1 Timothy 6

Shan

← Chapter 5 Jump to:

1ၼင်ႇႁိုဝ်ၼႃႇမႃႉၸိုဝ်ႈသဵင် ၽြႃးပဵၼ်ၸဝ်ႈဢိၵ်ႇတင်းတြႃးၸဝ်ႈ တၵ်းၵၢင်းလွတ်ႈတင်း တၢင်းဢၼ်သႄႉသွမ်းၸိုင်၊ ႁႂ်ႈၶႃႈဢၼ်ၶၢမ်ႇတၢင်းၸႂ်ႉတၢင်းသွႆၵႃႈမီး မၢတ်ႈၸဝ်ႈၶဝ် ပဵၼ်ၵေႃႉဢၼ်ထိူၵ်ႈရူဝ်ႇသေႇၵူဝ်ယမ်ၼႃႇလူင်လၢင်တႃႉ။-

2ပေႃးၸဝ်ႈၶဝ်ပဵၼ်ၵေႃႉဢၼ်ယုမ်ႇမၢတ်ႈၸိုင် ယႃႇပေႁႂ်ႈၶဝ်မီးတၢင်းၸႂ်ဢၼ်ထၢင်ႇပဵၼ် ပီႈၼွင်ႉၵၼ်လႄႈ ႁဵတ်းဢမ်ႇပေႃးၼင်ႇႁိုဝ်။ ႁႂ်ႈၶဝ်ယဵင်ႈၶႅၼ်းၶၢမ်ႇတၢင်းဢၼ်ၸႂ်ႉဢၼ်သွႆ ၵွပ်ႈပိူဝ်ႈဢၼ်ၵေႃႉဢၼ်လႆႈၶၢမ်ႇဢဝ် ဢၵျူဝ်းတၢင်းဢၼ်လႆႈၸႂ်ႉလႆႈသွႆၼၼ်ႉ ပဵၼ်ၵေႃႉဢၼ် ယုမ်ႇမၢတ်ႈ၊ ၵေႃႉဢၼ်ထုၵ်ႇလီႁၵ်ႉလီပႅင်းၼၼ်ႉသေ။ သင်ႇသွၼ်သုင်းမႃႉပၼ် ၸိူဝ်ႉၼင်ႇၼႆလႄႈ တိုၵ်းယူင်းၸူဝ်း ဢဝ်တႃႉ။

3ၵေႃႉဢၼ်သင်ႇသွၼ်ပၼ်ဢေႃးဝႃႇတႃႉ ဢၼ်ပႅၵ်ႇဢၼ်ပိူင်ႈလႄႈ ဢမ်ႇႁပ်ႉတုင်းဢဝ်ၵႂၢမ်းဢၼ်ၶၢဝ်ၸၢင်ႇ ဢၼ်ဝႃႈ ၵႂၢမ်းၸဝ်ႈႁဝ်း ယေႇသူႉၶရိၸ်ႈ ဢိၵ်ႇတင်း ဢေႃးဝႃႇတႃႉဢၼ်မႅၼ်ႈၼင်ႇ တၢင်းဢၼ်မူၼ်ႈပျေႃႇၼႂ်းဝၢတ်ႈၽြႃးၼၼ်ႉၸမ်ႉ၊-

4မဝ်းလဝ်ႈတင်းမႃႇၼႃႉၸႂ်သုင်လႄႈ ဢမ်ႇႁူႉၵႃႈသင်လႃးလႃး။ ပဵၼ်ၵေႃႉဢၼ်ၸႂ်မဝ်မၢင် ၵွပ်ႈပိူဝ်ႈဢၼ်မၼ်းတိူင်ႇပၢင်ႇ လွင်ႈပုၵ်ႈသႃႇတီႈတွင်ႈတီႈထၢမ်လႄႈ တွပ်ႇထဵင်ၵၼ် ၵွပ်ႈပိူဝ်ႈၵႂၢမ်းၼၼ်ႉယူႇဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၸၢင်ႈပဵၼ်တၢင်းဢၼ် သီႈၵေႉ၊ တၢင်းဢၼ်ၽိတ်းၵၼ်၊ တၢင်းဢၼ်ယႃႉသရေႇ၊ တၢင်းဢၼ်ၵျၢမ်ႇပွင်ဢၼ်ဢမ်ႇၼႃႇလူဝ်ႇ၊-

5တၢင်းဢၼ်ၶဝ်ၸိူဝ်းဢၼ် ႁူဝ်ၸႂ်လႆႈတူႇၼဝ်ႈၵႂႃႇလႄႈ ၵၢင်းလွတ်ႈတင်းသမ်ႇမႃႇတြႃးၼၼ်ႉ တိူင်ႇပၢင်ႇလၢႆလၢႆဢမ်ႇပွင်ႇလွင်ႈ ၼၼ်ႉဢေႃႈ။ ၶဝ်ၼၼ်ႉထၢင်ႇတၢင်းဢၼ် မူၼ်ႈပျေႃႇၼႂ်းဝၢတ်ႈၽြႃးၼၼ်ႉ ပဵၼ်ဢၵျူဝ်းၸီးပႂႃးဢေႃႈ။-

6ပေႃးပႃးၸႂ်ဢၼ်ဢိမ်ႇၸႂ်ၼိမ်ၸႂ်ၸိုင်၊ တၢင်းဢၼ်မူၼ်ႈပျေႃႇၼႂ်းဝၢတ်ႈၽြႃးၼၼ်ႉ ပဵၼ်ဢၵျူဝ်းၸီးပႂႃးဢၼ်ယႂ်ႇၼႃႇ လူင်လၢင်ဢေႃႈ။-

7လွင်ႈမၼ်းၸမ်ႉ လွင်ႈဢၼ်ႁဝ်းဢမ်ႇပႃးၵႃႈသင်မႃးၼႂ်းလေႃးၵႃႉၼႆႉလႄႈ၊ ပေႃးဢွၵ်ႇၵႂႃႇၵေႃႈ ဢမ်ႇဢဝ်ၵႃႈသင်ဢွၵ်ႇၵႂႃႇၼၼ်ႉ ထၢင်ႇသႃးယူႇဢေႃႈ။-

8ၵွပ်ႈႁွႆးၼႆႉလႄႈ ပေႃးမီးတၢင်းၵိၼ်တၢင်းၼုင်ႈၸိုင်၊ မီးၸႂ်ဢၼ်ဢိမ်ႇၸႂ်ၼိမ်ၸႂ်တႃႉႁဝ်း။-

9ၶဝ်ၸိူဝ်းဢၼ်မီးဢလူဝ်ႇ ၶႂ်ႈမၢၵ်ႈၶႂ်ႈမီးၼၼ်ႉ ၸၢင်ႈတူၵ်းႁွတ်ႈ ၵႃႈၼႂ်းတၢင်းဢၼ်ဢပႅတ်ႈၸူဝ်းၵႂႃႇၸူဝ်းပႆ၊ တၢင်းဢၼ်တီႉၵမ်လႆႈ၊ တၢင်းဢၼ်ၸႂ်ၸပ်းၸႂ်ၸွႆး ဢၼ်မိူၵ်ႈလူႉလႅဝ်ၼမ်ၼႃႇ ၸိူဝ်းၼၼ်ႉဢေႃႈ။ လွင်ႈတၢင်းၸိူဝ်ႉၼင်ႇၼၼ်ၼၼ်ႉ ၸၢင်ႈဢဝ်ၵူၼ်းတင်းလၢႆ တူၵ်းၸူမ်ၵႃႈၼႂ်းတၢင်းဢၼ်ဢမ်ႇမီးဢၵျူဝ်း၊ တၢင်းဢၼ်လူႉလႅဝ်ၸိူဝ်းၼၼ်ႉဢေႃႈ။-

10လွင်ႈမၼ်းၸမ်ႉ တၢင်းဢၼ်ၸႂ်ၸပ်းၸႂ်ၸွႆးငိုၼ်းၸိုင် ပဵၼ်မူႇလႃႉငဝ်ႈႁၢၵ်ႈ ၼႂ်းလွင်ႈတၢင်းဢၼ်ဢမ်ႇလီဢမ်ႇငၢမ်း တင်းသဵင်ႈတင်းလူင်ဢေႃႈ။ ၵူၼ်းၵမ်ႈၽွင်ႈပိူဝ်ႈဢၼ်ၸႂ်ၸပ်းၸႂ်ၸွႆး ၸိူဝ်ႉၼင်ႇၼၼ်လႄႈ ပိူင်ႈသဵၼ်ႈတၢင်းတြႃးတၢင်းဢၼ်ယုမ်ႇမၢတ်ႈၼၼ်ႉၵႂႃႇလႄႈ ဢဝ်တင်းဝူၺ်ႇတၼႃႇ တၢင်းဢၼ်မႆႈၸႂ်ယၢပ်ႇၸႂ်ၼမ်ၼႃႇ သဵပ်ႇတႅင်းတူဝ်ၸဝ်ႈၵဝ်ႇလႄႈ ႁႂ်ႈလူင်ႉႁႂ်ႈပွင်ႇယဝ်ႉ။

11ပိူဝ်ႈၼႆလႄႈ မႂ်းဢၼ်ပဵၼ်ၵူၼ်းၽြႃးပဵၼ်ၸဝ်ႈၼႆႉဢိူၺ်း၊ ဝႄႈပႅတ်ႈဢပႅတ်ႈၸိူဝ်းၼၼ်ႉတႃႉ။ ၸွမ်းႁႂ်ႈၶိုတ်းတၢင်းဢၼ်ၵမ်ၵျၢင်ႉဢၼ်သိုဝ်ႈတေႃႇ၊ တၢင်းဢၼ်မူၼ်ႈပျေႃႇၼႂ်းဝၢတ်ႈၽြႃး၊ တၢင်းဢၼ်ယုမ်ႇမၢတ်ႈ၊ တၢင်းဢၼ်ႁၵ်ႉပႅင်း၊ တၢင်းဢၼ်ယိူၼ်ႉၶၢမ်ႇ၊ တၢင်းဢၼ်ၼိမ်သိမ်ႇဢူၼ်ႈဢွၼ်ႇၸိူဝ်းၼၼ်ႉတႃႉ။-

12ႁဵတ်းတၢင်းဢၼ်တိုၵ်းတေႃး ဢၼ်လီဢၼ်ငၢမ်းလႄႈ ၸၢပ်ႈသႅင်ႇၵၼ်တင်း တၢင်းဢၼ်ယုမ်ႇမၢတ်ႈၼၼ်ႉတႃႉ။ ယိပ်းၵမ်ဢဝ်ထႃႇဝရႃႉဢသၢၵ်ႈတႃႉ။ ၼင်ႇႁိုဝ်တၵ်းလႆႈဢသၢၵ်ႈၼၼ်ႉၸိုင်၊ မႂ်းၶၢမ်ႇဢဝ်တၢင်းဢၼ်မၼ်းၸဝ်ႈ ႁွင်ႉဢဝ်ၼၼ်ႉလႄႈ ႁပ်ႉတုင်းဢဝ်ၵႃႈတီႈၽၢႆႇၼႃႈၵူၼ်းၶၢမ်ႇသၢၵ်ႈသေႇ ဢၼ်ၼမ်ၼႃႇၼၼ်ႉလီလီငၢမ်းငၢမ်းယဝ်ႉ။

13ၵဝ်ဝႆႉပိင်းၺၢပ်ႈတီႈမႂ်း ၵႃႈတီႈၽၢႆႇၼႃႈၽြႃးပဵၼ်ၸဝ်ႈ ဢၼ်ၸၢင်ႈႁႂ်ႈၵႃႈမီးတင်းသဵင်ႈတင်းလူင် ဢသၢၵ်ႈလိပ်းဢိၵ်ႇတင်းၵႃႈတီႈၽၢႆႇၼႃႈ ယေႇသူႉၶရိၸ်ႈ ဢၼ်ၶၢမ်ႇသၢၵ်ႈသေႇ ၽၢႆႇတၢင်းဢၼ်ႁပ်ႉတုင်းဢဝ် ဢၼ်လီဢၼ်ငၢမ်းၵႃႈတီႈ ပွၼ်ႇတီႉပီႉလတ်ႉ ၼၼ်ႉ၊-

14ႁႂ်ႈမႂ်းလႆႈၵၢင်းလွတ်ႈတင်းတၢင်းဢၼ်ၵူဝ်ႈဢၼ်ၵိူၵ်ႇ ဢိၵ်ႇတင်းဢၶႂၢင်ႉတီႈတၵ်းတၢင်ႇဢပႅတ်ႈၼၼ်ႉလႄႈ ပႂ်ႉၵမ်ပႂ်ႉၸွမ်းပိင်းၺၢပ်ႈ ၸဝ်ႈတေႃႇထိုင်ႁွတ်ႈ တၢင်းဢၼ်ၸဝ်ႈႁဝ်း ယေႇသူႉၶရိၸ်ႈ တၵ်းပေႃႇမႃး၊-

15ဢၼ်ဝႃႈၸဝ်ႈဢၼ်ပဵၼ်ၸဝ်ႈသူႇလဵဝ်ပႃးလဵဝ်ၵူၺ်း ဢၼ်မီးမင်ႇၵလႃႇ၊ ၶုၼ်ႁေႃၶမ်းၼိူဝ်ၶုၼ်ႁေႃၶမ်း ၵႃႈမီးတင်းသဵင်ႈတင်းလူင်၊ ၸဝ်ႈၼိူဝ်ၸဝ်ႈ ၵႃႈမီးတင်းသဵင်ႈတင်းလူင်၊-

16ဢၼ်ပဵၼ်ၸဝ်ႈသူႇလဵဝ်ပႃးလဵဝ်ၵူၺ်းလႄႈ ၵၢင်းလွတ်ႈတၢင်းမရၼႃႉ၊ ဢၼ်ယူႇၵႃႈၼႂ်းဢၼ်လႅင်း၊ ဢၼ်ၽူႈလႂ် ဢမ်ႇသုတ်ႉဢမ်ႇၸမ်လႆႈ၊ ဢၼ်ၽူႈလႂ်ဢမ်ႇတွၼ်ႉႁၼ်၊ ဢၼ်ၽူႈလႂ်ဢမ်ႇႁၼ်လႆႈၼၼ်ႉ တၵ်းၼႄပျႃးၼႂ်းမိူဝ်ႈဢၼ် ၶိင်ႇၵႃႇလႃႉမၼ်းၸဝ်ႈ ႁွတ်ႈထိုင်ၼၼ်ႉဢေႃႈ။ ႁႂ်ႈမၼ်းၸဝ်ႈၼၼ်ႉ မီးမုၼ်သရေႇဢႃႇၼူႉၽေႃႇ ထႃႇဝရႃႉသေၵမ်းလူၺ်ႈ။ ဢႃႇမိၼ်ႇ။

17ဝႆႉပိင်းၺၢပ်ႈတီႈၶဝ်ၸိူဝ်းဢၼ် ၸၢင်ႈမၢၵ်ႈၸၢင်ႈမီးၼႂ်းလေႃးၵႃႉၼႆႉ ႁႂ်ႈၶဝ်လႆႈၵၢင်းလွတ်ႈတင်းမႃႇၼႃႉ ၸႂ်ဢၼ်သုင်လႄႈ ယင်းဢမ်ႇဢိင်ပိုင်ႈၸေးၸိမ်ႇ ဢၼ်ဢမ်ႇမၼ်ႈဢမ်ႇၶိူင်ႇၼၼ်ႉလႄႈ ဢိင်ပိုင်ႈၽြႃးပဵၼ်ၸဝ်ႈ ဢၼ်ဢဵတ်းလူပၼ်တင်းသဵင်ႈတင်းလူင် ၼမ်ၵိုၼ်းၼႃႇလူင်လၢင် ပုၼ်ႈဢၼ်ႁဝ်းတၵ်းၸၢမ်ႇၸႃးၼၼ်ႉ၊-

18ဢိၵ်ႇတင်းႁႂ်ႈလႆႈႁဵတ်းတၢင်းဢၼ် ႁဵတ်းၵျေးၸူးတီႈပိူၼ်ႈ၊ တၢင်းဢၼ်ပျေႉၸုမ်ႇၼမ်ၵိုၼ်း ၼႂ်းတၢင်းၵမ်တၢင်းၵျၢင်ႉဢၼ်လီဢၼ်ငၢမ်း၊ တၢင်းဢၼ်မီးၸႂ်ၸေႇတၼႃႇ ဢၼ်ၶႂ်ႈယိုၼ်ႈၶႂ်ႈပၼ်၊ တၢင်းဢၼ်ၵေႃႉၼိုင်ႈလႄႈၵေႃႉၼိုင်ႈ သိူၵ်ႈသမ်ႇႁူမ်ႈပွင်းၵၼ်၊-

19တၢင်းဢၼ်သိမ်းဝႆႉၽၼ်ႇတႃႇ ဢၼ်လီဢၼ်ငၢမ်း ပုၼ်ႈတူဝ်ၸဝ်ႈၵဝ်ႇ ၼႂ်းၸၢတ်ႈၼႃႈ ႁႂ်ႈလႆႈၶဝ်ႈၸၢမ်ႇၸႃး ဢသၢၵ်ႈဢၼ်ၸိုဝ်ႈဢၼ်ၸႂ်ႈၼၼ်ႉတႃႉ။

20ဢူဝ်း တီႉမေႃးသေႇ ၊ ပႂ်ႉၵမ်ပႂ်ႉၸွမ်းလွင်ႈတၢင်းဢၼ် ဢၢပ်ႈဝႆႉတီႈမႂ်းၼၼ်ႉတႃႉ။ ဝႄႈပႅတ်ႈတၢင်းဢၼ်လၢတ်ႈၵႂၢမ်းဢၼ်လၢႆလၢႆ ဢၼ်ဢမ်ႇ ၶဝ်ႈၼႂ်းတြႃး ဢိၵ်ႇတင်း တၢင်းဢၼ်ဢတၢတ်ႈပိင်ႇၺႃႇ ဢၼ်ပဵၼ် ဢတၢတ်ႈပိင်ႇၺႃႇ ဢၼ်ႁွင်ႉၽိတ်းႁွင်ႉပိူင်ႈၼၼ်ႉ ႁႄႉၶႅၼ် ယႃႉယူၵ်ႉၼၼ်ႉတႃႉ။-

21ၵူၼ်းၵမ်ႈၽွင်ႈႁပ်ႉတုင်းဢဝ် ဢတၢတ်ႈပိင်ႇၺႃႇၼၼ်ႉသေယဝ်ႉ ပိူင်ႈသဵၼ်ႈတၢင်းတြႃးတၢင်းဢၼ်ယုမ်ႇမၢတ်ႈၵႂႃႇယဝ်ႉဢေႃႈ။ ႁႂ်ႈၵျေးၸူးၸဝ်ႈ မီးၼိူဝ်သူသေၵမ်းလူၺ်ႈ။ ဢႃႇမိၼ်ႇ။ လိၵ်ႈဢေႃးဝႃႇတႃႉတီႉမေႃးသေႇ ၽိုၼ်ပထမႃႉယဝ်ႉယဝ်ႉဢေႃႈ။

← Chapter 5 Jump to: