Zechariah 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1I nevéstyr (nevés) ĥazdyjom me jakhá miré i dykhcjom: ake, murš, dre saveskiro vast sys šelo, savésa mierinelape phuv.

2Me phucjom: ‘Karik tu džása?” I jov phendiá mánge: “Te obmierinav Jerusalimo, sob (kaj) te dykháv, savó isyn léskiro buĥlypén i savó isyn léskiro dlengipén.”

3I ake, Jangólo, savó rakirdiá mánca, vydžála ne javír Jangólo džála mamúj léste.

4I phendiá jov adaleske: “Džá sygedýr, phen adalé terneske: ‘Jerusalimo bičhavéla péskire manušén pe phuvjá pašýl fóro, pal-dová so drieván but isyn dre léste manušén i but kheritkoné murdalén (skoto).

5I Me javáva’, – rakiréla Raj Devél, syr jekh jagitko vánta (sciana) trusciál léste, i barjola sláva Mirí dre léste andrál.”

6“Ei! Ei! Našén paš-ratitkoné (sieviernone) rigátyr, – rakiréla Devél: ‘pal-dová so pir štar balvalia bolybnýtka Me rosčhudjom tumen”, – rakiréla Raj Devél.

7Naš krig, Sióne, savó san ke Vavilonoskiri čhaj.

8Pal-dová so adiáke rakiréla, jangoléngire-bolybnáskiro Raj-Devél: ‘Vaš sláva Jov bičhadiá man ke Najudýtka nácyi, savé občorenas tumen; pal-dová so savó čilavéla tumen, dočilavelpe ke lial'ka (zračko) dre jakh Léskiri.

9Ake, Me trinskirava Miré vastésa pe lénde, i jone perna tel ĥerá péskire pishar'jengire, i tén'či tumé dodžinenape, so jangoléngire-bolybnáskiro, Raj Devél, bičhadiá Man.

10Jav bahtalý i rádynpe, Sionóskiri čhajo! Pal-dová so, ake, Me javáva i lavá te dživáv dre túte andrál’, – rakiréla Raj Devél.

11– I priprastana ke Raj Devél butdžine manušá dre dová dyvés i jone javéna Léskire manušá; i Jov léla te dživél dre tuménde andrál, i tumé dodžinepe, jangoléngire-bolybnáskiro Raj Devél bičhadiá Man ke tu.

12Tén'ci Raj Devél léla dro xulaiben Judas, sýrby Péskiri miéra dro mištypén pe svénto phuv, i nevéstyr (nevés) vykedéla Jerusalimo.

13‘Mek štyl te javél každo loč (plot') angíl muj Devléskiro! Pal-dová so Jov ĥazdélape Péskire sventoné štetóstyr!”

← Chapter 1 Jump to: Chapter 3 →