1 Timothy 5

Shan

← Chapter 4 Jump to: Chapter 6 →

1ယႃႇပေသင်ႇသွၼ်သုင်းမႃႉ တီႈၵေႃႉဢၼ်ဢသၢၵ်ႈယႂ်ႇၼၼ်ႉၼႃႇလူင်လၢင်။ မၢတ်ႈမၼ်းပဵၼ်ၸိူဝ်ႉၼင်ႇပေႃႈၼၼ်ႉသေလႄႈ တွင်းပၢၼ်ႇဢဝ်တႃႉ။ မၢတ်ႈၽူႈမၢဝ်ႇတင်းလၢႆ ပဵၼ်ၸိူဝ်ႉၼင်ႇၼွင်ႉၸၢႆး၊-

2မၢတ်ႈမႄႈယိင်းဢၼ်ဢသၢၵ်ႈယႂ်ႇတင်းလၢႆ ပဵၼ်ၸိူဝ်ႉၼင်ႇမႄႈ၊ မီးတင်းတၢင်းဢၼ်ၶၢဝ်ၸၢင်ႇ ၼႃႇလူင်လၢင်၊ မၢတ်ႈၽူႈသၢဝ်ပဵၼ်ၸိူဝ်ႉၼင်ႇၼွင်ႉယိင်းသေလႄႈ တွင်းပၢၼ်ႇတႃႉ။-

3ၸွႆႈထႅမ်ႁဵတ်းလဵင်ႉႁဵတ်းလူၽူႈယိင်း ဢၼ်ပဵၼ်မႄႈမူၵ်းမႄႈမၢႆႈ ဢမၢၼ်ႇၶၼ်ပဵၼ်ၸိူဝ်းၼၼ်ႉတႃႉ။-

4ပေႃးပဵၼ်မႄႈမူၵ်းမႄႈမၢႆႈ ဢၼ်မီးလုၵ်ႈမီးလၢၼ်ၸိုင်၊ ႁႂ်ႈလုၵ်ႈလၢၼ်ၸိူဝ်းၼၼ်ႉ သွၼ်ဢဝ်ဢွၼ်တၢင်း ႁႂ်ႈၶဝ်လႆႈမၢတ်ႈတွင်းလွင်ႈဝၢတ်ႈၽြႃး၊ တၢင်းဢၼ်ပွင်ႁဵတ်းၼႃႈႁိူၼ်းတူဝ်ၸဝ်ႈၵဝ်ႇလႄႈ တွပ်ႇတႅၼ်းပၼ်ၵျေးၸူး တီႈပေႃႈမႄႈပူႇၼၢႆးၶဝ်ၼၼ်ႉတႃႉ။ လွင်ႈတၢင်းၼၼ်ႉ ပဵၼ်လွင်ႈတၢင်းဢၼ်ထုၵ်ႇၸႂ်ၽြႃးပဵၼ်ၸဝ်ႈဢေႃႈ။

5ၽူႈယိင်းဢၼ်ပဵၼ်မႄႈမူၵ်းမႄႈမၢႆႈ ဢမၢၼ်ႇၶၼ်ပဵၼ်လႄႈ ၵိုတ်းဝႆႉၵေႃႉလဵဝ်ၵူၺ်းၼၼ်ႉ ၸၢင်ႈဢိင်ပိုင်ႈၽြႃးပဵၼ်ၸဝ်ႈယူႇ သေလႄႈ တႄႇယူႇၼႂ်းတၢင်းဢၼ်ႁဵတ်းသူးတွင်းပထၼႃႇ ၵူႈဝၼ်းၵူႈၶိုၼ်းဢေႃႈ။-

6ၵေႃႉဢၼ်မူၼ်ႈပျေႃႇၼႂ်းၸေးၸိမ်ႇၵႃႇမၵုင်ႇၼၼ်ႉၸမ်ႉ၊ မီးဢသၢၵ်ႈယူႇသေၵေႃႈ ပဵၼ်ဢၼ်တၢႆဢေႃႈ။-

7ဝႆႉပိင်းၺၢပ်ႈၸိူဝ်ႉၼင်ႇၼႆႁႂ်ႈၶဝ်ၼၼ်ႉ လႆႈၵၢင်းလွတ်ႈတင်းတီႈဢၼ်တၢင်ႇဢပႅတ်ႈတႃႉ။-

8ၵေႃႉဢၼ်ဢမ်ႇလူဢမ်ႇတူၺ်းၵူၼ်းတူဝ်ၸဝ်ႈၵဝ်ႇတင်းလၢႆ၊ လိူဝ်သေၼၼ်ႉဢမ်ႇၵႃး၊ ဢမ်ႇလူဢမ်ႇတူၺ်းၵူၼ်းႁိူၼ်းၵူၼ်းယေးတူဝ်ၸဝ်ႈၵဝ်ႇၸိူဝ်းၼၼ်ႉၸမ်ႉ၊ ထဵင်ပႅတ်ႈတြႃးတၢင်းဢၼ်ယုမ်ႇမၢတ်ႈဢေႃႈ။ ယဵင်ႈၶႅၼ်းယုတ်ႈယွမ်းၼႃႇသေၵေႃႉဢၼ်ဢမ်ႇတွၼ်ႉယုမ်ႇမၢတ်ႈၼၼ်ႉဢေႃႈ။

9ပေႃးမႄႈမူၵ်းမႄႈမၢႆႈဢသၢၵ်ႈဢမ်ႇပႆႇလႆႈႁူၵ်းသိပ်းပီႊၸိုင် ယႃႇပေႁႂ်ႈမၼ်းၶဝ်ႈၼႂ်းၸရၢင်း။-

10ပေႃးပဵၼ်ၵေႃႉဢၼ်ယၢမ်ႈမီးၽူဝ်ၵေႃႉလဵဝ်၊ ၵေႃႉဢၼ်မီးသရေႇလႄႈၵမ်ၵျၢင်ႉ တၢင်းၵမ်တၢင်းၵျၢင်ႉဢၼ်လီဢၼ်ငၢမ်း၊ ၵေႃႉဢၼ်ယၢမ်ႈႁဵတ်းတၢင်းဢၼ်လဵင်ႉဢၼ်လူလုၵ်ႈဢွၼ်ႇ၊ တၢင်းဢၼ်ႁဵတ်းဝၢတ်ႈၶႅၵ်ႇ၊ တၢင်းဢၼ်သုၵ်ႈတိၼ်ၵူၼ်းမူတ်းၸၢင်ႇတင်းလၢႆ၊ တၢင်းဢၼ်ႁဵတ်းလဵင်ႉႁဵတ်းလူၶဝ်ၸိူဝ်းဢၼ်ယၢၵ်ႈဢၼ်ၽၢၼ်၊ တၢင်းဢၼ်ၵျူဝ်းၸႃးႁဵတ်းလွင်ႈတၢင်းဢၼ်လီဢၼ်ငၢမ်းၵႃႈမီး ၵူႈၸိူဝ်ႉၵူႈပိူင်ၸိူဝ်းၼႆႉၸိုင်၊ ႁႂ်ႈမၼ်းၶဝ်ႈၼႂ်းၸရၢင်းသေ။

11ပႄႇဝႆႉမႄႈမူၵ်းမႄႈမၢႆႈ ၸိူဝ်းဢၼ်ဢသၢၵ်ႈယင်းလဵၵ်ႉယင်းၼုမ်ႇၼၼ်ႉတႃႉ။ လွင်ႈမၼ်းၸမ်ႉ ၶဝ်ၼၼ်ႉ မိူဝ်ႈဢၼ်ဢမ်ႇယိူၼ်ႉၶၢမ်ႇတၢင်းဢၼ်ၸဝ်ႈၶရိၸ်ႈသင်ႇသွၼ်သုင်းမႃႉၼၼ်ႉၸိုင်၊ မီးဢလူဝ်ႇၶႂ်ႈပဵၼ်ႁိူၼ်းပဵၼ်ယေးလႄႈ၊-

12ႁွတ်ႈတၢင်းဢၼ်ထုၵ်ႇဢပႅတ်ႈ ၵွပ်ႈပိူဝ်ႈဢၼ်ယႃႉသဵတ်ႈၸႃႇ ဢၼ်မီးဝႆႉမိူဝ်ႈဢွၼ်တၢင်းၼၼ်ႉဢေႃႈ။-

13လိူဝ်သေၼၼ်ႉ၊ ၶဝ်လႄႇၵႂႃႇႁိူၼ်းၼိုင်ႈယဝ်ႉႁိူၼ်းၼိုင်ႈလႄႈ ၸၢင်ႈၶၢၼ်ႉၸၢင်ႈဢိူၼ်ဢေႃႈ။ ၶၢၼ်ႉဢိူၼ်ၵူၺ်းဢမ်ႇၵႃး၊ ၸၢင်ႈပဵၼ်ၵေႃႉဢၼ်သူပ်းၼမ်ၵႂၢမ်းၼမ်ၼႃႇလူင်လၢင်လႄႈ လၢတ်ႈလွင်ႈတၢင်းဢၼ်ၶဝ် ဢမ်ႇထုၵ်ႇလီလၢတ်ႈၼၼ်ႉယူႇသေလႄႈ လေႃးလႄး ၼႂ်းလွင်ႈတၢင်းဢၼ် ဢမ်ႇၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉဢေႃႈ။

14ပိူဝ်ႈၼႆလႄႈ ၵဝ်မီးဢလူဝ်ႇၶႂ်ႈႁႂ်ႈမႄႈမူၵ်းမႄႈမၢႆႈ ၸႃႉဢၼ်ဢသၢၵ်ႈယင်းလဵၵ်ႉယင်းၼုမ်ႇၼၼ်ႉ ႁဵတ်းတၢင်းဢၼ်ပဵၼ်ႁိူၼ်း ပဵၼ်ယေး၊ တၢင်းဢၼ်လဵင်ႉလုၵ်ႈလဵင်ႉလၢင်း၊ တၢင်းဢၼ်လူတူၺ်းၼႃႈႁိူၼ်း၊ တၢင်းဢၼ်ယင်းဢမ်ႇပၼ်ဢၶႂၢင်ႉဢၼ်လႆႈသႄႉသွမ်း တီႈရၢၼ်ႇသူႇလႄႈယူႇၼၼ်ႉဢေႃႈ။-

15လွင်ႈမၼ်းၸမ်ႉ၊ တေႃႈလဵဝ်ၼႆႉၵမ်ႈၽွင်ႈပိူင်ႈတၢင်းၵႂႃႇလႄႈၸွမ်းပႃႈလင် ၸႃႇတၢၼ်ႇ ယဝ်ႉ။

16ပေႃးၽူႈၸၢႆးၽူႈယိင်းဢၼ်ယုမ်ႇမၢတ်ႈၼၼ်ႉ မီးမႄႈမူၵ်းမႄႈမၢႆႈၸိုင်၊ ႁႂ်ႈတူဝ်ၶဝ်ႁဵတ်းလဵင်ႉႁဵတ်းလူသေ။ ၼင်ႇႁိုဝ် ၸိူဝ်းၸဝ်ႈတၵ်းလႆႈႁဵတ်းလဵင်ႉႁဵတ်းလူတီႈၶဝ်ၸိူဝ်းဢၼ်ပဵၼ်မႄႈမူၵ်းမႄႈမၢႆႈ ဢမၢၼ်ႇၶၼ်ပဵၼ်ၼၼ်ႉၵူၺ်းၸိုင်၊ ယႃႇပေႁႂ်ႈၸိူဝ်းၸဝ်ႈ လႆႈၶၢမ်ႇတၢင်းဢၼ်ယႃႉယူၵ်ႉ။

17မၢတ်ႈၵူၼ်းဢုပ်ႉၸိူဝ်းၸဝ်ႈ ဢၼ်ဢုပ်ႉလီလီငၢမ်းငၢမ်းၸိူဝ်းၼၼ်ႉ ပဵၼ်ၵေႃႉဢၼ်ထိူၵ်ႈၶၢမ်ႇဢဝ် တၢင်းလူႇတၢင်းတၢၼ်း သွင်ပုၼ်ႈလႄႈ ၶဝ်ၸိူဝ်းဢၼ်ၵျူဝ်းၸႃး ႁဵတ်းဢမူႉတၢင်းဢၼ်ႁေႃးလၢတ်ႈတြႃး၊ တၢင်းဢၼ်သင်ႇသွၼ်သုင်းမႃႉပၼ်ၼၼ်ႉ ပဵၼ်ၵေႃႉဢၼ်ယဵင်ႈၶႅၼ်း ထိူၵ်ႈၶၢမ်ႇဢဝ်တၢင်းလူႇတၢင်းတၢၼ်း သွင်ပုၼ်ႈၼၼ်ႉဝႆႉတႃႉ။-

18လွင်ႈမၼ်းၸမ်ႉ၊ ၵျၢမ်းလိၵ်ႈမႃးလႄႈဝႃႈ၊ ဢမ်ႇလႆႈမတ်ႉသူပ်းဝူဝ်း ဢၼ်ယဵပ်ႇၶဝ်ႈၼူတ်ႈၶဝ်ႈၼၼ်ႉဝႆႉ၊ ဝႃႈၼင်ႇၼႆဢေႃႈ။ ဢၼ်မႃး ထႅင်ႈၵမ်းၼိုင်ႈလႄႈဝႃႈၸမ်ႉ၊ ၵေႃႉဢၼ်သၢင်ႈႁဵတ်းၼၼ်ႉထိူၵ်ႈၶၢမ်ႇဢဝ် ၵႃႈမၼ်းၶၼ်မၼ်းဢေႃႈ၊ ဝႃႈၼင်ႇၼႆဢေႃႈ။

19ပေႃးဢမ်ႇမီးၵေႃႉဢၼ်ၶၢမ်ႇသၢၵ်ႈသေႇ သွင်ၵေႃႉသၢမ်ၵေႃႉၸိုင်၊ ယႃႇပေထွမ်ႇဢဝ်ၵႂၢမ်းဢၼ်တၢင်ႇဢပႅတ်ႈ ၵႃႈၼိူဝ်ၵူၼ်း ဢၼ်ဢုပ်ႉၸိူဝ်းၸဝ်ႈ။-

20တၢင်ႇဢပႅတ်ႈတီႈၶဝ်ၸိူဝ်းဢၼ် မီးဢပႅတ်ႈၼၼ်ႉလႄႈ သင်ႇသွၼ်သုင်းမႃႉၵႃႈတီႈၽၢႆႇၼႃႈၵူၼ်း တင်းသဵင်ႈတင်းလူင် ႁႂ်ႈၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉ လႆႈၵူဝ်လႆႈႁႄတႃႉ။

21ၼင်ႇႁိုဝ်မႂ်းယင်းဢမ်ႇၸီႇယၢင်ႇဢွၼ်တၢင်း၊ ယင်းဢမ်ႇမီးၸႂ်ဢၼ်တူၺ်းၼႃႈလဵၵ်ႉတႃတႅမ်ႇ လႃးလႃးသေလႄႈႁဵတ်း လႄႈတၵ်းပႂ်ႉပိင်းၺၢပ်ႈၸိူဝ်းၼႆႉယူႇၸိုင်၊ ၵဝ်ပၼ်သဵတ်ႈၸႃႇတီႈမႂ်း ၵႃႈတီႈၽၢႆႇၼႃႈၽြႃးပဵၼ်ၸဝ်ႈ ဢိၵ်ႇတင်း ယေႇသူႉၶရိၸ်ႈ တင်း တမၢၼ်ႇၵၢင်ႁၢဝ် ဢၼ်မၼ်းၸဝ်ႈလိူၵ်ႈၵဵပ်းဝႆႉၸိူဝ်းၼၼ်ႉဢေႃႈ။

22ၵႃႈၼိူဝ်ၽူႈလႂ်သေဢမ်ႇဝႃႈ၊ ယႃႇပေဢဝ်မိုဝ်းတၢင်ႇၶၼ်ၶၼ်ၽႂ်းၽႂ်း။ ယႃႇပေသိူၵ်ႈသမ်ႇၵႃႈၼႂ်းဢပႅတ်ႈပိူၼ်ႈတၢင်ႇၵေႃႉ၊ ႁႂ်ႈတူဝ်ၸဝ်ႈၵဝ်ႇ ၶၢဝ်ၸၢင်ႇတႃႉ။

23ၸႃႉၸဵမ်တေႃႈလဵဝ်ၼႆႉ ယင်းဢမ်ႇၵိၼ်ၼမ်ႉလႄႈသုင်းသွင်ႇၼမ်ႉၸပိတ်ႈဢိတ်းဢွၼ်ႇၼိုင်ႈ ၵွပ်ႈပိူဝ်ႈႁူဝ်ဢူၵ်းမႂ်းဢိၵ်ႇတင်း ၵွပ်ႈပိူဝ်ႈ တၢင်းၶႆႈတၢင်းပဵၼ် ဢၼ်ဢမ်ႇႁိုင်ဢမ်ႇၼၢၼ်း မႂ်းလႆႈၶၢမ်ႇၼၼ်ႉတႃႉ။

24တူႉၸရိူၵ်ႈၵူၼ်းၵမ်ႈၽွင်ႈ ထၢင်ႇသႃးၸႃႉၸဵမ်မိူဝ်ႈဢွၼ်ၼႆႉလႄႈ ၸၢင်ႈၵႂႃႇၸူးၵႃႈတီႈတၢင်းဢၼ်ၸီႇယၢင်ႇဢပႅတ်ႈၼၼ်ႉ ဢွၼ်တၢင်း ဢေႃႈ။ တူႉၸရိူၵ်ႈၵူၼ်းၵမ်ႈၽွင်ႈၸၢင်ႈၸွမ်းၽၢႆႇလင်ဢေႃႈ။-

25မိူၼ်ၸိူဝ်ႉၼင်ႇၼၼ်၊ သူႉၸရိူၵ်ႈၵူၼ်းၵမ်ႈၽွင်ႈ ၸၢင်ႈထၢင်ႇသႃးဝႆႉထႃႈဢေႃႈ။ သူႉၸရိူၵ်ႈဢၼ်ဢမ်ႇပႆႇထၢင်ႇသႃးၵေႃႈ ဢမ်ႇသိူင်ႇဢမ်ႇမႅပ်ႉဝႆႉလႆႈ။

← Chapter 4 Jump to: Chapter 6 →