Zechariah 7

Romani Baltic Latin (Biblija - Pe Baltitko Romani čib (Romanes) 2019)

← Chapter 6 Jump to: Chapter 8 →

1Dro štárto berš kralískiro Darijoskiro sys lav Ráskire-Devléskiro ke Zahárija, pe štárto dyvés jeniáto (bijekhéskiro déšto) čhon, Xaslievo.

2Syr Viefil' bičhadiá Sariecieros i Riegiem-Mieliehos i malen pir drom (sputniken) leskiren te mangénpe Ráske-Devléske angíl muj Léskiro,

3i te phučén rašandyr, savé sys dre Khangirí, Ráskire-Devléskiri, jangoléngire-bolybnaskiri i prorokendyr, rakirí: “Ci trej mánge te rovav dro pándžto čhon i te rikirav posto, so me keravas uže but berš?”

4I sys ke me láva jangoléngire-bolybnáskiro Ráskire-Devléskiro:

5“Phen sarénge phuvjákire manušénge i rašange adiáke: ‘Kiéli tumé rikirenas posto i rovenas dro pándžto i eftáto čhon, i davá uže eftadešá berš, – ci vaš Mánge tumé rikirde posto? Ci vaš Mánge?

6I kiéli tumé xána, i kiéli tumé p'jena, ci na vaš péske tumé xána, ci na vaš péske tumé p'jena?

7Ci na ‘dasavé kokoré lavá phenelas Raj Devél angledýr pirdál ĥaratuné prorokénde, syr dro Jerusalimo sys iščo (inké) but manušá i pokojnyma, i dre pašylatune fórja, dre paš-dyvesýtko (južno) rig i pe Telatuny Phuv dživénas but manušá?’”

8I sys lav Ráskire-Devléskiro ke Zahárija:

9“Adiáke rakirélas Raj Devél jangoléngire-bolybnáskiro: ‘Kerén séndo čačipnytko i sykavén láska i (žalima) kažno vaš péskire pšaléske;

10Pivlién (udoven), pirotén (siroten), čužones i čorores te na pritasaven i te na rikirén xolý jekh pe javiréste dro iló tumaró.”

11Ne jone na kamlé te kandén, otrisine Mándyr, i kaná péskire ottyrdyne, sob (kaj) te na šunén.

12I iló péskiro zakerde baresa, sob (kaj) te na šunén Zakóno i lavá, savé bičhavelas jangoléngire-bolybnáskiro Raj Devél, Duhósa Peskiresa pirdál ĥaratuné prorokénde; vaš dová i doresciá len bari xolý jangoléngire-bolybnáskire Rástyr-Devléstyr.

13I sys: syr Jov obrisjolas, a jone na šunenas, adiáke i jone obrisjonas, a Me na šunavas,” – rakiréla jangoléngire-bolybnáskiro Raj-Devél.

14I Me rosčhurdyjom len riskiribnáskire balvaliasa pir saré manušénde, savén jone na džindlé. I daja phuv čhučija bi léngiro, so nikón na psirdiá pirdál láte ni angle, ni pale, i jone kerdé dalé bahtalé rigátyr čhučí phuv.”

← Chapter 6 Jump to: Chapter 8 →