Isaiah 43

Shan

← Chapter 42 Jump to: Chapter 44 →

1မဵဝ်း ယႃႇၵုပ်ႈ ၊ မဵဝ်းထႃႇဝရႃႉၽြႃး ဢၼ်ၽၢၼ်ႇသၢင်းမႂ်း ဢီႉသရေႇလႃႉ ဢိူၺ်း၊ ၸဝ်ႈဢၼ်ႁဵတ်းပဵၼ်မႂ်းၼၼ်ႉ မီးဢမိင်ႉဝႆႉၸမ်ႉ၊ယႃႇပေမႆႈၸႂ်ၶီၸႂ်။ ၵဝ်ထုတ်ႇဢဝ်မႂ်းယဝ်ႉ။ ၵဝ်ဢဝ်ၼႃႇမႃႉၸိုဝ်ႈသဵင်ၵဝ် ႁွင်ႉႁဵၵ်ႈတီႈမႂ်းယဝ်ႉ။ မႂ်းပဵၼ်တီႈဢၼ်ၵဝ်ပိူင်ႇဢေႃႈ။-

2မိူဝ်ႈဢၼ် မႂ်းယၢင်ႈၵႂႃႇပႆၵႂႃႇၼႂ်းၼမ်ႉၼၼ်ႉ ၵဝ်တၵ်းမီးယူႇလူၺ်ႈၵၼ်တင်းမႂ်းလႄႈ မိူဝ်ႈဢၼ် ယၢင်ႈၵႂႃႇပႆၵႂႃႇၵႃႈၼႂ်းၼမ်ႉႁွင်ႈၼမ်ႉၵႄး တင်းလၢႆၼၼ်ႉ ၶဝ်တၵ်းဢမ်ႇလႆႈထူမ်ႈမႂ်းႁူမ်ႇမႂ်း။ မိူဝ်ႈဢၼ် မႂ်းယဵပ်ႇၵႂႃႇယမ်ႈၵႂႃႇ ၵႃႈၼႂ်းၽႆးၼၼ်ႉ၊ မႂ်းဢမ်ႇလႆႈၶၢမ်ႇတၢင်းဢၼ်ၽႆးမႆႈ။ ပဵဝ်ၽႆး ဢမ်ႇလႆႈႁုပ်ႇသႂ်ႇတိူဝ်ႉသႂ်ႇမႂ်း။-

3လွင်ႈမၼ်းၸမ်ႉ ၵဝ်ပဵၼ်ထႃႇဝရႃႉၽြႃး ၽြႃးပဵၼ်ၸဝ်ႈမႂ်း၊ ၽြႃးဢၼ်မူတ်းၸၢင်ႇ မဵဝ်း ဢီႉသရေႇလႃႉ ၊ ၸဝ်ႈဢၼ်ၵႄႇသႄႇၶျွတ်ႈဢဝ်မႂ်းဢေႃႈ။ ၵဝ်ဢဝ်မိူင်း ဢေႇၵိပ်ႉတူႉ ပၼ်ပုၼ်ႈဢၼ်တၵ်းထုတ်ႇဢဝ်မႂ်းလႄႈ ဢဝ်မိူင်း ၵူႉသႃႉ တင်းမိူင်း သေးၽႃႉ ပၼ်ပုၼ်ႈ တၢင်တူဝ်မႂ်းယဝ်ႉ။-

4ၵွပ်ႈပိူဝ်ႈဢၼ်မႂ်းပဵၼ် တီႈဢၼ်ထိူၵ်ႈၵႃႈထိူၵ်ႈၶၼ် သိုဝ်ႈၼႃႈတႂ်ႈတႃၵဝ်လႄႈ မီးသရေႇယဝ်ႉၼၼ်ႉလႄႈ၊ ၵဝ်ႁၵ်ႉမႂ်းဢေႃႈ။ပိူဝ်ႈၼႆလႄႈ ၵဝ်တၵ်းဢဝ်ၵူၼ်းတင်းလၢႆ ပၼ်ပုၼ်ႈတၢင်တူဝ်မႂ်းလႄႈ ဢဝ်မဵဝ်းၵူၼ်းတင်းလၢႆ ပၼ်ပုၼ်ႈတၢင်တူဝ်ဢသၢၵ်ႈမႂ်း ဢေႃႈ။-

5ယႃႇပေမႆႈၸႂ်ၶီၸႂ်။ ၵဝ်မီးယူႇလူၺ်ႈၵၼ်တင်းမႂ်းဢေႃႈ။ ၵဝ်တၵ်းဢဝ်မဵဝ်းၸိူဝ်ႉၶိူဝ်းမႂ်းသေၵႃႈတီႈၼႃႈဝၼ်းဢွၵ်ႇ မႃးလႄႈတၵ်းၸူႉသိမ်းဢဝ်မႂ်းသေၵႃႈတီႈ ၼႃႈဝၼ်းတူၵ်းမႃးဢေႃႈ။-

6ၵဝ်တၵ်းလၢတ်ႈတီႈၼႃႈတၢင်းႁွင်ႇလႄႈဝႃႈ၊ ဢၢပ်ႈပၼ်တႃႉ၊ ဝႃႈၼင်ႇၼႆလႄႈ လၢတ်ႈတီႈၼႃႈတၢင်းၸၢၼ်းလႄႈဝႃႈ၊ ယႃႇပေထိမ်ႇပေဢမ်။ ဢဝ်လုၵ်ႈၸၢႆးၵဝ်ဢၼ်ယူႇၵႃႈတီႈ ဢၼ်ၵႆ၊ လုၵ်ႈယိင်းၵဝ်ဢၼ်ယူႇၵႃႈတီႈ လႅၼ်သုတ်းလိၼ်မိူင်း၊-

7ဢၼ်ဝႃႈၶဝ် ၵႃႈဢၼ်ၶၢမ်ႇတၢင်းဢၼ်ႁွင်ႉႁဵၵ်ႈလူၺ်ႈၼႃႇမႃႉၸိုဝ်ႈသဵင်ၵဝ် ဢၼ်ၵဝ်ၽၢၼ်ႇသၢင်းႁဵတ်းပဵၼ်ဝႆႉ ပုၼ်ႈမုၼ်သရေႇၵဝ် ၸိူဝ်းၼၼ်ႉမႃးတႃႉ။ ၵဝ်ႁဵတ်းပဵၼ်မၼ်းဝႆႉလႄႈ ပွင်ႁႅၼ်းမၼ်းဝႆႉ ဢမၢၼ်ႇၶၼ်ပဵၼ်ယဝ်ႉ၊ ဝႃႈၼင်ႇၼႆဢေႃႈ။

8ဢဝ်ၶဝ်ၸိူဝ်းဢၼ်တႃမွတ်ႇလႄႈ မီးမၢၵ်ႇတႃယူႇ ဢိၵ်ႇတင်း ၶဝ်ၸိူဝ်းဢၼ်ႁူၼူၵ်ႇလႄႈမီးႁူယူႇၼၼ်ႉမႃးတႃႉ။-

9ႁႂ်ႈၵူၼ်း ၵူႈၸိူဝ်ႉၵူႈမဵဝ်းၸူႉၵၼ်တုမ်ၵၼ်လႄႈ ႁႂ်ႈမဵဝ်းၵူၼ်းတင်းလၢႆ ႁဵတ်းမုၵ်ႉလဵဝ်ၸိူဝ်းလဵဝ်ၵၼ်သေၵမ်းလူၺ်ႈ။ ၼႂ်းၶဝ်ၼၼ်ႉ ၽူႈလႂ်တၵ်းၽုၺ်ႇဢွၵ်ႇၼႄပျႃးဢမူႉၼႆႉလႆႈ။ ၽူႈလႂ်တၵ်းလႆႈမွၵ်ႇလၢတ်ႈ လွင်ႈတၢင်းဢၼ်တၵ်းပဵၼ်မႃးယဝ်ႉၸိူဝ်းၼၼ်ႉလႆႈ။ လွင်ႈၼင်ႇႁိုဝ် ၶဝ်တၵ်းၵၢင်းလွတ်ႈတင်း ဢၶႂၢင်ႉတၢင်းဢၼ်တၢင်ႇဢပႅတ်ႈၸိုင်၊ ႁႂ်ႈၶဝ်ၼႄပျႃးသၢၵ်ႈသေႇၶဝ် သေၵမ်းလူၺ်ႈ။ ပေႃးဢမ်ႇၼၼ် ႁႂ်ႈၶဝ်ထွမ်ႇငိၼ်းလႄႈ ဢွၼ်ၵၼ်ႁပ်ႉတုင်းဢဝ်လႄႈဝႃႈ၊ ဢၼ်ၼႆႉၸိုဝ်ႈၸႂ်ႈယဝ်ႉ၊ ဝႃႈၼင်ႇၼႆသေၵမ်းလူၺ်ႈ။-

10ထႃႇဝရႃႉၽြႃး မီးဢမိင်ႉဝႆႉၸမ်ႉ၊ သူပဵၼ်သၢၵ်ႈသေႇၵဝ်၊ ၶႃႈၵဝ်ဢၼ်ၵဝ်လိူၵ်ႈၵဵပ်းဢဝ် ႁႂ်ႈသူလႆႈႁူႉၸၵ်းယုမ်ႇမၢတ်ႈၵဝ်လႄႈ ႁူႉၸႅင်ႈလွင်ႈဢၼ်ၵဝ်ပဵၼ် မၼ်းၸဝ်ႈၼၼ်ႉဢေႃႈ။ ဢွၼ်တၢင်းၵဝ်ၼၼ်ႉ ဢမ်ႇမီး ၽြႃးပဵၼ်ၸဝ်ႈ ဢၼ်လႆႈၶၢမ်ႇတၢင်းဢၼ် ႁဵတ်းပဵၼ်ဝႆႉၼၼ်ႉ။ ဢမ်ႇမီးသေၸဝ်ႈသေပႃး။ လိုၼ်းၵဝ်ၵေႃႈ တၵ်းဢမ်ႇမီးသေၸဝ်ႈသေပႃး။-

11ၵဝ်ၼႆႉယဝ်ႉ၊ ၵဝ်ၼႆႉယဝ်ႉ၊ ပဵၼ်ထႃႇဝရႃႉၽြႃးလႄႈ လိူဝ်သေၵဝ်ၼႆႉ ဢမ်ႇမီးၸဝ်ႈဢၼ်ၵႄႇသႄႇၶျွတ်ႈဢဝ်။-

12ၵဝ်ဝႆႉပျႃႇတိၵ်ႈလႄႈ ၵႄႇသႄႇၶျွတ်ႈဢဝ်ယဝ်ႉယဝ်ႉ။ ၵဝ်ၽုၺ်ႇဢွၵ်ႇၼႄပျႃး ယဝ်ႉယဝ်ႉ။ ၽြႃးတၢင်ႇသူႇတၢင်ႇပႃးဢမ်ႇမီးၵႃႈၼႂ်းသူ။ သူပဵၼ်သၢၵ်ႈသေႇၵဝ်ဢေႃႈ။ၵဝ်ပဵၼ်ၽြႃးပဵၼ်ၸဝ်ႈယဝ်ႉ၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။-

13ၵဝ်ပဵၼ်ၽြႃးၸဵမ်မိူဝ်ႈ ၸူဝ်ႈဢၼ်မိုဝ်ႉဝၼ်းၶိင်ႇၵႃႇလႃႉဢမ်ႇပႆႇပဵၼ်ပႆႇမီးၼၼ်ႉဢေႃႈ။ ၽူႈလႂ်ဢမ်ႇၵႄႇသႄႇၼုၵ်ႈဢဝ် ၵႃႈၼႂ်းမိုဝ်းၵဝ်လႆႈ။ ၵဝ်ႁဵတ်းလႄႈ ၽူႈလႂ်တၵ်းႁႄႉၶႅၼ်။

14ထႃႇဝရႃႉၽြႃး ၸဝ်ႈဢၼ်ထုတ်ႇဢဝ်သူ၊ ၽြႃးဢၼ်မူတ်းၸၢင်ႇ မဵဝ်း ဢီႉသရေႇလႃႉ မီးဢမိင်ႉဝႆႉၸမ်ႉ၊ ၵဝ်လႆႈပွႆႇၸႂ်ႉၵႂႃႇ ၵႃႈတီႈဝဵင်း ပႃႇပူႉလုၼ်ႇ ၼၼ်ႉ ပုၼ်ႈသူလႄႈ ႁႂ်ႈၶဝ်ၵႃႈမီးဢၼ်ဝႃႈ ၵူၼ်း ၶႃႇလတေး တင်းလၢႆ လူင်းၸူးၵႃႈတီႈႁိူဝ်းသၢင်းၽေႃးတီႈဢၼ် ၶဝ်မူၼ်ႈပျေႃႇၼၼ်ႉ မိူၼ်ၸိူဝ်ႉၼင်ႇၶဝ်ၸိူဝ်းဢၼ် ဢွၵ်ႇပၢႆႈၼၼ်ႉဢေႃႈ။-

15ၵဝ်ပဵၼ်ထႃႇဝရႃႉၽြႃး ၽြႃးဢၼ်မူတ်းၸၢင်ႇသူ၊ ၸဝ်ႈဢၼ်ၽၢၼ်ႇသၢင်းႁဵတ်းပဵၼ် မဵဝ်း ဢီႉသရေႇလႃႉ ၊ ၶုၼ်ႁေႃၶမ်းသူဢေႃႈ။-

16ထႃႇဝရႃႉၽြႃး ႁဵတ်းပဵၼ်သဵၼ်ႈတၢင်းၵႃႈၼႂ်းပၢင်ႇလၢႆႇ ဢိၵ်ႇတင်း ႁွႆးတၢင်းၵႃႈၼႂ်းၼမ်ႉ ဢၼ်ၸႅဝ်ႈၼႃႇႁႅင်းၼႃႇ၊-

17ဢၼ်ဢဝ် လေႃႉရထႃးလႂ် မႃႉလႂ် ဢိၵ်ႇတင်း မူႇၽုင်ၵူၼ်းသိုၵ်းလႂ် ႁႅင်းတၼ်းၶူဝ်းလႂ်မႃး၊ ဢၼ်ႁႂ်ႈၶဝ်လူမ်ႉၼွၼ်းပႅတ်ႈ ၽွမ်ႉၵမ်းလဵဝ်ၵၼ် ထၼ်ႈပေႃးဢမ်ႇလုၵ်ႉလႆႈလႄႈ ဢဝ်မွတ်ႇပႅတ်ႈ မိူၼ်ၸိူဝ်ႉၼင်ႇတဵၼ်း ၵႃႈတီႈတဵၼ်းၽႆးၼၼ်ႉ မီးဢမိင်ႉဝႆႉၸမ်ႉ၊-

18ယႃႇပေၶုၵ်းၸႂ်လႆႈၶႆႈၸႂ်ထူပ်း လွင်ႈတၢင်းဢၼ်ယၢမ်ႈပဵၼ်မႃးယဝ်ႉၸိူဝ်းၼၼ်ႉ။ ယႃႇပေႁဵတ်းပမႃႇၼႃႉတီႈလွင်ႈတၢင်း မိူဝ်ႈၵွၼ်ႇ ဢွၼ်ၼႆႉၸိူဝ်းၼၼ်ႉ။-

19တူၺ်းလူး၊ ၵဝ်တၵ်းႁဵတ်းလွင်ႈတၢင်းဢၼ်မႂ်ႇလႄႈ ဢၼ်ၼၼ်ႉတၵ်းပေႃႇမႃး မိူဝ်ႈလဵဝ်ၼႆႉဢေႃႈ။ သူတၵ်းလႆႈႁူႉႁၼ်မၼ်း ဢမ်ႇၸႂ်ႈႁိုဝ်။ ၵဝ်တၵ်းပွင်ႁဵတ်းသဵၼ်ႈတၢင်းၵႃႈၼႂ်းထိူၼ်ႇ ဢိၵ်ႇတင်းၼမ်ႉႁွင်ႈၼမ်ႉၵႄး ၵႃႈၼႂ်းတီႈပၢင်ႇတီႈပဵင်း ဢမၢၼ်ႇၶၼ်ပဵၼ်ဢေႃႈ။-

20ၸႃႉၸဵမ်မႃလိၼ် ဢိၵ်ႇတင်းၼူၵ်ႉၵလႃးဢုၵ်ႉ တင်းလၢႆလႄႈ တူဝ်ထိူၼ်ႇႁၢႆႉတင်းလၢႆ တၵ်းဢွၼ်ၵၼ်ယွင်ႈယေႃးၵုင်ႇၵျေးၸူးၵဝ်ဢေႃႈ။ လွင်ႈမၼ်းၸမ်ႉ ၵဝ်လႆႈဢဝ်ၼမ်ႉၼမ်ၼႃႇ ဝႆႉၵႃႈၼႂ်းထိူၼ်ႇၼႂ်းၶိူဝ်း ဢိၵ်ႇတင်း ၼမ်ႉႁွင်ႈၼမ်ႉၵႄးတင်းလၢႆ ဝႆႉၵႃႈၼႂ်းတီႈပၢင်ႇတီႈပဵင်းႁႂ်ႈၵူၼ်းၵဝ်၊ ၶဝ်ၸိူဝ်းဢၼ်ၵဝ်လိူၵ်ႈၵဵပ်းဢဝ်တင်းလၢႆ လႆႈၵိၼ်ယဝ်ႉ။-

21ၵူၼ်းမဵဝ်းၼၼ်ႉ ပဵၼ်ဢၼ်ၵဝ်ႁဵတ်းပဵၼ် ပုၼ်ႈၵဝ်ႁႂ်ႈၶဝ်လႆႈၼႄပျႃး ၵုင်ႇၵျေးၸူးၵဝ်ဢေႃႈ။

22ၼႂ်းဝႃႈၼၼ်သေၵေႃႈ မဵဝ်း ယႃႇၵုပ်ႈ ဢိူၺ်း၊ မႂ်းဢမ်ႇႁွင်ႉဢမ်ႇႁႃၵဝ်၊ မဵဝ်း ဢီႉသရေႇလႃႉ ဢိူၺ်း၊ မႂ်းၼႆႉမိူဝ်ႇၸၢၼ်ႈၵဝ်ယဝ်ႉ လူင်ပႄႇ။-

23မႂ်းဢမ်ႇဢဝ်သူဝ်းဢွၼ်ႇ ဢၼ်ပဵၼ်ပုၼ်ႈယိတ်ႈ ဢၼ်တၵ်းတုတ်ႇၽႆးၼၼ်ႉ မႃးတီႈၵဝ်။ မႂ်းဢမ်ႇဢဝ်တၢင်းဢၼ်ပုၵ်ႈၸေႃႇယိတ်ႈ ယုၵ်ႉယွင်ႈၵဝ်။ ၵဝ်ဢမ်ႇႁႂ်ႈမႂ်းဢဝ်တႃႇၼႃႉတၢင်းလူႇႁၢပ်ႇဢမူႉၵဝ်။ ၵဝ်ဢမ်ႇယွၼ်းဢဝ် လေႃႇပၢၼ်ႇ လႄႈ ႁႂ်ႈမႂ်းယၢပ်ႇၸႂ်ၶၢၼ်ၸႂ်။-

24မႂ်းဢမ်ႇဢဝ်ငိုၼ်းသိုဝ်ႉဢဝ် ဢွႆႈဢၼ်ႁွမ်ၼၼ်ႉမႃးပုၼ်ႈၵဝ်။ မႂ်းဢမ်ႇဢဝ်တင်းၵွၼ်ႈၶႆၵွၼ်ႈမၼ်း တူဝ်ယိတ်ႈမႂ်း ႁႂ်ႈၵဝ်ဢိမ်ႇတဵမ်။မႂ်းဢဝ်တင်းဢပႅတ်ႈတူႉၸရိူၵ်ႈမႂ်း ႁႂ်ႈၵဝ်ႁၢပ်ႇဢမူႉယဝ်ႉလူင်ပႄႇ။ မႂ်းဢဝ်တၢင်းဢၼ် မႂ်းႁဵတ်းႁၢႆႉႁဵတ်းမိူၵ်ႈၸိူဝ်းၼၼ်ႉ ႁႂ်ႈၵဝ်ယၢပ်ႇၸႂ်ၶၢၼ်ၸႂ်ယဝ်ႉလူင်ပႄႇ။-

25ၵဝ်ၼႆႉယဝ်ႉ၊ ၵဝ်ၼႆႉယဝ်ႉ ပဵၼ်ၵေႃႉဢၼ်ၶႄဢပႅတ်ႈမႂ်းမွတ်ႇပႅတ်ႈပုၼ်ႈၵဝ်လႄႈ ဢမ်ႇၶုၵ်းၸႂ်လႆႈၶႆႈၸႂ်ထူပ်း ဢမူႉတူႉၸရိူၵ်ႈမႂ်းၸိူဝ်းၼၼ်ႉ။-

26ပၼ်သတီႉတီႈၵဝ်တႃႉ။ ထူပ်းတြႃးတီႈၵၼ်တႃႉႁဝ်း။ လၢတ်ႈဢမူႉမႂ်းႁႂ်ႈမႂ်းလႆႈၵၢင်းလွတ်ႈတင်းဢပႅတ်ႈတႃႉ။-

27ပေႃႈမႂ်း ဢၼ်ပဵၼ်ပေႃႈပထမႃႉၼၼ်ႉ ႁဵတ်းတူႉၸရိူၵ်ႈယဝ်ႉ။ သြႃႇမႂ်းၸိူဝ်းၼၼ်ႉ ဢွၼ်ၵၼ်ၽိတ်းပိူင်ႈၵဝ်ယဝ်ႉ။-

28ပိူဝ်ႈၼႆလႄႈ ၵဝ်တၵ်းဢဝ်ၶုၼ်ထႃႇၼႃႉတီႈမူတ်းၸၢင်ႇတင်းလၢႆ ၶျႃးတူၵ်းတီႈတႅမ်ႇလႄႈ ႁဵတ်းႁႂ်ႈမဵဝ်း ယႃႇၵုပ်ႈ ပဵၼ်တီႈဢၼ် ၵိၼ်ႇလႃႇ ဢိၵ်ႇတင်းႁႂ်ႈမဵဝ်း ဢီႉသရေႇလႃႉ ပဵၼ်တီႈဢၼ်သႄႉသွမ်းဢေႃႈ။

← Chapter 42 Jump to: Chapter 44 →