1 Timothy 2

Shan

← Chapter 1 Jump to: Chapter 3 →

1လွင်ႈၼင်ႇႁိုဝ်ႁဝ်းတၵ်းႁဵတ်းတၢင်းဢၼ် မူၼ်ႈပျေႃႇၼႂ်းဝၢတ်ႈၽြႃး၊-

2ဢိၵ်ႇတင်းတၢင်းဢၼ် ၵမ်ၵျၢင်ႉဢၼ်ထုၵ်ႇဢၼ်လီ ၵူႈၸိူဝ်ႉၵူႈပိူင်သေလႄႈ ယူႇၼိမ်ၼိမ်တႄႇတႄႇတဵတ်ႇတဵတ်ႇယဵၼ်ယဵၼ်ၸိုင်၊ ၵဝ်တိုၵ်းယူင်းၸူဝ်းဢဝ် ႁႂ်ႈလႆႈႁဵတ်းတၢင်းဢၼ် ႁဵတ်းသူးတွင်းပထၼႃႇ၊ တၢင်းဢၼ်သူင်ႇမႅတ်ႈတႃႇ၊ တၢင်းဢၼ်ယွင်ႈယေႃး ၵျေးၸူးၸဝ်ႈ ပုၼ်ႈၸႃႉၸဵမ်ၶုၼ်ႁေႃၶမ်း ဢိၵ်ႇတင်းၶုၼ်ဢၼ်မီးဢႃႇၼႃႇ တင်းသဵင်ႈတင်းလူင် တင်းၵူၼ်းၵူႈၸိူဝ်ႉၵူႈမဵဝ်းၼၼ်ႉ ဢွၼ်တၢင်းဢေႃႈ။-

3လွင်ႈမၼ်းၸမ်ႉ လွင်ႈတၢင်းၸိူဝ်ႉၼင်ႇၼႆၼၼ်ႉ ပဵၼ်လွင်ႈတၢင်းဢၼ်လီဢၼ်ငၢမ်းလႄႈ ထုၵ်ႇၸႂ်ၽြႃးပဵၼ်ၸဝ်ႈ၊ ၸဝ်ႈဢၼ်ၵႄႇၶျွတ်ႈဢဝ်ႁဝ်း၊-

4ဢၼ်မီးဢလူဝ်ႇၶႂ်ႈႁႂ်ႈၵူၼ်းတင်းသဵင်ႈတင်းလူင် ႁွတ်ႈထိုင်တၢင်းၵႄႇၶျွတ်ႈဢဝ်လႄႈ ႁူႉၸႅင်ႈသမ်ႇမႃႇတြႃးၼၼ်ႉဢေႃႈ။

5ၽြႃးပဵၼ်ၸဝ်ႈမီးသူႇလဵဝ်ၵူၺ်းဢေႃႈ။ ၼႂ်းၵႄႈဝူင်ႈၵၢင်ၽြႃးပဵၼ်ၸဝ်ႈ တင်းၵူၼ်းႁဝ်းၼႆႉၼၼ်ႉ မီးၵူၼ်းဝူင်ႈၵၢင်ဢၼ်ဝႃႈ ယေႇသူႉၶရိၸ်ႈ ဢၼ်ပဵၼ်ၵူၼ်းၼၼ်ႉၵေႃႉလဵဝ်ၵူၺ်း၊-

6ဢၼ်ၸုၼ်ႉပႅတ်ႈတူဝ်ၸဝ်ႈၵဝ်ႇ ႁႂ်ႈလႆႈထုတ်ႇဢဝ်ၵူၼ်းတင်းသဵင်ႈတင်းလူင်ၼၼ်ႉဢေႃႈ။ ၶိင်ႇၵႃႇလႃႉထုၵ်ႇယဝ်ႉၸင်ႇ မီးတၢင်းဢၼ်ၶၢမ်ႇသၢၵ်ႈသေႇဢေႃႈ။-

7ပုၼ်ႈဢၼ်တၵ်းၶၢမ်ႇသၢၵ်ႈသေႇၼၼ်ႉၸိုင်၊ ၵဝ်ၼႆႉပဵၼ်ၵေႃႉဢၼ် မၼ်းၸဝ်ႈၶၢၼ်းဝႆႉၼႂ်းဢရႃႇသြႃႇ ဢၼ်ႁေႃးလၢတ်ႈတြႃး၊ ၼႂ်းဢရႃႇတမၢၼ်ႇၸဝ်ႈ၊ ၼႂ်းဢရႃႇသြႃႇဢၼ်သင်ႇသွၼ်ပၼ်တြႃး တၢင်းဢၼ်ယုမ်ႇမၢတ်ႈဢိၵ်ႇတင်း သမ်ႇမႃႇတြႃး တီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉဢေႃႈ။ မိူဝ်ႈဢၼ်ၵဝ်ဝႃႈၸိူဝ်ႉၼင်ႇၼႆၸိုင်၊ ၵဝ်ဢမ်ႇဝႃႈၵႂၢမ်းမူႉသႃႇ၊ ၵဝ်ဝႃႈၵႂၢမ်းဢၼ်မၢၼ်ႇဢၼ်မႅၼ်ႈဢေႃႈ။

8ပိူဝ်ႈၼႆလႄႈ ၵဝ်မီးဢလူဝ်ႇၶႂ်ႈႁႂ်ႈၵူၼ်းၸၢႆးတင်းလၢႆ ယင်းဢမ်ႇမီးတၢင်းဢၼ်တေႃးသႃႉဢွၵ်ႇ၊ တၢင်းဢၼ်တွပ်ႇၵၼ်ထဵင်ၵၼ်လႄႈ ယုၵ်ႉမိုဝ်းဢၼ်မူတ်းၸၢင်ႇလႄႈ ႁဵတ်းသူးတွင်းပထၼႃႇၵူႈတီႈၵူႈလႅၼ်ဢေႃႈ။-

9မိူၼ်ၸိူဝ်ႉၼင်ႇၼၼ်၊ ၵဝ်မီးဢလူဝ်ႇၶႂ်ႈႁႂ်ႈမႄႈယိင်းတင်းလၢႆ ယင်းဢမ်ႇႁၢင်ႈၶိူင်ႈႁၢင်ႈၽၢင်ၶူၼ်ႁူဝ်ဢၼ်ၽၼ်ႈဢၼ်ၽိူဝ်၊ ၶိူင်ႈပိူင်ၶမ်း၊ မၢၵ်ႇပူးလႄး၊ ၶူဝ်းဢၼ်ထိူၵ်ႈၵႃႈထိူၵ်ႈၶၼ်လႄႈ တၵ်းဢဝ်ၶူဝ်းၼုင်ႈဢၼ်ထုၵ်ႇဢၼ်လီ ဢိၵ်ႇတင်း တၢင်းဢၼ်ဢူၵ်း ဢၼ်ဢၢႆ၊ တၢင်းဢၼ်ပႂ်ႉဢိင်ႇတရေႇ၊-

10တၢင်းၵမ်တၢင်းၵျၢင်ႉဢၼ်လီဢၼ်ငၢမ်း မိူၼ်ၸိူဝ်ႉၼင်ႇဢၼ်မႄႈယိင်းဢၼ်ႁပ်ႉတုင်းဢဝ် ပွင်ႁဵတ်းတၢင်းဢၼ် ရူဝ်ႇသေႇၵူဝ်ယမ် ၽြႃးပဵၼ်ၸဝ်ႈ ထုၵ်ႇလီၼုင်ႈမႆၼၼ်ႉ ႁၢင်ႈၶိူင်ႈႁၢင်ႈၽၢင်တူဝ်ၸဝ်ႈၵဝ်ႇဢေႃႈ။

11ၽူႈယိင်းၸိုင် ႁႂ်ႈၶၢမ်ႇတၢင်းဢၼ်ဢုပ်ႉပိူင်ႇယူႇသေလႄႈ သွၼ်ဢဝ်တဵတ်ႇတဵတ်ႇယဵၼ်ယဵၼ်သေၵမ်းလူၺ်ႈ။-

12ၵဝ်ဢမ်ႇပၼ်ဢၶႂၢင်ႉဢၼ်လႆႈသင်ႇသွၼ်သုင်းမႃႉပၼ်၊ ဢၶႂၢင်ႉဢၼ်လႆႈႁဵတ်းတၢင်းဢၼ် ဢုပ်ႉပိူင်ႇၵႃႈၼိူဝ်ၵူၼ်းၸၢႆးၼၼ်ႉ တီႈၽူႈယိင်း။ မၼ်းထုၵ်ႇလီယူႇတဵတ်ႇတဵတ်ႇယဵၼ်ယဵၼ်ယူႇဢေႃႈ။-

13လွင်ႈမၼ်းၸမ်ႉ မၼ်းၸဝ်ႈၽၢၼ်ႇသၢင်းႁဵတ်းပဵၼ် ဢႃႇတၢမ်ႇ ဢွၼ်တၢင်းလႄႈ၊ ၵမ်းလိုၼ်းၽၢၼ်ႇသၢင်းႁဵတ်းပဵၼ် ဢေးဝႃႉ ဢေႃႈ။-

14လိူဝ်သေၼၼ်ႉ ဢႃႇတၢမ်ႇ ဢမ်ႇၶၢမ်ႇတၢင်းဢၼ်ပႅတ်ႉလႅၼ်၊ ၽူႈယိင်းၶၢမ်ႇတၢင်းဢၼ်ပႅတ်ႉလႅၼ်လႄႈ ပူၼ်ႉလိူဝ်ဢေႃႈ။-

15ၼႂ်းဝႃႈၼၼ်သေၵေႃႈ ပေႃးမၼ်းတႄႇယူႇၼႂ်းတၢင်းဢၼ်ယုမ်ႇမၢတ်ႈ၊ တၢင်းဢၼ်ႁၵ်ႉ၊ တၢင်းဢၼ်မူတ်းၸၢင်ႇ၊ ဢိၵ်ႇတင်း တၢင်းဢၼ်ပႂ်ႉဢိင်ႇတရေႇယူႇၸိုင် မၼ်းတၵ်းႁွတ်ႈထိုင် တၢင်းဢၼ်ၵႄႇၶျွတ်ႈဢဝ်ၼႂ်းလွင်ႈတၢင်းဢၼ် ၵိူတ်ႇလဵင်ႉလုၵ်ႈလဵင်ႉလၢင်းဢေႃႈ။

← Chapter 1 Jump to: Chapter 3 →