Zechariah 11

Romani Baltic Latin (Biblija - Pe Baltitko Romani čib (Romanes) 2019)

← Chapter 10 Jump to: Chapter 12 →

1Otker (psirav), Liváno, pórta tyrí, sob (kaj) te pohal jag tyré kiedry.

2Rov, kipariso, pal-dová so pyjá kiedro, pal-dová so i baré kaštá podynepe; rovén, demby Vasanoskire, pal-dová so pyjá ĥensto veš.

3Zan čhupnar'jengiri (pastyr'jengiri) isyn šundly rovibnasa, pal-dová so čhučija léngiri vol'nyma; šunelpe xoliam zan terné-ščerengiri, pal-dová so xasijá Iordanoskiro šukaripén.

4Adiáke rakiréla Raj Devél, Devél miro: “čarav bakrén, savé džána tel čhuri,

5savén xulaja čhinena bi darákiro, a odolé, savé len bikindle, rakiréna: ‘Parikiriben Devléske; me barvalyjom!” I léngire čhupnárja (pastuhi) na tanginena pal lénde.

6Pal-dová so Me na lavá butýr te tanginav manušén dalé – phuvjakiren’, – rakiréla Raj Devél; – ake, Me otdáva manušén, kažnones dre vastá léskire semencake, i dre vastá léskire kralíske. Jone léna te xasiakirén phuv, ne Me na zrakháva len léngire vasténdyr’.”

7I Me čaradjom bakrén, savé džána tel čhuri, bakrén, čačes, čororen. Me lyjom Péske duj sastruné desté (žezly) i Me lyjom te kharav jekh ‘Šuk’, a javír – ‘Sastruné Penty, i čaradjom bakrén.

8I Me xasiakirdjom trinen čhupnar'jen dro jekh čhon; i odrisija di Miro léndyr, syr léngiro di odrisija Mándyr.

9Tien'ci Me phendjom: “Me na lavá te čarav tumen. Savó isyn te merél, mek te merél, i xasibnaskiro – mek te xasjol, a savé jačénape, mek te xan masá jekh javirestyr.

10I Me lyjom Miro sastruno destó – Šuk – i Me phagirdjom les pe paš, sob (kaj) te khosav krig zavieto, so sčhudjom Me saré manušénca.

11I sys destó phagirdó dro do dyvés. I tén'či ĥalyné čororé maškír bakrende, savé užakirde Man, so davá sys lav Ráskire-Devléskiro.

12I Me phendjom lénge: “Kóli tumé kaména, den Mánge Miro pleskiriben; kóli nad – na den; i jone važyndle Mánge syr pleskiriben trijánda rupuvé lovore.

13I phendiá mánge Raj Devél: “Čhurde len dre pirí khangirjákiri, – kadasavi vučí timín, saví jone dyné pal Mánde! I lyjom Me trijánda rupuvore i čhurdyjom len dro Kher Ráskire-Devléskiro vaš manušéske, kon lipinel pirja glinatyr (glejatyr).

14I phagirdjom Me javír sastruno destó Miro – Sastruné Penty, sob (kaj) te rosphandav pšalypen maškír Judaste i Izrailjoste.

15I Raj Devél phendiá mánge: “Le iščo (inké) péske strumiento jekheskire dylyné čhupnar'jendyr.

16Pal-dová so, ake, Me jačavava pe daja phuv čhupnaris, savó na léla te pekelpe pal xas'kiribnaskirende, i jov na léla te rodél našaden, na léla te sastiakirel nasvalen, i sasten jov na léla te čaravel, ne jov javéla te xal mas thulengiro, i kopyty (naja) léngire roskušne pe koterá.

17Mek te javél bída pe džungalé pastyrjoste, savó jačkiréla péskire bakrén! Mek te čhinel čhuri vast léskiro i čačí jakh léskiri! Mek te šutjol sarésa léskiro vast, i mek léskiri čačí jakh sarésa te korjol.”

← Chapter 10 Jump to: Chapter 12 →