Zechariah 14

Romani Baltic Latin (Biblija - Pe Baltitko Romani čib (Romanes) 2019)

← Chapter 13 Jump to:

1Ake, javéla dyvés Ráskire-Devléskiro, i roskerena mištypén, čordo tútyr, maškír túte.

2I Me skedáva sarén manušén pe maribén proti Jerusalimo, i léna fóro i občorna kherá i kerna ladž džuvlienge, paš-fóro džála dro pliéno; ne javír manušá, savé jačénape, na xasjona foróstyr.

3Tén'ci javéla Raj Devél i xoliasóla pe Najudýtka nácyi, syr xoliásyja pe lénde dro maribnaskiro dyvés.

4I terdjona ĥerá Léskire dro dová dyvés pe Olivítko (Jelieonoskiri) bérga, so angíl Jerusalimo ke/žýko vastóko; i rospharjola pe paš bérga Olivítko vastokóstyr ke/žýko zapado (ke pal-pania) drieván baré feldasa, i paš bérga otdžala ke paš-ratítko rig, a javír paš-ke paš-dyvesýtko (južno) rig pe drieván baró dólo.

5I tumé našéna dre félda maškír bérgi Miré; pal-dová so félda protyrdelape ke Asilo; i tumé prastána, syr našenas phuvjákire trinskiribnastyr dre dyvesá Ozijaskire, Judejákire kralískire; i javéla Raj Devél, Devél miro i saré svénta Lésa.

6I javéla dro dová dyvés: na javéla dud, kham, čhon i čergeniá durjona.

7Dová dyvés javéla jekh jekhoro, pal léste džinéla féni jekh Raj Devél: ni rat, ni dyvés, féni bel'velié javéla dud.

8I javéla dro dová dyvés: džidé paniá léna te thaden Jerusalimóstyr, paš léndyr ke vastočno mórjo (derjáv). I paš léndyr ke západno mórjo (derjáv): lynáskiro i ivantéskiro (zimakiro) javéla adiáke.

9I Raj Devél javéla králi pir sarí phuv; dro dová dyvés javéla féni (jekh) Raj Devél, i lav Léskiro-féni jekh.

10Sarí daja phuv javéla, syr rovno (vórto) félda, Gavaonostyr ke Rima, pe paš-dyvés Jerusalimóstyr, savó vučés léla te terdjol pe péskiro štéto i léna te dživén dre léste manušá Biendžminoskire Portatyr ke štéto, kaj isyn pérvo pórta (vrata), ke Vengloskiri pórta, i Xananieiloskire vučardiatyr ke kralitka priesy.

11E manušá léna te dživén dre léste, i na javéla butýr lavitko prokošybén, ne Jerusalimo javéla te terdjol bidarakiro.

12I, ake, savé javéna xasibnýtka fránsy, savénca xasiakiréla Raj Devél saré manušén, so marenaspe Jerusalimosa: kažnonéste vyšutjona masá léskire, syr jov iščo (inké) javéla terdó pe péskire ĥerá, i jakhá léskire biljona dre péskire jamicy, i čib léskiri vyšutjola dro muj léste.

13I javéla dro dová dyvés: javéla maškír lénde bari panika Rástyr-Devléstyr adiáke, so javéla te uhtylel pal javireskiro vast, i ĥazdélape vast léskiro pe vast léskire semencakiro.

14Ne i kokoró Juda léla te marélpe Jerusalimosa, i skedynó javéla mištypén sarengiro pašylatune Najudytkoné-nacyiengiro: suvnakái, rup i ídi but butendyr.

15Javéla dasavo kokoró xasiakiriben grengiro i lošakengiro, xasjona i vierbliudy, i osly (miegárja), i saré murdalá kherítka (skoto), savé javéna pašýl léngire budy dro lod (stáno).

16Paló dová saré javír Najudytkoné nacyiéndyr, savé javénas te marélpe Jerusalimosa, léna berš beršestyr te javén te kerén šerésa angíl Kralíste Raste-Devléste jangoléngire-bolybnaskireste, i te kerén budengiro (kuščengiro) Svénko.

17I javéla: so kóli vari-savó kherítko ródo (pliemjo) pe daja phuv na džála dro Jerusalimo te bandiakirel péskiro šeró angíl Kralíste, Raste-Devléste, jangoléngire-bolybnaskireste, tedy na javéna lénde bryšynda.

18I kóli Jegiptóskiro kherítko ródo (pliemjo) na ĥazdélape do drom i na javéla, tedy i lénde na javéla bryšýnd, i uhtýlla (dósi) len xas', savjása xasiakirla Raj Devél manušén, savé na javéna te kerén šatrengiro Svénko.

19Ake, so javéla pal Jegiptóskiro grého i pal grého saré manušéngiro, savé na javéna te svenkinen budengiro Svénko – pharó sendiakiriben!

20Dro dolé dyvesá i po grengiro ĥámo kudunienca javéla čhindló: “Sventyma Ráske-Devléske”, i kakavja (kotly) dro Kher Ráskire Devléskiro javéna syr čaré (čašy) angíl altárjo.

21I saré pirja (kakavja) dro Jerusalimo i dre Judéia javéna syr sventyma Ráskire-Devléskiri. I saré, kon javéla te janel svénto dyibén, léna len i keravena dre lénde. I na javéla butýr ni jekh Xananiejo dro Kher Ráskire-Devléskiro, jangoléngiro-bolybnáskiro dro dová dyvés.

← Chapter 13 Jump to: