Khangirí) Ráskire-Devléskiro dro Jerusalimo dro javír čhon, o Zorovavieljo, čhavó Salafiiloskiro [Šaltiloskiro-ju.o.], o Johošuá (Isúso), čhavó Iosiedekoskiro (Jozadakoskiro), i javír léngire pšála: e rašaja i Lievíty, i kodolé saré, kon risijá plienóstyr ke Jerusalimo, i jone lyné te kerén butý i čhudé Lievitén, savénge sys biš berš i phuredýr te dykhén pal butý pe Kher (Khangirí) Ráskire-Devléskiro.

9I o Johošuá (Isúso), léskire čhavé i léskire pšála; o Kadmiilo léskire čhavénca; čhavé Judáskire, so ke jekh manúš lyné khetané te dykhén pal butiarnende pe Kher (Khangirí) Devléskiro; adiáke-pac' čhavé Xienanadoskire, léngire čhavé, i léngire pšála, Lievíty.

10Kiéli kherá-keribnaskire manušá čhudé fundámiento tel Kher (Khangirí) Ráskire-Devléskiro, e rašaja terdiné dre léngire uribená rogénca i Lievíty, čhavé Asafoskire, cymbalenca, te šarén Ras-Devlés pir statutno uphenybén kralístyr Davi-dostyr dro Izrailjo.

11I jone bagandle jekh pal javiréste, parikiri Ráske-Devlske: “Jov isyn lačhó, vaš dová so Léskiro drógo lačhipén rikirélape pe saré viéki pe Izrailjo.” I saré manušá dyné gódla baré godlása, kiéli jone šarde Ras-Devlés, vaš odová so sys čhudo fundámiento tel Kher (Khangirí) Ráskire-Devléskiro.

12Ne, but rašaja, i Lievíty, e šeralé pe stréčy /dadengíre-ródy (pokolienii), savé sys phurané manušá, i dykhné pérvo Khangirí, rondlé zoralés, kiéli čhudé fundámiento angíl léngire jakhá, i but dyné gódla radymátyr.

13I manušá na mogindlé te rozĥaljon lačhés šumo godlatyr radymakire šumostyr; pal-dová so manušá dyné gódla zoralés, i šumo sys šundlo durál.

← Chapter 2 Jump to: Chapter 4 →