1 Timothy 1

Shan

Jump to: Chapter 2 →

1ၵဝ် ပေႃးလူႉ ဢၼ်ပဵၼ်တမၢၼ်ႇၸဝ်ႈ ယေႇသူႉၶရိၸ်ႈ မႅၼ်ႈၸွမ်းၼင်ႇပိင်းၺၢပ်ႈၽြႃးပဵၼ်ၸဝ်ႈ၊ ၸဝ်ႈဢၼ်ၵႄႇၶျွတ်ႈဢဝ်ႁဝ်း ဢိၵ်ႇတင်း ယေႇသူႉၶရိၸ်ႈ ဢၼ်ပဵၼ်လွင်ႈတၢင်းဢၼ် ႁဝ်းမုင်ႈထႃႈမွင်းထႃႈၼၼ်ႉၼႆႉ၊-

2ပၼ်ငိၼ်းၵႂႃႇတီႈ တီႉမေႃးသေႇ ဢၼ်ပဵၼ်လုၵ်ႈၸၢႆးၵဝ်ၸႅတ်ႈၸႅတ်ႈၸွမ်းၼင်ႇတၢင်းယုမ်ႇမၢတ်ႈၼၼ်ႉဢေႃႈ။ ႁႂ်ႈသူႉၵျေးၸူးၵရူႉၼႃႇဢိၵ်ႇတင်းတၢင်းၼိမ် ဢၼ်ပဵၼ်မႃးၵႃႈတီႈၽြႃးပေႃႈၸဝ်ႈ တင်းၸဝ်ႈႁဝ်း ယေႇသူႉၶရိၸ်ႈ မီးသေၵမ်းလူၺ်ႈ။

3ၵႃႈၼင်ႇဢၼ်ၵဝ်လႆႈတွင်းပၢၼ်ႇဝႆႉတီႈမႂ်း ၼႂ်းမိူဝ်ႈဢၼ်ၵဝ်ၵႂႃႇၵႃႈတီႈမိူင်း မႃႇၵေႇတေႃးၼီႉ ၼၼ်ႉ ႁႂ်ႈသူလႆႈၵိုတ်းသဝ်းယူႇ ၵႃႈၼႂ်း ဝဵင်း ဢေးၽႅတ်ႈ လွင်ႈၼင်ႇႁိုဝ်မႂ်းတၵ်းပိင်းၺၢပ်ႈဝႆႉ တီႈၵူၼ်းၵမ်ႈၽွင်ႈလူၺ်ႈလွင်ႈဢၼ်ၶဝ် ဢမ်ႇလႆႈသွၼ်ပၼ်ဢယူႇဝႃႇတႃႉ ဢၼ်မႂ်ႇ ဢၼ်ပႅၵ်ႇပိူင်ႈၵၼ် ဢိၵ်ႇတင်းလွင်ႈဢၼ်ၶဝ်ဢမ်ႇလႆႈႁဵတ်းပမႃႇၼႃႉ ထွမ်ႇဢဝ်ၵႂၢမ်းတၢၼ်ႇတႃႇရီႇ၊-

4တင်းၸရၢင်းၸိူဝ်ႉၶိူဝ်းသိုပ်ႇသိုပ်ႇတၢမ်းတၢမ်း ဢၼ်မႄးႁဵတ်းလႄႈဢမ်ႇသဵင်ႈလႆႈ၊ ဢၼ်ယဵင်ႈၶႅၼ်းပွင်ႁဵတ်းပွင်မႄး တၢင်းဢၼ် ၵေႃႉၼိုင်ႈလႄႈၵေႃႉၼိုင်ႈတွပ်ႇၵၼ်ထဵင်ၵၼ်ၼမ်ၼႃႇသေ ပွင်ႁဵတ်းပွင်မႄးသႃႇသၼႃႇၽြႃးပဵၼ်ၸဝ်ႈ ဢၼ်တႄႇယူႇၼႂ်းတၢင်းယုမ်ႇမၢတ်ႈၼၼ်ႉ၊ တေႃႈလဵဝ်ၼႆႉၵိုတ်းသဝ်းယူႇတႃႉ။

5ဢၼ်ႁူမ်ႇလူမ်ႈလွင်ႈတၢင်းဢၼ်ဝႆႉပိင်းၺၢပ်ႈ ၸိူဝ်ႉၼင်ႇၼၼ်ၼၼ်ႉၸမ်ႉ၊ ပဵၼ်တၢင်းႁၵ်ႉမႅတ်ႈတႃႇဢၼ်ၸၢပ်ႈသႅင်ႇၵၼ်တင်း ႁူဝ်ၸႂ်ဢၼ်ၶၢဝ်ၸၢင်ႇ ဢိၵ်ႇတင်း ၸႂ်ဢၼ်ႁူႉတူဝ်ၸဝ်ႈၵဝ်ႇဢၼ်လီဢၼ်ငၢမ်း၊ တင်းတၢင်းဢၼ်ယုမ်ႇမၢတ်ႈ ဢၼ်မၢၼ်ႇဢၼ်မႅၼ်ႈ ဢေႃႈ။-

6လွင်ႈတၢင်းၸိူဝ်းၼၼ်ႉၸိုင်၊ ၵူၼ်းၵမ်ႈၽွင်ႈ ဝႄႈပႅတ်ႈသေလႄႈပိူင်ႈၵႂႃႇၸူးၵႃႈတီႈတၢင်းဢၼ် လၢတ်ႈၵႂၢမ်းဢၼ်လၢႆလၢႆဢမ်ႇပွင်ႇလွင်ႈၵႃႈသင်ၵူၺ်းၼၼ်ႉယဝ်ႉ။-

7ၶဝ်ၼၼ်ႉယင်းဢမ်ႇႁူႉလွင်ႈဢၼ်တူဝ်ၸဝ်ႈၵဝ်ႇလၢတ်ႈ၊ ယင်းဢမ်ႇႁူႉလွင်ႈဢၼ်တူဝ်ၸဝ်ႈၵဝ်ႇယူႇၵႅၼ်ႇၶႅင်ၵႃႈတီႈၽၢႆႇတြႃး ၸိူဝ်ႉၼင်ႇႁိုဝ်ၼၼ်ႉလႄႈ ၶႂ်ႈႁဵတ်းသြႃႇဢၼ်သွၼ်ပၼ်တြႃးၸဝ်ႈလူင်ပႄႇ။-

8ၵူၺ်းၵႃႈႁဝ်းႁူႉလွင်ႈဢၼ်ပိင်းၺၢပ်ႈတြႃးၸၢင်ႈပၼ်ဢၵျူဝ်း တီႈၵေႃႉဢၼ်ဢဝ်တြႃးၼၼ်ႉ သုင်းသွင်ႇၸွမ်းၼင်ႇတြႃးၼၼ်ႉ ယူႇလႄႈ၊-

9မၢတ်ႈတွင်းလွင်ႈဢၼ် ပိင်းၺၢပ်ႈတြႃးၼၼ်ႉမီးဝႆႉပုၼ်ႈၵေႃႉဢၼ်ၵမ်ၵျၢင်ႉ ၸွမ်းၼင်ႇတြႃးၼၼ်ႉဢမ်ႇၸႂ်ႈ။ မီးဝႆႉပုၼ်ႈၸႃႉၸဵမ် ၵေႃႉဢၼ် ၵမ်ၵျၢင်ႉဢၼ်ဢမ်ႇတြႃး၊ ၵေႃႉဢၼ်ဢမ်ႇထွမ်ႇဢမ်ႇဢဝ်၊ ၵေႃႉဢၼ်ဢမ်ႇၵူဝ်းၵႂၢႆႇၽြႃး၊ ၵေႃႉဢၼ်မီးဢပႅတ်ႈ၊ ၵေႃႉဢၼ်ဢမ်ႇ မူတ်းၸၢင်ႇ၊ ၵေႃႉဢၼ်ဢမ်ႇရူဝ်ႇသေႇၵူဝ်ယမ်ၽြႃးတြႃး၊ ၵေႃႉဢၼ်ပေႃႉယႅၼ်ႉပေႃႈမႄႈ၊ ၵေႃႉဢၼ်ဢဝ်ဢသၢၵ်ႈၵူၼ်းတၢႆ၊-

10ၵေႃႉဢၼ်ႁဵတ်းမေႇထုင်ႇဢၼ်ဢမ်ႇတြႃး၊ ၵေႃႉဢၼ်ႁဵတ်းမေႇထုင်ႇၽူႈၸၢႆးၼင်ႇၵၼ်၊ ၵေႃႉဢၼ်လၵ်ႉဢဝ်ၵူၼ်း၊ ၵေႃႉဢၼ်လၢတ်ႈၵႂၢမ်းမူႉသႃႇ၊ ၵေႃႉဢၼ်ၵိၼ်ႇဝႃႈ ဢၼ်ဢမ်ႇၸိုဝ်ႈဢမ်ႇၸႂ်ႈ ဢိၵ်ႇတင်းၵႃႈဢၼ်ၶတ်းၵၼ်တင်းဢေႃးဝႃႇတႃႉဢၼ်ၶၢဝ် ဢၼ်ၸၢင်ႇၼၼ်ႉယူႇဢေႃႈ။-

11မိူဝ်ႈဢၼ်ဝႃႈၸိူဝ်ႉၼင်ႇၼႆၸိုင်၊ မႅၼ်ႈၼင်ႇတြႃးသတၢင်းသိူဝ်းပျေႃႇ မုၼ်ယႂ်ႇၽြႃးပဵၼ်ၸဝ်ႈဢၼ်မီးမင်ႇၵလႃႇ ဢၼ်မၼ်းၸဝ်ႈဢၢပ်ႈပၼ်တီႈၵဝ်ၼၼ်ႉဢေႃႈ။

12ၵဝ်ယွင်ႈယေႃးၵျေးၸူးၸဝ်ႈႁဝ်း ယေႇသူႉၶရိၸ်ႈ ၊ ဢၼ်ႁႂ်ႈၵဝ်ပျေႉၸုမ်ႇတင်းႁႅင်းၼၼ်ႉဢေႃႈ။ လွင်ႈမၼ်းၸမ်ႉ ပိၵ်ႉသမ်ႉ ၵဝ်ယၢမ်ႈပဵၼ်ၵေႃႉဢၼ်သႄႉသွမ်း၊ ၵေႃႉဢၼ်ၼိၵ်ႈၸၢၵ်ႈငႅၼ်းသႄး၊ ၵေႃႉဢၼ်ၵျၢမ်းၼႃႇသေၵေႃႈ၊ ၸဝ်ႈၼၼ်ႉမၢတ်ႈၵဝ်ပဵၼ်ၸိူဝ်ႉၼင်ႇ ၵေႃႉဢၼ်မီးသဵတ်ႈၸႃႇလႄႈ ၶၢၼ်းၵဝ်ဝႆႉၼႂ်းဢရႃႇထမ်ႇမႃႉသြႃႇဢေႃႈ။-

13မိူဝ်ႈဢၼ်ၵဝ်ႁဵတ်းၸိူဝ်ႉၼင်ႇၼၼ်ၼၼ်ႉၸိုင်၊ ပိူဝ်ႈဢၼ်ၵဝ်ဢမ်ႇႁူႉဢမၢၼ်ႇၶၼ်ပဵၼ်လႄႈႁဵတ်းၼၼ်ႉလႄႈ၊ ၵဝ်လႆႈၶၢမ်ႇ ၵရူႉၼႃႇၸဝ်ႈယဝ်ႉ။-

14ၵျေးၸူးၸဝ်ႈၽြႃးႁဝ်းၼၼ်ႉၵေႃႈ၊ ပျေႉၸုမ်ႇလိူင်ႇၸႂ်လိူဝ်တွၼ်းၼႃႇလူင်လၢင် ဢိၵ်ႇလူၺ်ႈၵၼ်တင်း တၢင်းယုမ်ႇမၢတ်ႈ တင်းတၢင်းႁၵ်ႉမႅတ်ႈတႃႇဢၼ်မီးၼႂ်း ယေႇသူႉၶရိၸ်ႈ ၼၼ်ႉယဝ်ႉ။

15ၵႂၢမ်းဢၼ်ဝႃႈ၊ ယေႇသူႉၶရိၸ်ႈ မႃးၼႂ်းလေႃးၵႃႉၼႆႉ ႁႂ်ႈလႆႈၵႄႇၶျွတ်ႈဢဝ် ၶဝ်ၸိူဝ်းဢၼ်မီးဢပႅတ်ႈၼၼ်ႉဢေႃႈ၊ ဝႃႈၼင်ႇၼႆၼၼ်ႉ ပဵၼ်ၵႂၢမ်းသဵတ်ႈၸႃႇဢေႃႈ။ ၵႂၢမ်းဢၼ်ထုၵ်ႇလီႁပ်ႉတုင်းဢဝ်သဵင်ႈသဵင်ႈၵေႃႈပဵၼ်ဢေႃႈ။ ၵဝ်ပဵၼ်ၵေႃႉဢၼ်ယႂ်ႇသေပိူၼ်ႈ ၼႂ်းၶဝ်ၸိူဝ်းဢၼ်မီးဢပႅတ်ႈၼၼ်ႉဢေႃႈ။-

16ၵူၺ်းၵႃႈမၼ်းၸဝ်ႈဢဵတ်းလူၵဝ်လွင်ႈၼင်ႇႁိုဝ် ယေႇသူႉၶရိၸ်ႈ တၵ်းလႆႈၼႄပျႃးတၢင်းဢၼ်မၼ်းၸဝ်ႈ ၶၼ်ႇထီႇယိူၼ်ႉၶၢမ်ႇ ၵႃႈမီး တင်းသဵင်ႈတင်းလူင် ၼႂ်းၵဝ်ဢၼ်မီးဢပႅတ်ႈဢၼ်ယႂ်ႇၼႃႇသေပိူၼ်ႈၼႆႉ ႁႂ်ႈၵဝ်လႆႈပဵၼ်ပုင်ႇသၢၵ်ႈသေႇ ပုၼ်ႈၶဝ်ၸိူဝ်းဢၼ် တၵ်း ယုမ်ႇမၢတ်ႈ တေႃႇထိုင်ႁွတ်ႈထႃႇဝရႃႉဢသၢၵ်ႈၼၼ်ႉ တၵ်းၸွမ်းၼၼ်ႉယဝ်ႉ။

17ႁႂ်ႈၶုၼ်ႁေႃၶမ်း လေႃးၵထၢတ်ႈဢၼ်ဝႃႈ ၽြႃးပဵၼ်ၸဝ်ႈသူႇလဵဝ်ၵူၺ်းဢၼ် ၵၢင်းလွတ်ႈတင်း တၢင်းဢၼ်ၽွၵ်ႈပျၢၼ်ႇလူႉလႅဝ် လႄႈ ပဵၼ်ဢႃႉရူႇပႃႉ တၢင်းဢၼ်မၢၵ်ႇတႃဢမ်ႇႁၼ်လႆႈၼၼ်ႉ မီးမုၼ်သရေႇ ဢိၵ်ႇတင်းမုၼ်ဢႃႇၼူႉၽေႃႇၵူႈၵမ်ႇၽႃႇ သိုပ်ႇသိုပ်ႇတၢမ်းတၢမ်း သေၵမ်းလူၺ်ႈ။ ဢႃႇမိၼ်ႇ။

18လုၵ်ႈၵဝ် တီႉမေႃးသေႇ ဢိူၺ်း၊ ၵဝ်ဢဝ်ပိင်းၺၢပ်ႈၼႆႉ ဢၢပ်ႈပၼ်တီႈမႂ်း မႅၼ်ႈၼင်ႇၵႂၢမ်းဢၼႃႇၵၢတ်ႈတီႉ ဢၼ်ဢဝ်လွင်ႈမႂ်း သေလႄႈ ဝႆႉမႃးယဝ်ႉၼၼ်ႉ ႁႂ်ႈမႂ်းလႆႈဢိင်ၵႂၢမ်းဢၼႃႇၵၢတ်ႈတီႉၼၼ်ႉသေလႄႈ ၸွႆးၸပ်းတၢင်းဢၼ်ယုမ်ႇမၢတ်ႈဢိၵ်ႇတင်း တၢင်းဢၼ်ၸႂ် ဢၼ်ႁူႉတူဝ်ၸဝ်ႈၵဝ်ႇလီငၢမ်းၼၼ်ႉ တိုၵ်းသိုၵ်းလီလီငၢမ်းငၢမ်းဢေႃႈ။-

19ၶဝ်ၵမ်ႈၽွင်ႈပႄႇပႅတ်ႈၸႃႉၸဵမ်တၢင်းဢၼ်ယုမ်ႇမၢတ်ႈၼၼ်ႉသေယဝ်ႉ၊ ႁိူဝ်းသၢင်းၽေႃးတၢင်းဢၼ်ယုမ်ႇမၢတ်ႈလူႉလႄႈ သုမ်းယဝ်ႉ။-

20ၼႂ်းၶဝ်ၼၼ်ႉ ပႃး ႁူႉမေႇၼေႇ ဢိၵ်ႇတင်း ဢႃႇလေႇၸၼ်ႇတရူႉ ဢေႃႈ။ ၶဝ်ၼၼ်ႉၸိုင်၊ ၵဝ်လႆႈဢဝ်ဢၢပ်ႈဝႆႉၼႂ်းမိုဝ်းမႃႇၼၢတ်ႈ ႁႂ်ႈၶဝ်လႆႈသွၼ်ဢဝ် တၢင်းဢၼ်ဝႄႈပႅတ်ႈ ၵႂၢမ်းဢၼ်သႄႉဢၼ်သွမ်းၼၼ်ႉယဝ်ႉ။

Jump to: Chapter 2 →

Recommended Reading

Commentary 1 Timothy Commentaries → Devotional 1 Timothy Devotional Guide → Get This Bible Shan Study Bible →