Zechariah 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to: Chapter 4 →

1I sykadiá jov mánge Isusós (Johošuás/Ješuás), baré rašás, savó isys terdó angíl Jangoloste Ráskire-Devleskireste, i nalačhés (satanas), savó sys terdó pe léskiro čačó (pravo) vast, sob (kaj) te kerél saró proti Léste.

2I phendiá Devél nalačheske: “Raj Devél, mek te na domekel tut, nálačho, Savó vykedyjá Jerusalimo! Jov rašáj isyn glomnia (golomnia), vylyný jagátyr?”

3Isúso že sys uridó dre meliakirde ídi i sys terdó angíl Jangoloste,

4Savó otphenélas i phendiá odolénge, kon sys terdó angíl léste, adiáke: “Zlen Léstyr meliakirde ídi”; ne Léske kokoreske phendiá: “Dykh! Me zlyjom tútyr čoripén Tyró, i urjakirav tut dre ídi svenkítka.

5I Me phendjom: “Čhuvén po šeró léskiro žužó kidaro.” I jone čhudé žužó kidaro po šeró léskiro i urjakirde les dre ídi. Jangólo že Devléskiro sys terdó.

6I lyjá te buntuinel Jangólo Ráskire-Devléskiro i phendiá Isusóske:

7“Adiáke rakiréla jangoléngire-bolybnáskiro Raj Devél: ‘Kóli lésa te psirés pir Miré dromá i kóli tu javésa pe stréga Mirí, tedy tu lésa te sendines Kher Miro, i te dykhés pale Miré gredy (dvory). Me dáva vólia túke te psirés maškír odolénde, savé isyn terdé adái.

8Vyšún, Isúsie, baró rašái, tu i khardé pšála tyré, savé bešena angíl túte, muršá, savé isyn slavutna: ake, Me lydžáva dynarís Mires, otbarjakiriben.

9Pal-dová so ake, dová bar, savó Me čhuváva angíl Isusóste; pe davá jekh bar isyn eftá (bitrinéngiro deš) jakhá; ake, Me vyčhinava pe léste léskire čhinybna, – rakiréla jangoléngire-bolybnáskire, Raj Devél, i Me khosava krig adalé – phuvjákiro grého dro jekh dyvés.

10Dro dová dyvés, – rakiréla jangoléngire-bolybnáskire Raj Devél, – léna jekh javirés te kharén tel vinagrado (drakh) i tel inžyro.

← Chapter 2 Jump to: Chapter 4 →