Ezra 9

Romani Baltic Latin (Biblija - Pe Baltitko Romani čib (Romanes) 2019)

← Chapter 8 Jump to: Chapter 10 →

1Akaná, kiéli saré dalé réndy sys kerdé, javné ke me, ke Jézdra, e lydžaibnáskire (šeré manušá), pheny: “Izrailjoskire manušá, i rašaja, i Lievíty, na mekné péskire Najudytkoné manušén khetané léngire džungalypnasa (brytkimasa): Xananiejéndyr Xietiejendyr, Fierieziejendyr, Jevusiejéndyr, Amonitianendyr, Moavitianendyr, Jegiptianendyr i Amoriejéndyr.

2Jone lyné péske léngire čhajén i vaš péskire čhavénge, i svénto rat dre Devléskiro ródo zmiešyndiape javire-manušytkoné nacyiénca pe dolé phuvjá, i čačes, thagar'jéngiro i theméskire-barydyrengiro vast lydžijá javirén ke čoripén.”

3I kiéli me šundjom davá, to me kuscjom mirí ídia, i šalníro (pal'to), i me riskirdjom balá miré šerestyr i čhorendyr (brodatyr), i me sómas beštó dre bari dar.

4Tén'ci kažno manúš, kon izdrandyja lavéstyr Izrailjoskire Devléstyr, pal-dová so napatiaibnytka sys odolé, savé sys dro pliéno, i me sómas beštó dre bari dar angíl dová, syr jandlé bel'veliakiro svénto dyibén.

5Pe bel'veliakiro svénto dyibén me uštyjom postostyr, i dre roskušny ídia i šalniro, me pyjom pe čangá i dind'kirdjom miré vastá ke Raj Devél, miro Devél,

6i phendjom me: “O miro Dévla! Me ladžava i mánge nane murškipen te ĥazdav miro muj ke Tu, miro Dévla; pal-dová so amaró čoripén ĥazdyjápe vučedýr amaré šerendyr, i amarí bang barija ke bolybén.

7Amaré-dadéskire dyveséndyr ke davá dyvés aménde isyn bari bang. Pal amaró čoripén ame, amaré králja, amaré rašaja, pyjam dre Kral'jéngire vastá javire themendyr, kon tel kurtála, kon dro pliéno, konés rosčorde, konés ladžakirdé, syr isyn adadyvés.

8I, akaná, pe nabaró cýro (časo) amaró Raj Devél, amaró Devél sykadiá láska, so Jov dyjá aménge, jačkirdé manušénge, te jačaspe džidé, i so Jov dyjá aménge bidaripnaskiro štéto te skedas zor pe Léskiro svénto štéto, sob (kaj) Jov, amaró Devél, moginelas te del dud (sviéto) amaré jakhenge, sob (kaj) te del aménge nábut te otdžidjovav dre amarí navolia.

9Na dykhí pe dová, so ame sam pishárja, saroiékh Jov, amaró Devél, na mekciá amen dre amarí navolia; ne Jov riskirdiá ke ame láska Piersijakire Kral'jéndyr, sob (kaj) aménge te otdžidjovas te ĥazdas Kher (Khangirí), amaré Devléskiro, te podkeras lákire ruíny, i te del aménge vánta te zrakhaspe dre Judéia i dro Jerusalimo.

10I akaná, so aménge te phenas, Dévla amaró, pal saró davá? Pal dová, so ame ž mekciam Tyré uphenybená,

11savé Tu priphendian aménge pir Tyré prorokénde, pheny: ‘Phuv, pe saví tumé zadžána te len péske la, isyn magirdy džungalypnasa, savjá magirdé javír manušýtka nácyi léngire nakuč rendénca, savénca jone pherdiakirde la jekhe jagoróstyr (krajostyr) ke javír pal léngiro biladžakuno keriben.”

12Tedy phendián ža Tu pir Tyré prorokénde, sob (kaj) ame te na das amaré čhajén syr romnién pal lénde, i, sob (kaj) ame te na las ame léngire čhajén vaš amaré čhavénge. Sob (kaj) ame nikieli i te na rodas léngiro ramánjo (miro) ci léngiro lačhipén vaš dová, sob (kaj) ame moginasas te javas zoralé, i te čaliakiraspe lačhipnása léngire phuvjátyr, i te jačkiras la syr meknó mištypén amaré čhavénge pe saré viéki.’

13I paló saró (poslie) davá, so javdiá pe aménde pal saré amaré čoré réndy, i pal sarí amarí bari bang, dykhí, so Tu, Dévla amaró, sendiakirdian amen na adiáke pharés, kicý ame sámas bangé, i Tu zrakhcián aménge adákicy manušén, –

14Naúšto (nieuželi) ame nevéstyr javása te na kandas Tyré priphenybená, i javása te khetaniakiraspe kadalé nakučone manušytkoné nacyiénca? Ci na xoliasosa Tu pe aménde pe adákicy, so Tu xasiakiresa amen, sob (kaj) nijékh te na zrakhelpe, i nikón te na jačélpe džidó?

15O, Rajo Dévla! Dévla Izrailjoskiro, Tu san čačipnáskiro! Tu ž jačkirdian amen te dživás, syr davá isyn ke adadyvés. Ake, ame sam angíl Túte amaré čoripnasa; pal-dová so pal dová saró aménge naštý te terdjovas angíl Túte.”

← Chapter 8 Jump to: Chapter 10 →