2 Corinthians 13

Shan

← Chapter 12 Jump to:

1ပွၵ်ႈတႃႉတီႉယႃႉၼႆႉ ၵဝ်တၵ်းမႃးၸူးၵႃႈတီႈသူဢေႃႈ၊ ၵႂၢမ်းၵႃႈမီးတၵ်းလႆႈတႄႇ ၵွပ်ႈပိူဝ်ႈၶဝ်ၸိူဝ်းဢၼ်ၶၢမ်ႇသၢၵ်ႈသေႇသွင်ၵေႃႉသၢမ်ၵေႃႉဢေႃႈ။-

2မိူဝ်ႈဢွၼ်ၼႆႉၼၼ်ႉ ၵဝ်လႆႈလၢတ်ႈတီႈၶဝ်ၸိူဝ်းဢၼ်လႆႈၽိတ်းပိူင်ႈ ဢိၵ်ႇတင်းၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇ တင်းသဵင်ႈတင်းလူင်ၼၼ်ႉလႄႈဝႃႈ၊ ပေႃးၵဝ်သမ်ႉၶိုၼ်းႁွတ်ႈမႃးၸိုင်၊ ၵဝ်တၵ်းဢမ်ႇလႆႈဢဵတ်းလူသူၵူၺ်ႉ၊ ဝႃႈၼင်ႇၼႆဝႆႉယဝ်ႉဢမ်ႇၵႃး၊ တေႃႈလဵဝ်ၼႆႉပိၵ်ႉသမ်ႉၵဝ်ဢမ်ႇမီးလူၺ်ႈၵၼ်တင်းသူသေၵေႃႈ၊ ၵဝ်လၢတ်ႈဝႆႉဢွၼ်တၢင်းမိူၼ်ၸိူဝ်ႉၼင်ႇ မိူဝ်ႈဢၼ်ၵဝ်မီးယူႇတီႈသူပွၵ်ႈတူႉတီႉယႃႉၼၼ်ႉဢေႃႈ။-

3ပိူဝ်ႈဢၼ်သူႁႃဢဝ်သၢၵ်ႈသေႇ လွင်ႈဢၼ်ၸဝ်ႈၶရိၸ်ႈဢၼ်ႁႅင်းဢမ်ႇလဵၵ်ႉ ၵႃႈၼႂ်းသူလႄႈႁႅင်းယႂ်ႇၼႃႇလူင်လၢင်ၼႄပျႃး ပျႃႇတိၵ်ႈၸဝ်ႈတီႈၵဝ်ၼၼ်ႉလႄႈ မိူဝ်ႈဢၼ်ၵဝ်ႁွတ်ႈမႃးၸိုင်၊ ၵဝ်တၵ်းဢမ်ႇလႆႈဢဵတ်းလူ။-

4လွင်ႈမၼ်းၸမ်ႉ ၸဝ်ႈၶရိၸ်ႈၼၼ်ႉ ပိၵ်ႉသမ်ႉၶၢမ်ႇတၢင်းတၢႆၵႃႈၼိူဝ်သဝ်လၵ်းဝႃးၵၢပ်ႈ ၵွပ်ႈပိူဝ်ႈတၢင်းဢၼ်ႁႅင်းလဵၵ်ႉသေၵေႃႈ၊ ဢသၢၵ်ႈလိပ်းယူႇၵွပ်ႈပိူဝ်ႈတၼ်းၶူဝ်းၽြႃးပဵၼ်ၸဝ်ႈဢေႃႈ၊ ပိၵ်ႉသမ်ႉႁဝ်းႁႅင်းလဵၵ်ႉၸိူဝ်ႉၼင်ႇၸဝ်ႈၶရိၸ်ႈၼၼ်ႉသေၵေႃႈ၊ ႁဝ်းတၵ်းမီးတၢင်းဢၼ်ဢသၢၵ်ႈလိပ်းၸိူဝ်ႉၼင်ႇၸဝ်ႈၶရိၸ်ႈၼၼ်ႉ ၵွပ်ႈပိူဝ်ႈတၼ်းၶူဝ်းၽြႃးပဵၼ်ၸဝ်ႈဢၼ်ၼႄပျႃးၼႂ်းသူၼၼ်ႉဢေႃႈ။

5သူတႄႇယူႇၼႂ်းတၢင်းယုမ်ႇမၢတ်ႈႁိုဝ်။ ဢမ်ႇတႄႇယူႇႁိုဝ်ဝႃႈၼႆ၊ ၸႅတ်ႈထၢမ်တူဝ်ၸဝ်ႈၵဝ်ႇလူးၵွၼ်ႇတႃႉ၊ ၸၢမ်းတူၺ်းတူဝ်ၸဝ်ႈၵဝ်ႇလူးၵွၼ်ႇတႃႉ၊ ပေႃးဢမ်ႇပဵၼ်ၵေႃႉဢၼ်ဢမ်ႇၶၢမ်ႇတၢင်းဢၼ်ၸႅတ်ႈထၢမ်လႆႈၸိုင်၊ ယေႇသူႉၶရိၸ်ႈ တႄႇယူႇၵႃႈၼႂ်းသူဝႃႈၼႆ၊ တူဝ်ၸဝ်ႈၵဝ်ႇဢမ်ႇႁူႉလွင်ႈတူဝ်ၸဝ်ႈၵဝ်ႇႁိုဝ်။-

6ၵဝ်မီးတီႈမုင်ႈထႃႈမွင်းထႃႈ လွင်ႈဢၼ်သူတၵ်းႁူႉ လွင်ႈဢၼ်ႁဝ်းပဵၼ်ၵေႃႉဢၼ်ၶၢမ်ႇတၢင်းဢၼ်ၸႅတ်ႈထၢမ်လႆႈၼၼ်ႉယူႇဢေႃႈ။-

7ႁဝ်းမီးဢလူဝ်ႇၶႂ်ႈႁႂ်ႈလွင်ႈဢၼ်ႁဝ်းၶၢမ်ႇတၢင်းဢၼ်ၸႅတ်ႈထၢမ်လႆႈၼၼ်ႉ၊ထၢင်ႇသႃးဢမ်ႇၸႂ်ႈ၊ ပိၵ်ႉသမ်ႉႁဝ်းပဵၼ်ၸိူဝ်ႉၼင်ႇၵေႃႉဢၼ်ဢမ်ႇၶၢမ်ႇတၢင်းဢၼ်ၸႅတ်ႈထၢမ်လႆႈၼၼ်ႉသေၵေႃႈ၊ ၼင်ႇႁိုဝ်သူတၵ်းလႆႈၵမ်ၵျၢင်ႉဢၼ်လီဢၼ်ငၢမ်းၸိုင် ႁဝ်းႁဵတ်းသူးတွင်းပထၼႃႇ တီႈၽြႃးပဵၼ်ၸဝ်ႈ ႁႂ်ႈသူဢမ်ႇၵမ်ဢမ်ႇၵျၢင်ႉတၢင်းၵမ်တၢင်းၵျၢင်ႉ၊ဢၼ်ဢမ်ႇလီဢမ်ႇငၢမ်းသေၸိူဝ်ႉသေပိူင်ၼၼ်ႉယူႇဢေႃႈ။-

8ႁဝ်းဢမ်ႇတၢတ်ႈၼိူင်ႇလႆႈ ႁႂ်ႈလႆႈႁႄႉၶႅၼ်သမ်ႇမႃႇတြႃးၼၼ်ႉလႃးလႃး၊ ႁဝ်းယူႇၽၢႆႇသမ်ႇမႃႇတြႃးသေလႄႈတၢတ်ႈၼိူင်ႇလႆႈဢေႃႈ။-

9မိူဝ်ႈဢၼ်ႁဝ်းႁႅင်းလဵၵ်ႉလႄႈသူႁႅင်းယႂ်ႇၼၼ်ႉၸိုင် ႁဝ်းမီးတၢင်းဢၼ်သိူဝ်းပျေႃႇဢေႃႈ၊ ႁဝ်းမီးဢလူဝ်ႇႁႂ်ႈသူလႆႈၸေးၸုမ်ႇၵူၺ်းဢေႃႈ။

10ပိူဝ်ႈၼႆလႄႈ၊တေႃႈလဵဝ်ၼႆႉ ၸူဝ်ႈဢၼ်ၵဝ်ယင်းၵႆၵၼ်တင်းသူယူႇၼႆႉ ၵဝ်တႅမ်ႈပၼ်ၸိူဝ်ႉၼင်ႇၼႆ ၵွပ်ႈပိူဝ်ႈဢၼ်မိူဝ်ႈဢၼ်ၵဝ်ႁွတ်ႈမႃးၼၼ်ႉၸိုင်၊ၵဝ်ဢမ်ႇၶႂ်ႈပၼ်တၢမ်ႇဢၼ်ယၢပ်ႇၼႃႇလူင်လၢင် ၸွမ်းၵႃႈၼင်ႇဢၼ်၊တၼ်းၶူဝ်းဢၼ်ၽြႃးပဵၼ်ၸဝ်ႈ ဢၢပ်ႈပၼ်တီႈၵဝ် ဢၼ်ပဵၼ်ပုၼ်ႈဢၼ်တၵ်းယႃႉၽဵဝ်ႈပႅတ်ႈဢမ်ႇၸႂ်ႈ၊ ဢၼ်ပဵၼ်ပုၼ်ႈဢၼ်တၵ်းတႄႇႁဵတ်းဢေႃႈ။

11ၵႂၢမ်းဢၼ်ယင်းၵိုတ်းယင်းၵျၢၼ်ႇၸမ်ႉ၊ ပီႈၼွင်ႉၶဝ်ဢိူၺ်း၊ ႁႂ်ႈမင်ႇၵလႃႇမီးတီႈသူသေၵမ်းလူၺ်ႈ၊ မီးတၢင်းဢၼ်ၸေးၸုမ်ႇ၊ တၢင်းဢၼ်သၢၵ်ႈသႃႇသိူဝ်းပျေႃႇတႃႉ၊ မီးႁူဝ်ၸႂ်ဢၼ်လဵဝ်ၵၼ်လႄႈ ယူႇထုၵ်ႇထုၵ်ႇၵၼ်တႃႉ၊ ပေႃးႁဵတ်းၸိူဝ်ႉၼင်ႇၼႆၸိုင်၊ ၽြႃးပဵၼ်ၸဝ်ႈဢၼ်ပၼ်မႅတ်ႈတႃႇ ဢိၵ်ႇတင်းၵတ်းယဵၼ်ၶျၢမ်းသႃႇ တၢင်းဢၼ်ယူႇထုၵ်ႇထုၵ်ႇၵၼ်ၼၼ်ႉ၊တၵ်းမီးလူၺ်ႈၵၼ်တင်းသူဢေႃႈ။

12ၵေႃႉၼိုင်ႈလႄႈၵေႃႉၼိုင်ႈ ႁဵတ်းတင်းတၢင်းၼူမ်ဢၼ်မူတ်းၸၢင်ႇသေလႄႈ တၵ်ႉလၢတ်ႈၵၼ်တႃႉ။-

13ၵူၼ်းမူတ်းၸၢင်ႇၵႃႈမီးၸိူဝ်းၼႆႉ တၵ်ႉၼၢႆသူဢေႃႈ။

14ႁႂ်ႈၵျေးၸူးၸဝ်ႈ ယေႇသူႉၶရိၸ်ႈ ဢိၵ်ႇတင်းမႅတ်ႈတႃႇၽြႃးပဵၼ်ၸဝ်ႈ၊တင်းမိၵ်ႉသႃႇႁႃယႃႉ၊တၢင်းဢၼ်ထုၵ်ႇၵၼ်တင်းဝီႉၺိၺ်ႇဢၼ်မူတ်းၸၢင်ႇၸဝ်ႈ မီးၼိူဝ်သူသေၵမ်းလူၺ်ႈ။ ဢႃႇမိၼ်ႇ။ လိၵ်ႈဢေႃးဝႃႇတႃႉၵေႃးရိၼ်ႇထူႉ ၽိုၼ်တူႉတီႉယႃႉယဝ်ႉယဝ်ႉဢေႃႈ။

← Chapter 12 Jump to: