1 Timothy 3

Shan

← Chapter 2 Jump to: Chapter 4 →

1ၵႂၢမ်းဢၼ်ဝႃႈ၊ ပေႃးၵေႃႉၼိုင်ႈတူၵ်းဢၢင်ႈဢရႃႇ တၢင်းဢၼ်ဢုပ်ႉၸိူဝ်းၸဝ်ႈၸိုင်၊ မၼ်းၶႂ်ႈလႆႈၵၢၼ် တၢင်းႁဵတ်းဢၼ်လီဢၼ်ငၢမ်းဢေႃႈ၊ ဝႃႈၼင်ႇၼႆၼၼ်ႉ ပဵၼ်ၵႂၢမ်းသဵတ်ႈၸႃႇဢေႃႈ။-

2ပိူဝ်ႈၼႆလႄႈ ၵူၼ်းဢုပ်ႉၸိူဝ်းၸဝ်ႈၸိုင်၊ တၵ်းလႆႈပဵၼ်တၢင်းၵေႃႉဢၼ်ၵၢင်းလွတ်ႈတင်း တီႈဢၼ်တၢင်ႇဢပႅတ်ႈ၊ ၵေႃႉဢၼ်မီးမေးၵေႃႉလဵဝ်၊ ၵေႃႉဢၼ်မီးသမ်ႇမႃႇသတီႉ၊ ၵေႃႉဢၼ်ပႂ်ႉဢိင်ႇတရေႇ၊ ၵေႃႉဢၼ်ၵမ်ၵျၢင်ႉဢၼ်သၢင်ႇထုၵ်ႇ၊ ၵေႃႉဢၼ်ၸၢင်ႈႁဵတ်း ဝၢတ်ႈၶႅၵ်ႇ၊ ၵေႃႉဢၼ်ၸၢင်ႈသင်ႇသွၼ်သုင်းမႃႉဢေႃႈ။-

3ယင်းဢမ်ႇမီးတၢင်းဢၼ်ၸၢင်ႈပျေႃႇလူၺ်ႈၼမ်ႉၸပိတ်ႈ ဢိၵ်ႇတင်းတၢင်းဢၼ်ၸၢင်ႈပေႃႉယႅၼ်ႉပိူၼ်ႈလႄႈ တၵ်းလႆႈပဵၼ်ၵေႃႉဢၼ်ၸႂ်ၼိမ်သိမ်ႇ ဢူၼ်ႈဢွၼ်ႇ၊ ၵေႃႉဢၼ်ဢမ်ႇၸၢင်ႈၽိတ်းၵၼ်ထဵင်ၵၼ်၊ ၵေႃႉဢၼ်ဢမ်ႇၸၢင်ႈၸႂ်ၸပ်းၸႂ်ၸွႆးငိုၼ်းဢေႃႈ။-

4တၵ်းလႆႈပဵၼ်ၵေႃႉဢၼ်ဢုပ်ႉႁိူၼ်းတူဝ်ၸဝ်ႈၵဝ်ႇ လီလီငၢမ်းငၢမ်းလႄႈ ဢဝ်တင်းသမ်ႇမႃႇသတီႉ သင်ႇသွၼ်ပၼ်လုၵ်ႈလၢင်းမၼ်းဢေႃႈ။-

5ပေႃးမၼ်းဢမ်ႇမေႃဢုပ်ႉႁိူၼ်း တူဝ်ၸဝ်ႈၵဝ်ႇၸိုင်၊ မၼ်းတၵ်းႁဵတ်းၸိူဝ်ႉၼင်ႇႁိုဝ် ပႂ်ႉလူပႂ်ႉတူၺ်းၸိူဝ်းၸဝ်ႈၽြႃးပဵၼ်ၸဝ်ႈ။-

6ပိူဝ်ႈဢၼ်ၵူဝ်မၼ်းတၵ်းမဝ်းလဝ်ႈလူၺ်ႈမႃႇၼႃႉ တၢင်းဢၼ်ၸႂ်သုင်လႄႈ ႁွတ်ႈထိုင်ဢပႅတ်ႈမႃႇၼၢတ်ႈလႄႈ မၼ်းဢမ်ႇလႆႈပဵၼ်ၵူၼ်းမႂ်ႇဢၼ်ၶဝ်ႈၼႂ်းၽႃႇသႃႇ။-

7မၼ်းတၵ်းလႆႈပဵၼ်ၵေႃႉဢၼ်မီးသရေႇ ၵႃႈၼႂ်းၵူၼ်းၵႃႈၼွၵ်ႈတင်းလၢႆ ႁႂ်ႈလႆႈၵၢင်းလွတ်ႈတင်းတၢင်းဢၼ်သႄႉသွမ်း ဢိၵ်ႇတင်း ဢပႅတ်ႈ တၢင်းဢၼ်မႃႇၼၢတ်ႈတီႉၵမ်လႆႈၼၼ်ႉဢေႃႈ။

8မိူၼ်ၼင်ႇၼၼ် ၵူၼ်းပွင်ၸိူဝ်းၸဝ်ႈတင်းလၢႆၸိုင်၊ တၵ်းလႆႈပဵၼ်ၵေႃႉဢၼ်တႄႇယူႇဢေႃႈ။ တၵ်းဢမ်ႇလႆႈပဵၼ်ၵေႃႉဢၼ် ဢဝ်တင်းလိၼ်ႉသွင်ငၢမ်ႈလၢတ်ႈၵႂၢမ်း၊ ၵေႃႉဢၼ်ၵိၼ်ၼမ်ႉၸပိတ်ႈပူၼ်ႉလိူဝ်၊ ၵေႃႉဢၼ်ၸႂ်ၸပ်းၸီးပႂႃးဢၼ်ဢမ်ႇမူတ်းသႂ်ၼၼ်ႉ။-

9တၵ်းလႆႈမီးတၢင်းၸႂ်ဢၼ်ႁူႉတူဝ်ၸဝ်ႈၵဝ်ႇ ဢၼ်မူတ်းသႂ်သေလႄႈ ပဵၼ်ၵေႃႉဢၼ်ၸွႆးၸပ်းလွင်ႈတၢင်းဢၼ်လိုၵ်ႉဢၼ်လမ်ႇ တၢင်းဢၼ်ယုမ်ႇမၢတ်ႈဢေႃႈ။-

10ႁႂ်ႈၶဝ်ၼၼ်ႉၶၢမ်ႇတၢင်းဢၼ်ၸၢမ်းတူၺ်း ဢွၼ်တၢင်းလူးၵွၼ်ႇတႃႉ။ ၵမ်းလိုၼ်းပေႃးၶဝ်ၵၢင်းလွတ်ႈတင်းတီႈဢၼ်တၢင်ႇဢပႅတ်ႈၸိုင်၊ ႁႂ်ႈၶဝ်ႁဵတ်းၵူၼ်းပွင်ၸိူဝ်းၸဝ်ႈတႃႉ။-

11မိူၼ်ၼင်ႇၼၼ် ၽူႈယိင်းတင်းလၢႆၵေႃႈ၊ တၵ်းလႆႈပဵၼ်ၵေႃႉဢၼ်တႄႇယူႇဢေႃႈ။ ဢမ်ႇလႆႈပဵၼ်ၵေႃႉဢၼ်ၸၢင်ႈၶျေႃးၵိၼ် ဝွၼ်းၵိၼ်၊ တၵ်းလႆႈပဵၼ်ၵေႃႉဢၼ်မီးသမ်ႇမႃႇသတီႉ၊ ၵေႃႉဢၼ်မီးသဵတ်ႈၸႃႇ ၼႂ်းလွင်ႈတၢင်းၵူႈၸိူဝ်ႉၵူႈပိူင်ၼၼ်ႉဢေႃႈ။

12ႁႂ်ႈၵူၼ်းပွင်ၸိူဝ်းၸဝ်ႈတင်းလၢႆ မီးမေးယေႈၵေႃႉၵူၺ်းလႄႈ ပဵၼ်ၵေႃႉဢၼ်ၸၢင်ႈဢုပ်ႉလုၵ်ႈ ဢုပ်ႉလၢင်း ဢိၵ်ႇတင်း ၵူၼ်းႁိူၼ်းၵူၼ်းယေးတူဝ်ၸဝ်ႈၵဝ်ႇ လီလီငၢမ်းငၢမ်းတႃႉ။-

13လွင်ႈမၼ်းၸမ်ႉ ၶဝ်ၸိူဝ်းဢၼ်ပွင်ႁဵတ်းဢမူႉ တၢင်းဢၼ်ပွင်ၸိူဝ်းၸဝ်ႈလီလီငၢမ်းငၢမ်းၼၼ်ႉ လႆႈဢမျၢတ်ႈဢရႃႇဢၼ်လီ ဢၼ်ငၢမ်း ဢိၵ်ႇတင်းတၢင်းဢၼ်ႁတ်းဢၼ်ႁၢၼ်ၼႂ်း ယေႇသူႉၶရိၸ်ႈ ၼၼ်ႉ ပုၼ်ႈတူဝ်ၸဝ်ႈၵဝ်ႇဢေႃႈ။

14ပိၵ်ႉသမ်ႉၵဝ်မီး တၢင်းဢၼ်မုင်ႈထႃႈမွင်းထႃႈ ႁႂ်ႈလႆႈမႃးၸူးတီႈမႂ်းၶၼ်ၶၼ်ၽႂ်းၽႂ်းယူႇသေၵေႃႈ၊-

15ပေႃးၵဝ်ၵိုတ်းသဝ်းယူႇႁိုင်ၼႃႇလႄႈ ၼၢၼ်းလႆႈၵႂႃႇၸိုင်၊ ၵဝ်တႅမ်ႈၸိူဝ်ႉၼင်ႇၼႆပၼ်ၵႂႃႇတီႈမႂ်း ႁႂ်ႈမႂ်းလႆႈႁူႉလွင်ႈဢၼ်မႂ်းတၵ်းလႆႈသၢင်ႈႁဵတ်းၵမ်ၵျၢင်ႉ ၼႂ်းႁိူၼ်းၽြႃးပဵၼ်ၸဝ်ႈၸိူဝ်ႉၼင်ႇႁိုဝ်ၼၼ်ႉဢေႃႈ။ ႁိူၼ်းၸဝ်ႈၼၼ်ႉၸမ်ႉ၊ ပဵၼ်ၸိူဝ်းၸဝ်ႈၽြႃးပဵၼ်ၸဝ်ႈ ဢၼ်ဢသၢၵ်ႈလိပ်းယူႇဢေႃႈ။ ၸိူဝ်းၸဝ်ႈၼၼ်ႉၸမ်ႉ၊ ပဵၼ်သဝ်တီႈဢၼ်သမ်ႇမႃႇတြႃးဢိင်ယူႇဢေႃႈ။ ငဝ်ႈႁၢၵ်ႈတီႈဢၼ် သမ်ႇမႃႇတြႃးတႄႇယူႇၵေႃႈပဵၼ်ဢေႃႈ။-

16လွင်ႈတၢင်းဢၼ်လိုၵ်ႉဢၼ်လမ်ႇ တၢင်းဢၼ်ႁဵတ်းဝၢတ်ႈ ၵူဝ်းၵႂၢႆႇၵမ်ၵျၢင်ႉသၢင်ႈႁဵတ်းၼၼ်ႉ ပဵၼ်လွင်ႈတၢင်းဢၼ်ယႂ်ႇၼႃႇလူင်လၢင် ဝႃႈၼႆတီႈဢၼ်တၵ်းတွပ်ႇၵၼ်ထဵင်ၵၼ်ဢမ်ႇမီး။ မၼ်းၸဝ်ႈလႆႈၶၢမ်ႇတၢင်းဢၼ်ပေႃႇမႃး ၼႂ်းတူဝ်ၶၼ်ႇထႃႇယဝ်ႉ။ လႆႈၶၢမ်ႇတၢင်းဢၼ် တၢင်းသိုဝ်ႈတေႃႇမၼ်းၸဝ်ႈ ထၢင်ႇသႃးၵွပ်ႈပိူဝ်ႈ ဝီႉၺိၺ်ႇၸဝ်ႈၼၼ်ႉယဝ်ႉ။ လႆႈၶၢမ်ႇတၢင်းဢၼ်တမၢၼ်ႇၵၢင်ႁၢဝ်တင်းလၢႆ တူၺ်းႁၼ်ယဝ်ႉ။ လႆႈၶၢမ်ႇတၢင်းဢၼ်ႁေႃးလၢတ်ႈ ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆယဝ်ႉ။ လႆႈၶၢမ်ႇတၢင်းဢၼ် ၵူၼ်းလေႃးၵီႇတင်းလၢႆ ယုမ်ႇမၢတ်ႈယဝ်ႉ။ လႆႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ် ဢိၵ်ႇလူၺ်ႈၵၼ်တင်းမုၼ်ၵုင်ႇသရေႇယဝ်ႉ။

← Chapter 2 Jump to: Chapter 4 →