2 Corinthians 9

Shan

← Chapter 8 Jump to: Chapter 10 →

1လွင်ႈတၢင်းဢၼ်ႁဵတ်းလဵင်ႉႁဵတ်းလူ ၵူၼ်းမူတ်းၸၢင်ႇတင်းလၢႆၼၼ်ႉၸိုင် ပိၵ်ႉသမ်ႉၵဝ်တႅမ်ႈပၼ်ၵႂႃႇတီႈသူသေၵေႃႈ ဢမ်ႇမီးဢၵျူဝ်း။-

2လွင်ႈမၼ်းၸမ်ႉ၊ ၵဝ်ႁူႉၸႂ်ၸေႇတၼႃႇသူ၊ ဢၼ်ၵဝ်ဢဝ်ဢုပ်ႇဝၢဝ်းလႄႈလၢတ်ႈတီႈၵူၼ်း မႃႇၵေႇတေႃးၼီႉ တင်းလၢႆလႄႈဝႃႈ ၵူၼ်းမိူင်း ဢၶႃႇယႃႉ ၸိူဝ်းၼၼ်ႉ၊ မႄးႁႅၼ်းဝႆႉၸဵမ်မိူဝ်ႈပီႊၵၢႆၼၼ်ႉယဝ်ႉ၊ ဝႃႈၼင်ႇၼႆၼၼ်ႉယူႇဢေႃႈ၊ လွင်ႈတၢင်းဢၼ်ၸႂ်ၸေႇတၼႃႇသူ၊ ႁႅင်းယႂ်ႇၸိူဝ်ႉၼင်ႇၼႆၼၼ်ႉ တိုၵ်းယူင်းၸူဝ်းဢဝ်ၵူၼ်းၼႂ်းၶဝ်ၼမ်ၼႃႇဢေႃႈ။-

3ၵူၺ်းၵႃႈၼင်ႇႁိုဝ်ၵႂၢမ်းဢၼ်ႁဝ်း၊ဢဝ်လွင်ႈသူဢုပ်ႇဝၢဝ်းၼၼ်ႉ တၵ်းဢမ်ႇပဵၼ်ဢၼ်လၢႆလၢႆလွၵ်ႇလွၵ်ႇလႄႈ သူတၵ်းမႄးႁႅၼ်းဝႆႉ ႁႂ်ႈမႅၼ်ႈၵၼ်တင်းၵႂၢမ်းၼၼ်ႉၸိုင် ၵဝ်ပွႆႇၸႂ်ႉပီႈၼွင်ႉၵမ်ႈၽွင်ႈၵႂႃႇဢေႃႈ။-

4ပေႃးဢမ်ႇၼၼ်ပေႃးၵူၼ်း မႃႇၵေႇတေႃးၼီႉ ၵမ်ႈၽွင်ႈ မႃးလူၺ်ႈၵၼ်တင်းၵဝ်လႄႈ ထူပ်းႁၼ်သူဢမ်ႇမႄးႁႅၼ်းဝႆႉၸိုင်၊သူတၵ်းဢူၵ်းဢၢႆႁဝ်းဢမ်ႇဝႃႈ၊ ႁဝ်းဢၼ်ဢုပ်ႇဝၢဝ်းႁတ်းႁတ်းႁၢၼ်ႁၢၼ်ယဝ်ႉၼႆႉ တၵ်းလႆႈၶၢမ်ႇ တၢင်းဢူၵ်းတၢင်းဢၢႆဢေႃႈ။

5ပိူဝ်ႈၼႆလႄႈ လွင်ႈၼင်ႇႁိုဝ်ပီႈၼွင်ႉၸိူဝ်းၼၼ်ႉ တၵ်းၵႂႃႇဢွၼ်တၢင်းၸူးတီႈသူလႄႈ ႁႂ်ႈၵျေးၸူးတၢင်းလူႇတၢင်းတၢၼ်း ဢၼ်သူလႆႈလၢတ်ႈဝႆႉယဝ်ႉမိူဝ်ႈဢွၼ်တၢင်းၼၼ်ႉ ၸေးၸုမ်ႇဝႆႉဢွၼ်တၢင်း ႁႂ်ႈသူလႆႈမႄးႁႅၼ်းဝႆႉၸိူဝ်ႉၼင်ႇ ဢုၵ်ႉၸႃႇဢၼ်လႆႈႁဵတ်းပႄႉႁဵတ်းၼႅင်ႇလႄႈလူႇၼၼ်ႉ ဢမ်ႇၸႂ်ႈ၊ ႁႂ်ႈသူလႆႈမႄးႁႅၼ်းဝႆႉၸိူဝ်ႉၼင်ႇဢၼ်ႁဵတ်းၵျေးၸူးၼၼ်ႉၸိုင်၊ ၵဝ်ယင်းဢမ်ႇတိုၵ်းယူင်းၶဝ်လႄႈဢမ်ႇလီယူႇဝႃႈၼႆ၊ မီးသၽေႃးဢေႃႈ။-

6ၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်း ဢိတ်းၼိုင်ႈၵူၺ်းၼၼ်ႉ တၵ်းလႆႈပၢတ်ႇၶဝ်ႈ ဢိတ်းၼိုင်ႈၵူၺ်း၊ ၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်းၼမ်ၼႃႇၼၼ်ႉ တၵ်းလႆႈပၢတ်ႇၶဝ်ႈၼမ်ၼႃႇဢေႃႈဝႃႈၼႆ မၢတ်ႈတွင်းဝႆႉတႃႉ။-

7ၵူၼ်းၵူႈၵေႃႉတၵ်းလႆႈလူႇ ၸွမ်းၵႃႈၼင်ႇဢၼ်တူဝ်ၸဝ်ႈၵဝ်ႇ မၵ်းၶၢၼ်းဝႆႉၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ၊ ဢမ်ႇလႆႈပႃးတင်းၸႂ်ဢၼ်သေလၢႆသေလႄႈလူႇ၊ ဢမ်ႇလႆႈပႃးတင်းၸႂ်ဢၼ်ထၢင်ႇလႄႈဝႃႈ၊ ပေႃးယင်းဢမ်ႇလူႇၸိုင်ဢမ်ႇလႆႈယူႇ၊ ဝႃႈၼင်ႇၼႆၼၼ်ႉသေလႄႈလူႇ၊ လွင်ႈမၼ်းၸမ်ႉၽြႃးပဵၼ်ၸဝ်ႈႁၵ်ႉၵေႃႉဢၼ်ပႃးတင်းၸႂ်ၸေႇတၼႃႇသေလႄႈလူႇၼၼ်ႉၵူၺ်းဢေႃႈ။-

8လွင်ႈၼင်ႇႁိုဝ်သူတၵ်းမီးဢုၵ်ႉၸႃႇ ၵႃႈဢၼ်ၵုမ်ႇၸူၵ်းၵုမ်ႇၸၢႆႇသေႇသေႇ ၼႂ်းလွင်ႈၵူႈၸိူဝ်ႉၵူႈပိူင်လႄႈ ၼမ်ၵိုၼ်းပျေႉၸုမ်ႇတင်း တၢင်းၵမ်တၢင်းၵျၢင်ႉဢၼ်လီဢၼ်ငၢမ်းၵူႈမဵဝ်းၼၼ်ႉၸိုင် ၽြႃးပဵၼ်ၸဝ်ႈတၢတ်ႈၼိူင်ႇႁႂ်ႈသူလႆႈၼမ်ၵိုၼ်းပျေႉၸုမ်ႇ တင်းသူႉၵျေးၸူးမင်ႇၵလႃႇ ၵူႈၸိူဝ်ႉၵူႈဢၼ်ယူႇဢေႃႈ။-

9မႅၼ်ႈၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ၊ မၼ်းၼၼ်ႉၽႄၸွၼ်းယဝ်ႉ၊ မၼ်းယိုၼ်ႈမႅင်ႇပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ယဝ်ႉ၊ တၢင်းသိုဝ်ႈတေႃႇမၼ်းၸၢင်ႈတႄႇယူႇတႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆၼၼ်ႉဢေႃႈ။-

10ၸဝ်ႈဢၼ်ပၼ်ၸိူဝ်ႉပၼ်ၽၼ်း ဢိၵ်ႇတင်းဢႁႃႇရႃႉတၢင်းၵိၼ် တီႈၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်းၼၼ်ႉတၵ်းပၼ်ၸိူဝ်ႉၽၼ်း တီႈသူလႄႈ ႁႂ်ႈမၼ်းၼမ်မႃးၵိုၼ်းမႃးဢေႃႈ၊ ဢၵျူဝ်းတၢင်းသိုဝ်ႈတေႃႇသူၼၼ်ႉၵေႃႈ မၼ်းၸဝ်ႈတၵ်းႁႂ်ႈၽႄႈၵႂၢင်ႈၼမ်ၵိုၼ်းမႃးဢေႃႈ။-

11ၼင်ႇၼၼ်လႄႈ သူမီးတၢင်းဢၼ်ပျေႉၸုမ်ႇလိူင်ႇၸႂ် ၼႂ်းၵူႈၸိူဝ်ႉၵူႈပိူင်ပုၼ်ႈလွင်ႈတၢင်းဢၼ်မီးတင်းၸႂ်ၸေႇတၼႃႇသေလႄႈ ၽႄၸွၼ်းယိုၼ်ႈမႅင်ႇၵူႈၸိူဝ်ႉၵူႈမဵဝ်းဢၼ်ပွင်ႁဵတ်းတၢင်းဢၼ်ယွင်ႈယေႃးၵျေးၸူးၽြႃးပဵၼ်ၸဝ်ႈ ၵွပ်ႈပိူဝ်ႈႁဝ်းၼၼ်ႉယူႇဢေႃႈ။-

12ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ လွင်ႈတၢင်းဢၼ်ႁဵတ်းလဵင်ႉႁဵတ်းလူၼၼ်ႉ ၸွႆႈထႅမ်တၢင်းယၢၵ်ႈတၢင်းၽၢၼ် ၵူၼ်းမူတ်းၸၢင်ႇတင်းလၢႆၵူၺ်းဢမ်ႇၵႃး၊ ပျေႉၸုမ်ႇဝႆႉတင်း လွင်ႈတၢင်းဢၼ် လီယွင်ႈယေႃးၵျေးၸူးၽြႃးပဵၼ်ၸဝ်ႈၼမ်ၼႃႇဢေႃႈ။-

13မိူဝ်ႈဢၼ်ၶဝ်ထွၵ်ႈလူၺ်ႈလၢၵ်ႈၶၼႃႇသၢၵ်ႈသေႇ လွင်ႈတၢင်းဢၼ်သူႁဵတ်းလဵင်ႉႁဵတ်းလူၼၼ်ႉၸိုင် ၶဝ်ယွင်ႈယေႃးၵျေးၸူးၽြႃးပဵၼ်ၸဝ်ႈ ၵွပ်ႈပိူဝ်ႈလွင်ႈတၢင်းဢၼ်သူၸွမ်းဢလူဝ်ႇတြႃးသတၢင်းသိူဝ်းပျေႃႇၸဝ်ႈၶရိၸ်ႈထၢင်ႇထၢင်ႇသႃးသႃး ဢိၵ်ႇတင်းၵွပ်ႈပိူဝ်ႈလွင်ႈတၢင်းဢၼ်သူ မီးတင်းၸႂ်ၸေႇတၼႃႇသေလႄႈ ၽႄၸွၼ်းယိုၼ်ႈမႅင်ႇၼမ်ၼႃႇတီႈၸႃႉၸဵမ်ၶဝ်ၼၼ်ႉ ဢိၵ်ႇတင်းၵူၼ်းတင်းသဵင်ႈတင်းလူင်ၼၼ်ႉဢေႃႈ။-

14ၶဝ်ၼၼ်ႉသူးတွင်းပုၼ်ႈသူလႄႈ မီးၸႂ်ဢၼ်ႁၵ်ႉႁူမ်ၸူမ်းတွၼ်ႈသူ ၼႃႇလူင်လၢင်ၵွပ်ႈပိူဝ်ႈဢၼ်ၶဝ်ထွၵ်ႈလူၺ်ႈၵျေးၸူးၽြႃးပဵၼ်ၸဝ်ႈ ဢၼ်မျၢတ်ႈလီၼႃႇၼႂ်းသူၼၼ်ႉဢေႃႈ။-

15ႁႂ်ႈမီးတၢင်းဢၼ်ယွင်ႈယေႃးၽြႃးပဵၼ်ၸဝ်ႈ ပုၼ်ႈသူႉၵျေးၸူးမၼ်းၸဝ်ႈဢၼ်လၢတ်ႈဢမ်ႇသဵင်ႈလႆႈၼၼ်ႉသေၵမ်းလူၺ်ႈ။

← Chapter 8 Jump to: Chapter 10 →