Isaiah 51

Shan

← Chapter 50 Jump to: Chapter 52 →

1သူၸိူဝ်းဢၼ်ၸွမ်းတြႃးတၢင်းဢၼ်သိုဝ်ႈတေႃႇလႄႈ ႁႃဢဝ်ထႃႇဝရႃႉၽြႃး ၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းၵႂၢမ်းၵဝ်တႃႉ။ ဢွၼ်ၵၼ် လူတူၺ်းမၢၵ်ႇႁိၼ် တီႈဢၼ်သိဝ်ႇဢဝ်သပ်းဢဝ်သူဢွၵ်ႇၼၼ်ႉ ဢိၵ်ႇတင်းႁူးၶုမ် တီႈဢၼ် ၶုတ်းဢဝ်ဝဵၵ်ႉဢဝ်သူဢွၵ်ႇ ၼၼ်ႉတႃႉ။-

2ဢွၼ်ၵၼ်လူတူၺ်းပေႃႈသူ ဢႃႇပြႃႇႁၢမ်ႇ ဢိၵ်ႇတင်း ၵေႃႉဢၼ်ၵိူတ်ႇလဵင်ႉသူ ၸႃႇရႃႇ ၼၼ်ႉတႃႉ။ ၵဝ်ႁွင်ႉဢဝ် ဢႃႇပြႃႇႁၢမ်ႇ ၼၼ်ႉ မိူဝ်ႈဢၼ်မၼ်းယင်းမီးၵေႃႉလဵဝ်ၵူၺ်းမၼ်းၼၼ်ႉလႄႈ ပၼ်တၢင်းလီသေလႄႈ ႁႂ်ႈမၼ်းၼမ်ၵိုၼ်းမႃးၼႃႇလူင်လၢင်ဢေႃႈ။-

3မႅၼ်ႈၵၼ်တင်းဢၼ်ၼၼ်ႉလႄႈ ထႃႇဝရႃႉၽြႃး တၵ်းပၼ်ၵတ်းယဵၼ်ၶျၢမ်းသႃႇ တီႈဝဵင်း ၸီႉဢုၼ်ႇ ဢေႃႈ။ တၵ်းပၼ် ၵတ်းယဵၼ်ၶျၢမ်းသႃႇတီႈ ၵႃႈတီႈဢၼ်သဵတ်ႇဢၼ်ယဵၼ်မၼ်း ၵူႈတီႈၵူႈလႅၼ်ၼၼ်ႉလႄႈ တၵ်းႁႂ်ႈထိူၼ်ႇမၼ်းပဵၼ် ၸိူဝ်ႉၼင်ႇ တီႈ ဢေႇတိၼ်ႇ ၼၼ်ႉ ဢိၵ်ႇတင်း တီႈဢၼ်ပဝ်ႇဢၼ်လၢပ်ႈမၼ်း ပဵၼ်ၸိူဝ်ႉၼင်ႇဢူးယဵၼ်ႇ ထႃႇဝရႃႉၽြႃး ၼၼ်ႉလႄႈ တၵ်းလႆႈထူပ်းႁၼ်တၢင်းဢၼ်ၸူမ်းသိူဝ်း တၢင်းဢၼ်သႂၢင်ႇၸႂ်၊ တၢင်းဢၼ်ယွင်ႈယေႃးၵျေးၸူးၸဝ်ႈ၊ တၢင်းဢၼ်ႁဵတ်းၵႂၢမ်းၵႃႈၼႂ်းဝဵင်း ၼၼ်ႉဢေႃႈ။-

4ၵူၼ်းၵဝ်တင်းလၢႆၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းၵႂၢမ်းၵဝ်ယူႇတႃႉ။ မဵဝ်းၵူၼ်းၵဝ်ဢိူၺ်း၊ ဢွၼ်ၵၼ်ဝၢႆႇႁူတေႃႇၵဝ်တႃႉ။ တြႃးတၵ်း ၵႄႈဢွၵ်ႇသေ ၵႃႈတီႈၵဝ်လႄႈၵဝ်တၵ်းႁႂ်ႈတၢင်းဢၼ် ၵဝ်ၸီႇယၢင်ႇဝႆႉၼၼ်ႉ တႄႇယူႇပုၼ်ႈဢၼ်တၵ်းပဵၼ် ဢၼ်လႅင်းတီႈမဵဝ်းၵူၼ်း တင်းလၢႆဢေႃႈ။-

5တြႃးတၢင်းဢၼ်သိုဝ်ႈတေႃႇၵဝ်ၼၼ်ႉ မီးယူႇၵႃႈတီႈဢၼ်ၸမ်လႄႈ တြႃးတၢင်းဢၼ် ၵႄႇသႄႇၶျွတ်ႈဢဝ်ၵဝ်ၼၼ်ႉ ဢွၵ်ႇၵႂႃႇၸူးယဝ်ႉ။ ၶႅၼ်ၵဝ်ၼႆႉတၵ်းၸီႇယၢင်ႇဢမူႉတြႃး ၵႃႈၼႂ်းမဵဝ်းၵူၼ်းတင်းလၢႆလႄႈ ၵုၼ်ၼႂ်းၼမ်ႉတင်းလၢႆ တၵ်းဢွၼ်ၵၼ်မုင်ႈမွင်းၵဝ်ယူႇသေလႄႈ ၸႂ်လီၸႂ်ပိုင်ႈလူၺ်ႈၶႅၼ်ၵဝ်ဢေႃႈ။-

6ဢွၼ်ၵၼ်ႁႅၼ်တႃသူတူၺ်း ၽႃႉၵၢင်ႁၢဝ်တႃႉ။ လိၼ်မိူင်းၵေႃႈ ဢွၼ်ၵၼ်ၵူမ်ႈလႄႈတူၺ်းတႃႉ။ ၽႃႉၵၢင်ႁၢဝ်တၵ်းလပ်ႉႁၢႆၵႂႃႇ မိူၼ်ၸိူဝ်ႉၼင်ႇ ၵႂၼ်းၽႆးလႄႈလိၼ်မိူင်းၼႆႉ တၵ်းၵဝ်ႇမွင်ၵႂႃႇ မိူၼ်ၸိူဝ်ႉၼင်ႇၶူဝ်းၼုင်ႈၼၼ်ႉဢေႃႈ။ ၵူၼ်းလိၼ်မိူင်းတင်းလၢႆ တၵ်းလႆႈတၢႆ မိူၼ်ၸိူဝ်ႉၼင်ႇၼၼ်ဢေႃႈ။ တြႃးတၢင်းဢၼ်ၵႄႇသႄႇၶျွတ်ႈဢဝ်ၵဝ်ၸမ်ႉ၊ တၵ်းတႄႇယူႇသေႇသေႇလႄႈ တြႃးတၢင်းဢၼ်သိုဝ်ႈတေႃႇၵဝ်ၵေႃႈ ဢမ်ႇမီးတၢင်းဢၼ်ႁၢႆလၢႆၵႂႃႇလႆႈ။-

7သူၸိူဝ်းဢၼ် ႁူႉတြႃးတၢင်းဢၼ်သိုဝ်ႈတေႃႇ ဢၼ်ဝႃႈ မဵဝ်းၵူၼ်း ဢၼ်ဢဝ်တြႃးၵဝ်သႂၢင်းသႂ်ႇဝႆႉ ၵႃႈၼႂ်းႁူဝ်ၸႂ်မႅၼ်ႈ ၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းၵႂၢမ်းၵဝ်တႃႉ။ ယႃႇပေမႆႈၸႂ်လူၺ်ႈလွင်ႈဢၼ် ၵူၼ်းတင်းလၢႆ တၵ်းတၢင်ႇဢပႅတ်ႈၼၼ်ႉ။ ယႃႇပေၵူဝ်ပေႁႄ တၢင်းဢၼ်ၶဝ်သႄႉသွမ်းၼၼ်ႉ။-

8လွင်ႈမၼ်းၸမ်ႉ မူင်ႈတၵ်းၶူပ်းၵိၼ်ၶဝ် မိူၼ်ၸိူဝ်ႉၼင်ႇၶူဝ်းၼုင်ႈၼၼ်ႉလႄႈ မႅင်းတၵ်းၶူပ်းၵိၼ်ၶဝ်မိူၼ်ၸိူဝ်ႉၼင်ႇ ၶူဝ်းၼုင်ႈၶူၼ်သူဝ်းၼၼ်ႉဢေႃႈ။ တြႃးတၢင်းဢၼ်သိုဝ်ႈတေႃႇၵဝ်ၸမ်ႉ၊ပဵၼ်ၼိၵ်ႈၸႃႉ ထႃႇဝရႃႉလႄႈ တြႃးတၢင်းဢၼ် ၵႄႇသႄႇၶျွတ်ႈဢဝ်ၵဝ်ၵေႃႈ တၵ်းတႄႇယူႇ ၵူႈၸူဝ်ႈၵူႈပၢၼ် သိုပ်ႇသိုပ်ႇတၢမ်းတၢမ်းဢေႃႈ။-

9ၶႅၼ်မိုဝ်း ထႃႇဝရႃႉၽြႃး တီႈၶႃႈဢိူၺ်း၊ တိုၼ်ႇမႃးသေၵမ်းတီႈၶႃႈ၊ တိုၼ်ႇမႃးလႄႈဢဝ်ႁႅင်းသေၵမ်းတီႈၶႃႈ၊ တိုၼ်ႇမႃးမိူၼ်ၸိူဝ်ႉၼင်ႇ မိူဝ်ႈၵွၼ်ႇဢွၼ်ၼႆႉၼၼ်ႉ ဢိၵ်ႇတင်း မိူဝ်ႈမိုၼ်ႉၸိုၼ်ႉသိုၼ်း ဢၼ်ယၢမ်ႈပူၼ်ႉမႃးယဝ်ႉၼၼ်ႉ သေၵမ်းတီႈၶႃႈ၊ ၸဝ်ႈႁဝ်းပဵၼ်ၸဝ်ႈဢၼ်တႅပ်းၽၼ်း ရႃႇၶပ်ႉ ပႅတ်ႈလႄႈ တႅင်းသႂ်ႇၼၵႃးပႅတ်ႈၼၼ်ႉ ဢမ်ႇၸႂ်ႈတီႈၶႃႈႁိုဝ်။-

10ၸဝ်ႈႁဝ်းပဵၼ်ၸဝ်ႈဢၼ် ႁႂ်ႈၼမ်ႉပၢင်ႇလၢႆႇ၊ ၼမ်ႉတီႈဢၼ်လိုၵ်ႉဢၼ်လမ်ႇတင်းလၢႆယူတ်းႁႅင်ႈလႄႈ ႁႂ်ႈတီႈဢၼ်လိုၵ်ႉဢၼ်လမ်ႇ ပၢင်ႇလၢႆႇတင်းလၢႆ ပဵၼ်သဵၼ်ႈတၢင်းတီႈဢၼ် ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ထုတ်ႇဢဝ် ၼမ်ၼႃႇတၵ်းၸွမ်းၵႂႃႇၼၼ်ႉ ဢမ်ႇၸႂ်ႈတီႈၶႃႈႁိုဝ်။-

11ပိူဝ်ႈၼႆလႄႈ ၶဝ်ၸိူဝ်းဢၼ် ထႃႇဝရႃႉၽြႃး ထုတ်ႇဢဝ်ၼၼ်ႉ တၵ်းဢွၼ်ၵၼ်ၶိုၼ်းမႃးလႄႈ ႁဵတ်းၵႂၢမ်းယူႇသေလႄႈ ႁွတ်ႈထိုင်ၵႃႈတီႈဝဵင်း ၸီႉဢုၼ်ႇ လႄႈ တိုဝ်းသရၽူႇ တၢင်းဢၼ်ၸူမ်းသိူဝ်းထႃႇဝရႃႉ သေလႄႈ လႆႈဢၶႂၢင်ႉတၢင်းဢၼ်ၸူမ်းသိူဝ်း။ တၢင်းဢၼ် သႂၢင်ႇၸႂ်လႄႈ တၢင်းဢၼ်မႆႈၸႂ်ၶီၸႂ် ဢိၵ်ႇတင်းတၢင်းဢၼ် ၶၢင်းၶီၶၢင်းၽၢၼ်ၸိူဝ်းၼၼ်ႉ တၵ်းဢွၼ်ၵၼ်ဢွၵ်ႇပၢႆႈၵႂႃႇဢေႃႈ။-

12ၵဝ်ၼႆႉယဝ်ႉ၊ ၵဝ်ၼႆႉယဝ်ႉပဵၼ်ၵေႃႉဢၼ် ႁႂ်ႈၸႂ်သူသၢၵ်ႈသႃႇဢေႃႈ။ မႂ်းပဵၼ်ၵူၼ်းၸိူဝ်ႉၼင်ႇႁိုဝ်လႄႈ မႂ်းၵူဝ်ႁႄၵူၼ်းဢၼ်ၸၢင်ႈတၢႆ၊ လုၵ်ႈၵူၼ်းဢၼ်ၸၢင်ႈပဵၼ်ၸိူဝ်ႉၼင်ႇ တူၼ်ႈယိူဝ်ႈတူၼ်ႈယႃႈ၊-

13ဢၼ်လူင်လိုမ်း ထႃႇဝရႃႉၽြႃး ဢၼ်ႁဵတ်းပဵၼ်မႂ်း၊ ဢၼ်ၶဵင်ႈမုင်းၽႃႉၵၢင်ႁၢဝ် ဢၼ်တႄႇႁဵတ်းလိၼ်မိူင်းၼၼ်ႉပႅတ်ႈ သေလႄႈ တူၵ်းၸႂ်လႂ်တိုၼ်ႇယူႇ တင်းဝၼ်းတင်းဝၼ်း ၵွပ်ႈပိူဝ်ႈတေႃးသႃႉ တၢင်းၸႂ်မႆႈၶႆႈၸႃႉ ၵေႃႉဢၼ် ၼိၵ်ႈၸၢၵ်ႈငႅၼ်းသႄးၼၼ်ႉ မိူဝ်ႈဢၼ် မႄးႁႅၼ်းႁႂ်ႈလႆႈယႃႉပႅတ်ႈၼၼ်ႉ။ မိူဝ်ႈလဵဝ်ၼႆႉ၊ တေႃးသႃႉ တၢင်းၸႂ်မႆႈၶႆႈၸႃႉ ၵေႃႉဢၼ် ၼိၵ်ႈၸၢၵ်ႈငႅၼ်းသႄးၼၼ်ႉ မီးၵႃႈလႂ်။-

14ၵေႃႉဢၼ်လႆႈၶၢမ်ႇတၢင်းဢၼ် ၶျုၵ်ႈဝႆႉၼၼ်ႉ တၵ်းႁွတ်ႈထိုင်တၢင်းဢၼ် ၵႄႇသႄႇၼုၵ်ႈဢဝ်ဢွၵ်ႇၶၼ်ၶၼ်ၽႂ်းၽႂ်းလႄႈ တၵ်းဢမ်ႇလႆႈတၢႆ ၵႃႈၼႂ်းထွင်ႇၼႂ်းၵႃး။ တၢင်းၵိၼ်တၢင်းၶူပ်းၶဝ်တၵ်းဢမ်ႇလႆႈထၢတ်ႇလႆႈပျၢတ်ႈ။-

15ၵဝ်ပဵၼ် ထႃႇဝရႃႉၽြႃး ၽြႃးပဵၼ်ၸဝ်ႈမႂ်း ဢၼ်ယႃႉတဝ် ၼမ်ႉသမ်ႇမုၵ်ႉတြႃႇလႄႈ ႁႂ်ႈလႅင်းၼမ်ႉပိူပ်ႈၼမ်ႉမၼ်းဢူၼ်ဢဵၼ်မေႃးမႄး ဢေႃႈ။ ၼႃႇမႃႉၸိုဝ်ႈသဵင်မၼ်းၸဝ်ႈ ၼၼ်ႉၸမ်ႉ၊ ပဵၼ်ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးဢေႃႈ။-

16ၵဝ်ဢဝ်ၵႂၢမ်းၵဝ်သႂ်ႇဝႆႉၵႃႈၼႂ်းသူပ်းမႂ်းလႄႈ ဢဝ်မႂ်းဝႆႉၵႃႈတႂ်ႈႁူမ်ႈ ၵွင်ႉငဝ်းမိုဝ်းၵဝ် ႁႂ်ႈၵဝ်လႆႈႁဵတ်းပဵၼ်ၽႃႉၵၢင်ႁၢဝ်လႄႈ ၶျႃးငဝ်ႈႁၢၵ်ႈတိူၵ်ႈလိၼ်မိူင်းဝႆႉ ဢိၵ်ႇတင်းႁႂ်ႈလႆႈလၢတ်ႈတီႈဝဵင်း ၸီႉဢုၼ်ႇ လႄႈဝႃႈ၊ မႂ်းပဵၼ်မဵဝ်းၵူၼ်းၵဝ်ဢေႃႈ၊ ဝႃႈၼင်ႇၼႆၼၼ်ႉယဝ်ႉ။

17ဝဵင်း ယေႇရူႉသလႅမ်ႇ ဢၼ်သူတ်ႉၵိၼ်ၵွၵ်းတေႃးသႃႉ တၢင်းၸႂ်မႆႈၶႆႈၸႃႉတီႈမိုဝ်း ထႃႇဝရႃႉၽြႃးဢိူၺ်း၊ တိုၼ်ႇမႃးတႃႉ။ တိုၼ်ႇမႃးလႄႈလုၵ်ႉတႃႉ။ မႂ်းသူတ်ႉၵိၼ်ၵွၵ်းဝၢၼ်ႇတၢင်းဢၼ်ဝၢင်ႇဢၼ်ဝိူဝ်ႈၼၼ်ႉမႃးယဝ်ႉ။ ယိူဝ်ႇမၼ်းယေႇမၼ်းၵေႃႈမိပ်ႇမႃးယဝ်ႉ။-

18ၼႂ်းလုၵ်ႈလၢင်းၵႃႈဢၼ်မၼ်းၵိူတ်ႇလဵင်ႉမႃးၸိူဝ်းၼၼ်ႉ၊ ဢမ်ႇမီးၵေႃႉဢၼ်ၼႄပၼ်တၢင်း တီႈမၼ်းသေၵေႃႉသေၵူၼ်း။ ၼႂ်းလုၵ်ႈလၢင်းၵႃႈဢၼ် မၼ်းလဵင်ႉလူၸိူဝ်းၼၼ်ႉ ဢမ်ႇမီးၵေႃႉဢၼ် တိုတ်ႉၸုင်ဢဝ်မိုဝ်းမၼ်း သေၵေႃႉသေၵူၼ်း။-

19ၽေးသွင်ပႃးဢၼ်ဝႃႈ တၢင်းဢၼ် သဵတ်ႇၵူၼ်းယဵၼ်ၵူၼ်းလႄႈလူႉလႅဝ်၊ တၢင်းဢၼ်ဢိုပ်းယၢၵ်ႈလႄႈ ယႃႉပႅတ်ႈလူၺ်ႈလၢပ်ႇလူၺ်ႈလႅဝ်းၼၼ်ႉ ႁွတ်ႈထိုင်ၵႃႈၼိူဝ်မႂ်းလႄႈ ၽူႈလႂ်တၵ်းႁွင်ႉႁႆႈပွင်ႉၶၢင်းပုၼ်ႈမႂ်း၊ ၵဝ်တၵ်းပၼ် ၵတ်းယဵၼ်ၶျၢမ်းသႃႇလႆႈၸိူဝ်ႉၼင်ႇႁိုဝ်။-

20လုၵ်ႈလၢင်းမႂ်းၸိူဝ်းၼၼ်ႉလိုမ်းတူဝ်လိုမ်းႁၢင်ႈယူႇဢေႃႈ။ ၶဝ်ဢွၼ်ၵၼ်ၼွၼ်းယူႇၵႃႈတီႈသူပ်းတႃႈသူပ်းတၢင်းၵႃႈမီး မိူၼ်ၸိူဝ်ႉၼင်ႇ တိုင်ဢၼ်ထုၵ်ႇၶဵၼ်းမႅၼ်ႈ တူင်ႇႁႅဝ်ႉၼၼ်ႉလႄႈ ဢိမ်ႇတဵမ်ဝႆႉတင်းတေႃးသႃႉ တၢင်းၸႂ်မႆႈၶႆႈၸႃႉ ထႃႇဝရႃႉၽြႃးဢၼ်ဝႃႈ တၢင်းဢၼ်ၽြႃးပဵၼ်ၸဝ်ႈမႂ်း သင်ႇသွၼ်သုင်းမႃႉၼၼ်ႉဢေႃႈ။-

21ပိူဝ်ႈၼႆလႄႈ မႂ်းဢၼ်လႆႈၶၢမ်ႇတၢင်းဢၼ် ၼိၵ်ႈၸၢၵ်ႈငႅၼ်းသႄးမဝ်းလဝ်ႈ ၼွၵ်ႈသေၼမ်ႉၸပိတ်ႈၼၼ်ႉၼႆႉဢိူၺ်း၊ ထွမ်ႇငိၼ်းတႃႉ။-

22ၸဝ်ႈမႂ်း ထႃႇဝရႃႉၽြႃး ၽြႃးပဵၼ်ၸဝ်ႈမႂ်း ဢၼ်ပႂ်ႉဢမူႉၵူၼ်းမၼ်းၸဝ်ႈတင်းလၢႆယူႇၼၼ်ႉ မီးဢမိင်ႉဝႆႉၸမ်ႉ၊ တူၺ်းလူး၊ ၵဝ်ၼုၵ်ႈဢဝ် ၵွၵ်းတၢင်းဢၼ်ဝၢင်ႇဢၼ်ဝိူဝ်ႈ ဢၼ်ဝႃႈ၊ ၵွၵ်းဝၢၼ်ႇတေႃးသႃႉ တၢင်းၸႂ်မႆႈၶႆႈၸႃႉၵဝ်ၼၼ်ႉ ဢွၵ်ႇသေၵႃႈၼႂ်းမိုဝ်းမႂ်းလႄႈ ၵမ်းလိုၼ်းမႂ်း ဢမ်ႇလႆႈၵိၼ်လႆႈသူတ်ႉမၼ်း။-

23ၵဝ်တၵ်းဢဝ်ၵွၵ်းၼၼ်ႉ ဝႆႉၵႃႈၼႂ်းမိုဝ်းၶဝ်ၸိူဝ်းဢၼ် ၼိၵ်ႈၸၢၵ်ႈငႅၼ်းသႄးမႂ်းလႄႈ လၢတ်ႈတီႈဝီႉၺိၺ်ႇမႂ်းလႄႈဝႃႈ၊ ၵူမ်ႈမူပ်ႇယူႇ ႁႂ်ႈႁဝ်းလႆႈယဵပ်ႇၶၢမ်ႈၵႂႃႇၵႃႈၼိူဝ်မႂ်းတႃႉ၊ ဝႃႈၼင်ႇၼႆလႄႈ မႂ်းလႆႈၼွၼ်းၶႂမ်ႈယဵတ်ႇတဵတ်ႇယူႇ၊ ပဵၼ်ၸိူဝ်ႉၼင်ႇ ၽႅၼ်ႇလိၼ်ဢိၵ်ႇတင်း ပဵၼ်ၸိူဝ်ႉၼင်ႇ သဵၼ်ႈတၢင်းၼၼ်ႉ တီႈၶဝ်ၸိူဝ်းဢၼ် ၵႂႃႇတၢင်းပႆတၢင်းၼၼ်ႉဢေႃႈ။

← Chapter 50 Jump to: Chapter 52 →