2 Corinthians 2

Shan

← Chapter 1 Jump to: Chapter 3 →

1လိူဝ်သေၼၼ်ႉ ပွၵ်ႈၼႃႈထႃႇလိုၼ်း ၵဝ်တၵ်းဢမ်ႇပႃးတၢင်းဢၼ်မႆႈၸႂ်ၵွပ်ႈသေလႄႈ မႃးၵႃႈတီႈသူဝႃႈၼႆ၊ၵဝ်ၶျႃးၸႂ်ဝႆႉဢေႃႈ။-

2လွင်ႈမၼ်းၸမ်ႉ ပေႃးၵဝ်ႁႂ်ႈသူမႆႈၸႂ်ၵွပ်ႈၸိုင်၊လိူဝ်သေၶဝ်ၸိူဝ်းဢၼ်ၵဝ်ႁႂ်ႈမႆႈၸႂ် ၵွပ်ႈၸိူဝ်ႉၼင်ႇၼၼ်ၼၼ်ႉ၊ၽူႈလႂ်တၵ်းႁႂ်ႈၵဝ် မီးၸႂ်ဢၼ်သိူဝ်းပျေႃႇ။-

3ၵွပ်ႈပိူဝ်ႈဢၼ်ၵဝ်တူၵ်းၵၢင်ၸႂ် လူၺ်ႈလွင်ႈတၢင်းဢၼ်ၵဝ်သိူဝ်းပျေႃႇၼႆႉ ပဵၼ်လွင်ႈတၢင်းဢၼ်သူၵႃႈမီးတင်းသဵင်ႈတင်းလူင် သိူဝ်းပျေႃႇၼၼ်ႉလႄႈ ၵဝ်တႅမ်ႈလိၵ်ႈၽိုၼ်ဢွၼ်တၢင်းၼၼ်ႉပၼ်ၵႂႃႇ ႁႂ်ႈၶဝ်ၸိူဝ်းဢၼ်ထုၵ်ႇလီႁႂ်ႈၵဝ်သိူဝ်းပျေႃႇၼၼ်ႉ ဢမ်ႇလႆႈႁဵတ်း လွင်ႈတၢင်းဢၼ်တၵ်းႁႂ်ႈၵဝ်မီးတၢင်းဢၼ်မႆႈၸႂ်၊ၵွပ်ႈၼႂ်းမိူဝ်ႈဢၼ်ၵဝ်ႁွတ်ႈထိုင်ၼၼ်ႉဢေႃႈ။-

4ၵဝ်ပႃးတင်းၸႂ်ဢၼ်ယၢပ်ႇၸႂ်ယုင်ႈၸႂ်လႄႈ ၼမ်ႉတႃတူၵ်းၼမ်ၼႃႇယူႇသေလႄႈ တႅမ်ႈပၼ်ၵႂႃႇတီႈသူ ႁႂ်ႈသူလႆႈၸဵပ်းၸႂ်ဢမ်ႇၸႂ်ႈ၊ တႅမ်ႈပၼ်ႁႂ်ႈသူလႆႈႁူႉ ၸႂ်မႅတ်ႈတႃႇတၢင်းဢၼ်ၵဝ်ႁၵ်ႉသူၼႃႇလူင်လၢင်ၼၼ်ႉၵူၺ်းဢေႃႈ။

5ပေႃးသေၵေႃႉသေၵူၼ်း ႁဵတ်းလွင်ႈတၢင်းဢၼ်ႁႂ်ႈမႆႈၸႂ်ၵွပ်ႈၸိုင်၊မၼ်းႁႂ်ႈၵဝ်မႆႈၸႂ်ၵွပ်ႈၵူၺ်းဢမ်ႇၸႂ်ႈ၊မၼ်းႁႂ်ႈသူမႆႈၸႂ်ၵွပ်ႈတၢၼ်ႇတၢၼ်ႇဢေႃႈ၊ မိူဝ်ႈဢၼ်ဝႃႈမႆႈၸႂ်ၵွပ်ႈတၢၼ်ႇတၢၼ်ႇ၊ဝႃႈၼင်ႇၼႆၼၼ်ႉၸိုင် ၵဝ်ဢမ်ႇၶႂ်ႈၸီႇယၢင်ႇမၼ်းၼႃႇၼႃႇ။-

6တၢမ်ႇဢၼ်ၵူၼ်းၼမ်ၼႃႇၸီႇယၢင်ႇၼၼ်ႉ ထုၵ်ႇၵၼ်တင်းဢပႅတ်ႈၵေႃႉၸိူဝ်ႉၼင်ႇၼၼ်ၼၼ်ႉဢေႃႈ။-

7ၵွပ်ႈႁွႆးၼႆႉလႄႈ ၼင်ႇႁိုဝ်ၵေႃႉၸိူဝ်ႉၼင်ႇၼၼ်ၼၼ်ႉ တၵ်းဢမ်ႇမီးတၢင်းဢၼ်ၵႂင်ၸႂ်ယုင်ႈၸႂ် ၵွပ်ႈပိူဝ်ႈဢၼ်မီးတၢင်းဢၼ်မႆႈၸႂ်ၵွပ်ႈ၊ႁႅင်းယႂ်ႇၼႃႇၼၼ်ႉၸိုင် သူထုၵ်ႇလီႁဵတ်းႁႂ်ႈလႆႈ ပွႆႇလွတ်ႈဢပႅတ်ႈမၼ်းလႄႈ ႁႂ်ႈမၼ်းငိၼ်းၽၢၼ်ဢေႃႈ။-

8ပိူဝ်ႈၼႆလႄႈ လွင်ႈၼင်ႇႁိုဝ်တၵ်းႁဵတ်းႁႂ်ႈလွင်ႈဢၼ်သူ ႁၵ်ႉမၼ်းဢမၢၼ်ႇၶၼ်ပဵၼ်ၼၼ်ႉထၢင်ႇသႃးၸိုင် ၵဝ်တွင်းပၢၼ်ႇသူဢေႃႈ။

9လိူဝ်သေၼၼ်ႉ လွင်ႈၼင်ႇႁိုဝ်ၵဝ်တၵ်းႁူႉလႄႈ ၸၢမ်းတူၺ်းလွင်ႈဢၼ်သူ ထွမ်ႇၼႂ်းလွင်ႈတၢင်းၵူႈၸိူဝ်ႉၵူႈပိူင်ႁိုဝ်၊ဢမ်ႇထွမ်ႇႁိုဝ်ၼၼ်ႉၸိုင် ၵဝ်တႅမ်ႈပၼ်ၵႂႃႇမိူဝ်ႈဢွၼ်တၢင်းၼၼ်ႉဢေႃႈ။-

10ပေႃးသူပွႆႇလွတ်ႈဢပႅတ်ႈသေၵေႃႉသေၵူၼ်းၸိုင် ၵဝ်ၵေႃႈပွႆႇလွတ်ႈဢပႅတ်ႈၵေႃႉၼၼ်ႉဢေႃႈ၊လွင်ႈမၼ်းၸမ်ႉ ပေႃးၵဝ်ယၢမ်ႈလႆႈပွႆႇလွတ်ႈဢပႅတ်ႈသေၵေႃႉသေၵူၼ်းၸိုင်၊ၵဝ်ထွၵ်ႈလူၺ်ႈသူသေလႄႈ ဢဝ်တင်းဢၶႂၢင်ႉၸဝ်ႈၶရိၸ်ႈ၊ယၢမ်ႈလႆႈပွႆႇလွတ်ႈဢေႃႈ။-

11ပေႃးဢမ်ႇၼၼ်ၸိုင်၊မီးတီႈတၵ်းၵူဝ် ၸႃႇတၢၼ်ႇ ပႄႉၼႅင်ႇႁဝ်းဢေႃႈ၊တၢင်းၵျၢမ်ႇတၢင်းပွင်မၼ်းၸိူဝ်းၼၼ်ႉၵေႃႈ၊ႁဝ်းႁူႉယူႇဢေႃႈ။

12လိူဝ်သေၼၼ်ႉ၊မိူဝ်ႈဢၼ်ၵဝ်ႁွတ်ႈထိုင်ၵႃႈတီႈဝဵင်း တရေႃး ႁႂ်ႈလႆႈႁေႃးလၢတ်ႈတြႃးသတၢင်းသိူဝ်းပျေႃႇလႄႈ ၸဝ်ႈၽြႃးၽုၺ်ႇၽၵ်းတူတီႈၵဝ်ၼၼ်ႉၸိုင်၊-

13ပိူဝ်ႈဢၼ်ၵဝ်ဢမ်ႇထူပ်းႁၼ်ၼွင်ႉၵဝ် တီႉတူႉ လႄႈၸႂ်ၵဝ်ဢမ်ႇသၢၵ်ႈသႃႇ၊ ၵဝ်တၵ်ႉလၢတ်ႈၵၼ်တင်းၶဝ်ယဝ်ႉၸင်ႇ ၵႂႃႇၵႃႈတီႈမိူင်း မႃႇၵေႇတေႃးၼီႉ သေဢေႃႈ။

14ႁႂ်ႈၵျေးၸူးၽြႃးပဵၼ်ၸဝ်ႈ၊ဢၼ်ပွင်ႁဵတ်းႁႂ်ႈႁဝ်းလႆႈၶၢမ်ႇပွႆး၊ဢၼ်ပႄႉၼႅင်ႇလူၺ်ႈၵၼ်တင်းၸဝ်ႈၶရိၸ်ႈ ဢိၵ်ႇတင်းႁႂ်ႈတၢင်းႁွမ်တၢင်းႁူၺ်း လွင်ႈတၢင်းဢၼ်ႁဝ်းႁူႉၸဝ်ႈၼၼ်ႉ လႆႈၸွတ်ႇတူဝ်ႈၵူႈတီႈၵူႈလႅၼ် ၵွပ်ႈပိူဝ်ႈႁဝ်းၼၼ်ႉ၊ မီးတၢင်းဢၼ်ယွင်ႈယေႃးသေၵမ်းလူၺ်ႈ။-

15ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ႁဝ်းၼႆႉပဵၼ်တၢင်းႁွမ်တၢင်းႁူၺ်းၸဝ်ႈၶရိၸ်ႈ ၵႃႈတီႈၽြႃးပဵၼ်ၸဝ်ႈ ၼႂ်းၶဝ်ၸိူဝ်းဢၼ်ႁွတ်ႈထိုင်၊တၢင်းဢၼ်ၵႄႇၶျွတ်ႈဢဝ်ၼၼ်ႉ ဢိၵ်ႇတင်းၼႂ်းၶဝ်ၸိူဝ်းဢၼ်ႁွတ်ႈထိုင်၊တၢင်းဢၼ်သုမ်းဢၼ်ၸွမ်းၼၼ်ႉဢေႃႈ။-

16ၵႃႈတီႈၶဝ်ၸိူဝ်းဢၼ်ႁွတ်ႈထိုင်၊တၢင်းဢၼ်သုမ်းဢၼ်ၸွမ်းၼၼ်ႉၸမ်ႉ၊ ပဵၼ်တၢင်းႁွမ်တၢင်းႁူၺ်းတၢင်းတၢႆ တေႃႇထိုင်ႁွတ်ႈတၢင်းတၢႆဢေႃႈ၊ၵႃႈတီႈၶဝ်ၸိူဝ်းဢၼ်ႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉၸမ်ႉ၊ ပဵၼ်တၢင်းႁွမ်တၢင်းႁူၺ်း၊တၢင်းဢၼ်ဢသၢၵ်ႈလိပ်းတေႃႇထိုင်ႁွတ်ႈ တၢင်းဢၼ်ဢသၢၵ်ႈလိပ်းဢေႃႈ၊ ပေႃးပဵၼ်ၸိူဝ်ႉၼင်ႇၼႆၸိုင် ၽူႈလႂ်တၵ်းထိူၵ်ႈတၢၼ်ႇၵၼ်တင်းလွင်ႈတၢင်းၸိူဝ်းၼႆႉ။-

17ႁဝ်းၼႆႉယင်းဢမ်ႇမိူၼ်ၵၼ်တင်းၵူၼ်းၼမ်ၼႃႇ ဢၼ်ႁႂ်ႈၼုၵ်ႈၵပၢတ်ႈတြႃးၽြႃးပဵၼ်ၸဝ်ႈ ယုတ်ႈၵႂႃႇယွမ်းၵႂႃႇၼၼ်ႉလႄႈ မီးတင်းၸႂ်ဢၼ်ၶၢဝ်ၸၢင်ႇ၊ႁေႃးလၢတ်ႈတြႃးၸဝ်ႈၶရိၸ်ႈ ၸွမ်းၼင်ႇဢလူဝ်ႇၽြႃးပဵၼ်ၸဝ်ႈ ၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။

← Chapter 1 Jump to: Chapter 3 →