1 Timothy 4

Shan

← Chapter 3 Jump to: Chapter 5 →

1ဝီႉၺိၺ်ႇၸဝ်ႈ ဝႆႉပျႃႇတိၵ်ႈလႅင်းလႅင်းၸမ်ႉ၊ ၼႂ်းၶိင်ႇၵႃႇလႃႉၵမ်းလိုၼ်းပုၼ်ႉ၊ ၵူၼ်းၵမ်ႈၽွင်ႈတၵ်းပႅတ်ႈဝႆႉ တၢင်းဢၼ်ယုမ်ႇမၢတ်ႈသေလႄႈ ဢိင်ပိုင်ႈၸႂ်ဝီႉၺိၺ်ႇဢၼ်ၸၢင်ႈပႅတ်ႉၸၢင်ႈလႅၼ် ဢိၵ်ႇတင်း ဢေႃးဝႃႇတႃႉတင်းလၢႆ ဢၼ်ၸၢပ်ႈသႅင်ႇၵၼ်တင်းၽီၼၼ်ႉ၊-

2ၵွပ်ႈပိူဝ်ႈတၢင်းဢၼ် ၸၢင်ႈထိမ်ႇၸၢင်ႈမႅပ်းၶဝ်ၸိူဝ်းဢၼ် ၸႂ်ဢၼ်ႁူႉတူဝ်ၸဝ်ႈၵဝ်ႇၼၼ်ႉ လႆႈၶၢမ်ႇတၢင်းဢၼ် ဢဝ်လဵၵ်းမႆႈ ၸမ်ႈသႂ်ႇ သေယဝ်ႉၸင်ႇ လၢတ်ႈမူႉသႃႇၼၼ်ႉဢေႃႈ။-

3ၶဝ်ၼၼ်ႉတၵ်းဝႆႉပိင်းၺၢပ်ႈလႄႈဝႃႈ၊ ဢမ်ႇလႆႈႁဵတ်းတၢင်းဢၼ်သွင်ႇမင်ႇၵလႃႇလႄႈ တၵ်းလႆႈၵမ်တၢင်းၵိၼ် ဢၼ်ၽြႃးပဵၼ်ၸဝ်ႈ ၽၢၼ်ႇသၢင်းႁဵတ်းပဵၼ်ဝႆႉပုၼ်ႈဢၼ် ၶဝ်ၸိူဝ်းဢၼ်ယုမ်ႇမၢတ်ႈလႄႈ ႁူႉသမ်ႇမႃႇတြႃးၼၼ်ႉ တၵ်းမီးတင်းၸႂ်ဢၼ်ႁူႉၵျေးၸူးၸဝ်ႈ သေလႄႈ သုင်းသွင်ႇဢေႃႈ၊ ဝႃႈၼင်ႇၼႆဢေႃႈ။-

4ၵႃႈဢၼ်ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ဝႆႉ တင်းသဵင်ႈတင်းလူင်ၼၼ်ႉၸိုင်၊ လီသုင်းလီသွင်ဢေႃႈ။ ပေႃးမီးတင်းၸႂ် ဢၼ်ႁူႉၵျေးၸူးၸဝ်ႈလႄႈၶၢမ်ႇဢဝ်ၸိုင်၊ ဢၼ်လႂ်သေဢမ်ႇဝႃႈ၊ ဢမ်ႇလႆႈဝႄႈလႆႈၵမ်။-

5လွင်ႈမၼ်းၸမ်ႉ လွင်ႈတၢင်းၵူႈၸိူဝ်ႉၵူႈပိူင် မူတ်းၸၢင်ႇၵွပ်ႈပိူဝ်ႈ ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈ ဢိၵ်ႇတင်းၵွပ်ႈပိူဝ်ႈ တၢင်းဢၼ်သူးတွင်းၼၼ်ႉယူႇဢေႃႈ။

6ပေႃးမႂ်းမွၵ်ႇလၢတ်ႈၵႂၢမ်းၸိူဝ်ႉၼင်ႇၼႆတီႈပီႈၼွင်ႉတင်းလၢႆၸိုင်၊ မႂ်းတၵ်းပဵၼ်ထမ်ႇမႃႉသြႃႇဢၼ်လီတီႈ ယေႇသူႉၶရိၸ်ႈ လႄႈ ၶၢမ်ႇတၢင်းဢၼ်လဵင်ႉၸႂ်လူၺ်ႈၵႂၢမ်း တၢင်းဢၼ်ယုမ်ႇမၢတ်ႈ ဢိၵ်ႇတင်းၵႂၢမ်းသမ်ႇမႃႇဢေႃးဝႃႇတႃႉ ဢၼ်တူဝ်ၸဝ်ႈၵဝ်ႇ ယၢမ်ႈၸပ်းၸွမ်းယူႇၼၼ်ႉဢေႃႈ။-

7ဝႄႈပႅတ်ႈၵႂၢမ်းတၢၼ်ႇတႃႇရီႇဢၼ်ဢမ်ႇၶဝ်ႈပႃးၼႂ်းတြႃးလႄႈ မႄႈယိင်းထဝ်ႈၸၢင်ႈလၢတ်ႈၼၼ်ႉသေလႄႈ ဢဝ်တင်းတၢင်းဢၼ် မူၼ်ႈပျေႃႇၼႂ်းဝၢတ်ႈၽြႃးၼၼ်ႉ သင်ႇသွၼ်တူဝ်ၸဝ်ႈၵဝ်ႇတႃႉ။-

8တၢင်းဢၼ်သင်ႇသွၼ်တူဝ်ၵႃႇယႃႉၸိုင်၊ ၸၢင်ႈပၼ်ဢၵျူဝ်းဢိတ်းဢွၼ်ႇၼိုင်ႈဢေႃႈ။ တၢင်းဢၼ် မူၼ်ႈပျေႃႇၼႂ်းဝၢတ်ႈၽြႃးၸမ်ႉ၊ ပိူဝ်ႈဢၼ်လႆႈၵတီႉဢၼ်ၸၢပ်ႈသႅင်ႇၵၼ်တင်းၸၢတ်ႈၼႆႉၸၢတ်ႈၼႃႈလႄႈ ၸၢင်ႈပၼ်ဢၵျူဝ်းၼႂ်းလွင်ႈတၢင်းၵူႈၸိူဝ်ႉၵူႈပိူင်ဢေႃႈ။-

9ၵႂၢမ်းဢၼ်ဝႃႈၸိူဝ်ႉၼင်ႇၼႆၼၼ်ႉၸိုင်၊ ပဵၼ်ၵႂၢမ်းသဵတ်ႈၸႃႇ၊ ၵႂၢမ်းဢၼ်ထုၵ်ႇလီႁပ်ႉတုင်းဢဝ်သဵင်ႈသဵင်ႈၵေႃႈပဵၼ်ဢေႃႈ။-

10ၵွပ်ႈႁွႆးၼႆႉလႄႈႁဝ်းပွင်ႁဵတ်းဢမူႉလွင်ႈတၢင်းဢၼ် ယၢပ်ႇၽိုတ်ႇၼႃႇလူင်လၢင် ၵွပ်ႈပိူဝ်ႈဢၼ်ႁဝ်းဢိင်ပိုင်ႈၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇလႄႈ ပဵၼ်ၸဝ်ႈဢၼ်ၵႄႇၶျွတ်ႈဢဝ်ၵူၼ်း တင်းသဵင်ႈတင်းလူင်ဢမ်ႇၵႃး၊ ပဵၼ်ၸဝ်ႈဢၼ်ယဵင်ႈၶႅၼ်း ၵႄႇၶျွတ်ႈဢဝ်ၶဝ်ၸိူဝ်းဢၼ်ယုမ်ႇမၢတ်ႈၼၼ်ႉဢေႃႈ။ တၢင်းဢၼ်သႄႉဢၼ်သွမ်းၵေႃႈ ႁဝ်းလႆႈၶၢမ်ႇဢေႃႈ။

11ဢဝ်လွင်ႈတၢင်းၸိူဝ်းၼႆႉဝႆႉပိင်းၺၢပ်ႈလႄႈ သင်ႇသွၼ်သုင်းမႃႉပၼ်တႃႉ။-

12ယႃႇပေႁႂ်ႈၽူႈလႂ်ႁဵတ်းဢမ်ႇပေႃးၼင်ႇႁိုဝ် တီႈလွင်ႈတၢင်းဢၼ် ဢသၢၵ်ႈမႂ်းယင်းၼုမ်ႇယင်းၵမ်ယူႇၼၼ်ႉ၊ ၼႄပျႃးပုင်ႇသၢၵ်ႈသေႇ ၼႂ်းတၢင်းဢၼ်လၢတ်ႈၵႂၢမ်း၊ တၢင်းဢၼ်သၢင်ႈႁဵတ်းၵမ်ၵျၢင်ႉ၊ တၢင်းဢၼ်ႁၵ်ႉပိူၼ်ႈ၊ တၢင်းဢၼ်ယုမ်ႇမၢတ်ႈ၊ တၢင်းဢၼ်ၶၢဝ်ၸၢင်ႇၼၼ်ႉ တီႈၶဝ်ၸိူဝ်းဢၼ်ယုမ်ႇမၢတ်ႈၼၼ်ႉတႃႉ။-

13တေႃႇထိုင်ႁွတ်ႈၸူဝ်ႈဢၼ်ၵဝ် ဢမ်ႇပႆႇမႃးၼၼ်ႉၸိုင်၊ ၵျူဝ်းၸႃးလႄႈႁဵတ်းတၢင်းဢၼ် ၽတ်းၵျၢမ်းလိၵ်ႈ၊ တၢင်းဢၼ်တိုၵ်းယူင်း ၸူဝ်းဢဝ်၊ တၢင်းဢၼ်သင်ႇသွၼ်သုင်းမႃႉပၼ်ၼၼ်ႉယူႇတႃႉ။-

14ယင်းဢမ်ႇၶႆႈၸႂ်လူၺ်ႈ သူႉၵျေးၸူးဢၼ်မီးၼႂ်းမႂ်းဢၼ်ဢၢပ်ႈပၼ်တီႈမႂ်း ၼႂ်းတၢင်းဢၼ် ၶၢမ်ႇပျႃႇတိၵ်ႈၸဝ်ႈ ဢိၵ်ႇတင်း တၢင်းဢၼ် ၵူၼ်းဢုပ်ႉၸိူဝ်းၸဝ်ႈတင်းလၢႆ ဢဝ်မိုဝ်းတၢင်ႇသႂ်ႇၼၼ်ႉလႄႈယႃႇပေယူႇ။-

15ၸႂ်ၸပ်းၸႂ်ၸွႆးလွင်ႈတၢင်းၸိူဝ်းၼႆႉလႄႈ ဢဝ်ႁႅင်းၵျူဝ်းၸႃးႁဵတ်းႁႂ်ႈတၢင်းဢၼ်မႂ်းယႂ်ႇၼမ်ၵိုၼ်းမႃးၼၼ်ႉ လႆႈထၢင်ႇသႃးတီႈၵူၼ်း တင်းသဵင်ႈတင်းလူင်တႃႉ။-

16ႁဵတ်းသတီႉတီႈတူဝ်ၸဝ်ႈၵဝ်ႇ ဢိၵ်ႇတင်းလွင်ႈတၢင်းဢၼ် တူဝ်ၸဝ်ႈၵဝ်ႇသင်ႇသွၼ်သုင်းမႃႉပၼ်ၼၼ်ႉသေလႄႈ တႄႇယူႇ မၼ်ႈမၼ်ႈၶိူင်ႇၶိူင်ႇတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ မႂ်းတၵ်းၵႄႇၶျွတ်ႈဢဝ်တူဝ်ၸဝ်ႈၵဝ်ႇ ဢိၵ်ႇတင်းၶဝ်ၸိူဝ်းဢၼ် ထွမ်ႇဢဝ်ၵႂၢမ်းမႂ်းၼၼ်ႉဢေႃႈ။

← Chapter 3 Jump to: Chapter 5 →