Ezra 6

Romani Baltic Latin (Biblija - Pe Baltitko Romani čib (Romanes) 2019)

← Chapter 5 Jump to: Chapter 7 →

1Tén'ci o králi Darijo dyjá priphenybén i obrodyne kher, dro savó rakhne arhivna svitki, kaj sys čhudé kučipena ke Vavilóno.

2I dro Aktabano, pe štéto, savó sys dre Midijakiri okruga, lathné dasavo začhinyben dro svítko:

3“Pe pérvo berš, syr o Kira jaciá kralísa, jov dyjá priphenybén pal Kher (Khangirí) Devléskiro ke Jerusalimo: “Mek te kerén Kher (Khangirí) Devléskiro pe štéto, ke savó jone janéna svénta dyibená; i mek lačhé fundamienty te čhuvén pir kadasavé baripena: léskiro vučipén te javél šovdešá kuniá, i léskiro buĥlypén te javél šovdešá kuniá;

4te javén trin riady baré barendyr, i jekh riado kaštune matier'ialostyr, sob (kaj) te pleskiren pal davá kralískire kheréstyr.

5I adiáke-pac' suvnakuné i rupuvé khoré Kheréstyr Devleskirestyr, savé o Navuhodonosóro lyjá Kheréstyr i jandiá ke Vavilóno, sob (kaj) te otdén pale i te janén pale dro kher, savó isyn ke Jerusalimo, pe léngiro štéto i, sob (kaj) te čhuvén pale len dro Kher (Khangirí) Devléskiro.

6Akaná, paldavá, Fafnajo (Fafnajo), themeskiro barydyró pe okruga pal Reka, i Šefar-Boznajo, i tumaré dromeskire malá Piérsy, savé isyn pale Reka, rikirenpe durál odothýr.

7Mek butý pe Kher (Khangirí) Devléskiro te kerélpe duredýr; mek Judéngire-themeskiro šeraló i Judéngire phurydyrá te čhuvén davá Kher (Khangirí) Devléskiro pe léskiro štéto.

8I me adiáke-pac' davá priphenybén pal dová, so tuménge trej te kerén vaš Judéngire phurydyrenge pe Kher (Khangirí) Devléskiro: mek te pleskiren pal daja butý kralískire bažyniatyr, saví skedelape manušéndyr dre provincyja pale Reka, davá jekhátyr trej te den kodolé manušénge, sob (kaj) te na terdjol daja butý.

9I sob (kaj) te den adákicy, kicý trej – terné guruvorén, bakrén i bakrorén te janén céla xačkiribna Devléske bolybnaskireske, i givny (parnó giv), i lond, i mol (vino). Maslinitko dzet, syr phenéna rašaja, savé isyn dro Jerusalimo, sob (kaj) te den lénge so dyvés bi zarikiribnaskiro,

10sob (kaj) jone mogindlé te janén gudlé-khandypnaskire svénta dyibená Devléske bolybnaskireske, i sob (kaj) jone te mangénpe Devléske pal kralískiro sastypen i léskire-čhavéngiro.

11Me adiáke-pac' priphendjom, so, kóli vari-kon paruvela miro čhindló priphenybén, mek te vytyrden berno léskire kheréstyr, i te čhuvén les upré, i mek te kerén dalé kheréstyr gruda phagirdé-koterengiri.

12I mek Devél, Savó kerdiá adiáke, sob (kaj) Léskiro Lav te jačélpe odój, te ravel telé kažnoné kralís ci manušén, kóli vari-kon léndyr te ĥazdel angíl vast te paruvel ci te phagirel daja Khangirí, saví isyn dro Jerusalimo. Me, Darijo, dyjom davá priphenybnytko statúto, te kerén dobusóves (kučes) saró pir léste”.”

13Tén'ci o Fafenajo, themeskiro barydyró, pir okruga, so sys pale reka (len'), o Šefar-Boznajo, i léngire malá dobusoves kerdé saró pir dová, so bičhadiá te kerén králi Darijo.

14Adiáke kerdé butý phurydyrá Judéngire, i lénge udelaspe ke mištypén pir Agiejoskiro angilphenybén, kon sys proróko, i syr angilphenelas o Zahárija, čhavó Idoskiro. I jone kerdé butý i končyndle la, syr i priphendiá Devél Izrailjoskiro, i syr priphendle Kira, Darijo, Artaksierkso-králja Piersijakire.

15I ake, Kher (Khangirí) sys dokerdo pe tríto dyvés dro čhon Adaro, savó sys dro šóvto berš, syr lyjá te kralinél králi Darijo.

16I čhavé Izrailjoskire, rašaja i Lievíty, i saré javír manušá, kon risijá plienóstyr, svenkindle radymása, so sys obsvencyndlo Kher (Khangirí) Devléskiro.

17I jandlé jone svénta dyibená, kiéli svencynenas Kher (Khangirí) Devléskiro šel guruva, dujšelá bakré štaršelá bakrore, dešudúj buzne (kozly), syr svénto dyibén pal Izrailjo pir dová, so isyn dešudúj ródycy Izrailjoskire.

18I jone čhudé rašán pir léngire-butiakire štéty i Lievitén pir butiá dre léngire grupy te kerén butý vaš Devléske dro Jerusalimo, syr čhindló dre Mojzaskiri lylvarí.

19I svenkindle Patradí čhavé Judéngire, kon sys dro pliéno, pe dešuštarto dyvés dro pérvo čhon.

20Pal-dová so e rašaja i Lievíty žužakirdé (čystindle) pes so ke jékh manúš: jone saré sys žužé. I jone zamardé Patraditkone bakrorén pal manušéngire čhavénde, savé sys dro pliéno, pal léngire pšalénde, pal rašande, i pal péste.

21I xané čhavé Izrailjoskire, savé risiné plienóstyr, khetané saré odolenca, kon durija vaš péske magiribnastyr, savó gijá Najudytkoné nacyiéndyr pe phuv, sob (kaj) te rodén drieván Ras-Devlés, Devlés Izrailjoskires.

22I jone kerdé opriesnokengiro Svénko pe eftá dyvesá radymása, pal-dová so Raj Devél obradyndia len, i Jov riskirdiá iló kralískiro Asirijatyr ke jone, te zoraliakiren léngire vastá dre butý pe Kher (Khangirí) Devléskiro, Devléskire Izrailjoskiro.

← Chapter 5 Jump to: Chapter 7 →