Isaiah 9

Shan

← Chapter 8 Jump to: Chapter 10 →

1ၼႂ်းဝႃႈၼၼ်သေၵေႃႈ မိူင်းဢၼ်လႆႈၶၢမ်ႇတုၵ်ႉၶႃႉတၢင်းၽၢၼ်ၼၼ်ႉ၊ ၵမ်းလိုၼ်းတၵ်းၵၢင်းလွတ်ႈ တင်းလပ်းသိင်ႇဢေႃႈ။ မိူဝ်ႈဢွၼ် ၼႆႉၼၼ်ႉ မၼ်းၸဝ်ႈၶျႃးဢိူင်ႇ ၸေႇပူႉလုၼ်ႇ တင်းဢိူင်ႇ ၼပ်ႉထလီႉ တူၵ်းတီႈတႅမ်ႇဢေႃႈ။ ၵူၺ်းၵႃႈမိူဝ်ႈၵမ်းလိုၼ်းမၼ်းၸဝ်ႈ တၵ်းႁႂ်ႈသဵၼ်ႈတၢင်းဢၼ်တႆႇၸွမ်းႁိမ်းၼွင်ၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ ၊ မိူင်း ၵႃႇလီႉလႄး တီႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆယူႇၼၼ်ႉ ပျေႉၸုမ်ႇဝႆႉတင်း မုၼ်သရေႇဢေႃႈ။-

2ၵူၼ်းဢၼ်ၵႂႃႇမႃးၼႂ်းလပ်းသိင်ႇတင်းလၢႆ လႆႈႁၼ်ဢၼ်လႅင်းဢၼ်ယႂ်ႇၼႃႇလူင်လၢင်လႄႈ၊ ဢၼ်လႅင်းပေႃႇမႃး ႁိူဝ်ႈလႅင်း ၵႃႈတီႈၵူၼ်းဢၼ်မီးယူႇၼႂ်း ႁူမ်ႈတၢင်းတၢႆၼၼ်ႉယဝ်ႉ။-

3ၸဝ်ႈႁဝ်းႁႂ်ႈၵူၼ်းဝၢၼ်ႈၵူၼ်းမိူင်းၼမ်ၵိုၼ်းၼႃႇလႄႈ ႁႂ်ႈတၢင်းဢၼ်ၸူမ်းသိူဝ်းၶဝ်ယႂ်ႇၵႂၢင်ႈမႃးဢေႃႈ။ ၶဝ်ၼၼ်ႉလႆႈၸူမ်းသိူဝ်းၵႃႈတီႈၽၢႆႇၼႃႈၸဝ်ႈႁဝ်း မိူၼ်ၸိူဝ်ႉၼင်ႇဢၼ် ၸူမ်းသိူဝ်းၼႂ်းၶိင်ႇဢၼ်ၸူႉသိမ်းဢဝ်ၶဝ်ႈပိူၵ်ႇၼၼ်ႉဢိၵ်ႇတင်း ၸိူဝ်ႉၼင်ႇဢၼ်ၶဝ်ၸိူဝ်းဢၼ်ၸူမ်းသိူဝ်းၼႂ်းမိူဝ်ႈဢၼ် ၽႄဢုၵ်ႉၸႃႇ ဢၼ်ႁိမ်ႁူင်ႇဢဝ်လႆႈၼၼ်ႉမႅင်ႇပၼ်ၵၼ်ၼၼ်ႉဢေႃႈ။-

4လွင်ႈမၼ်းၸမ်ႉ ၸဝ်ႈႁဝ်းႁၵ်းႁဵၵ်းၵၢၼ်း ဢၼ်ၶဝ်လႆႈႁၢပ်ႇ၊ ၶွၼ်ႉဢၼ်ၶဝ်လႆႈၶၢမ်ႇၵႃႈတီႈမႃႇတီႈလင်၊ ၵၼ်းႁွၵ်ႇၵေႃႉဢၼ်ၼိၵ်ႈၸၢၵ်ႈ ငႅၼ်းသႄးၶဝ်ၼၼ်ႉပႅတ်ႈ မိူၼ်ၸိူဝ်ႉၼင်ႇဢၼ်ၸဝ်ႈႁဝ်း ႁဵတ်းၼႂ်းၸူဝ်ႈပၢၼ် မီႉတျၼ်ႇ ၼၼ်ႉယဝ်ႉ။-

5သွၵ်းတိၼ်ၵူၼ်းသိုၵ်း ဢၼ်တိုၵ်းသိုၵ်းဢိၵ်ႇတင်းၶူဝ်းၼုင်ႈတၢင်းမႆ ဢၼ်ၵူဝ်ႈလိူတ်ႈၵႃႈမီးၼၼ်ႉ တၵ်းလႆႈပဵၼ်ပုၼ်ႈဢၼ် တၵ်းတုတ်ႇၽႆး တီႈဢၼ်ၽႆးတၵ်းၵိၼ်ဢေႃႈ။-

6လွင်ႈမၼ်းၸမ်ႉ လုၵ်ႈဢွၼ်ႇလႆႈၶၢမ်ႇတၢင်းဢၼ်ၵိူတ်ႇလဵင်ႉမႃးပုၼ်ႈႁဝ်းလႄႈ လုၵ်ႈၸၢႆးလႆႈၶၢမ်ႇတၢင်းဢၼ်ဢဵတ်းလူပၼ်တီႈႁဝ်းဢေႃႈ။ ဢႃႇၼႃႇၸၢၵ်ႈတၢင်းဢၼ်ဢုပ်ႉပိူင်ႇ တၵ်းမီးၵႃႈၼိူဝ်ႁူဝ်မႃႇမၼ်းၼၼ်ႉလႄႈ ၼႃႇမႃႉၸိုဝ်ႈသဵင်မၼ်းၼၼ်ႉ တၵ်းလႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈ လီဢၢမ်း၊ ၵေႃႉဢၼ်ႁူမ်ႈတိူင်ႇပၢင်ႇ၊ ၽြႃးပဵၼ်ၸဝ်ႈဢၼ်တၼ်းၶူဝ်းယႂ်ႇ၊ ပေႃႈထႃႇဝရႃႉ၊ ၸဝ်ႈတၢင်းၼိမ်ဢေႃႈ။-

7တၢင်းဢၼ်ဢႃႇၼႃႇၸဝ်ႈ ယႂ်ႇၽႄႈတူဝ်းတွၼ်းမႃး ဢိၵ်ႇတင်းတၢင်းဢၼ်မၼ်းၸဝ်ႈ တႄႇၼိမ်ၼၼ်ႉ တၵ်းလႆႈမီးယူႇ ၼိၵ်ႈၸႃႉထႃႇဝရႃႉ ၵႃႈၼိူဝ်ရႃႇၸႃႉပလၢင်ႇၶုၼ် တႃႇဝိတ်ႈ ဢိၵ်ႇတင်းၵႃႈၼိူဝ်သိုင်ႇၸိုင်ႈဝၢၼ်ႈမိူင်းမၼ်း ႁႂ်ႈလႆႈတႄႇယူႇ ဢိၵ်ႇတင်း ႁႂ်ႈလႆႈမၼ်ႈၶိူင်ႇယူႇလူၺ်ႈၵၼ် တၢင်းဢၼ်ၸီႇယၢင်ႇၸွမ်းၼင်ႇတြႃး ဢိၵ်ႇတင်းတၢင်းဢၼ်သိုဝ်ႈတေႃႇၼၼ်ႉ၊ ဢဝ်ၸႃႉၸဵမ်မိူဝ်ႈၼႆႉ ၵႂႃႇမိူဝ်းၼႃႈၵူႈၸူဝ်ႈၵူႈပၢၼ် သိုပ်ႇသိုပ်ႇတၢမ်းတၢမ်းဢမ်ႇထၢတ်ႇဢေႃႈ။ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၼၼ်ႉ ဢလူဝ်ႇၸဝ်ႈႁႅင်းယႂ်ႇၼႃႇလႄႈ တၵ်းႁႂ်ႈ လွင်ႈတၢင်းၼၼ်ႉယဝ်ႉတူဝ်ႈဢေႃႈ။

8ၸဝ်ႈၽြႃးပွႆႇပျႃႇတိၵ်ႈၸဝ်ႈ ၸူးတီႈမဵဝ်း ယႃႇၵုပ်ႈ လႄႈ ႁႂ်ႈတူၵ်းႁွတ်ႈၵႃႈၼိူဝ် မဵဝ်း ဢီႉသရေႇလႃႉ ဢေႃႈ။-

9ၵူၼ်းတင်းသဵင်ႈတင်းလူင်ဢၼ်ဝႃႈ ၵူၼ်း ဢေႇၽရိမ်ႇ ဢိၵ်ႇတင်းၵူၼ်း သမႃႇရီႉ လႂ် ဢၼ်မီးမႃႇၼႃႉယႂ်ႇၼႃႇ ႁူဝ်ၸႂ်ပူၵ်းပႅၼ်ၼႃႇ လႄႈဝႃႈ၊ ပိၵ်ႉသမ်ႉလမ်းဢုတ်ႇလူမ်ႉပင်းသေၵေႃႈ၊ ႁဝ်းတၵ်းဢဝ်တင်းမၢၵ်ႇႁိၼ် ဢၼ်ထၢၵ်ႇႁဵတ်းသပ်းႁဵတ်းၼၼ်ႉ ၶိုၼ်းတႄႇဢေႃႈ။-

10ပိၵ်ႉသမ်ႉတူၼ်ႈမၢၵ်ႇလိူဝ်ႇ တင်းလၢႆ လႆႈၶၢမ်ႇတၢင်းဢၼ်ပမ်ႈလူမ်ႉပႅတ်ႈသေၵေႃႈ ႁဝ်းတၵ်းဢဝ်တူၼ်ႈ ဢႃႇရိတ်ႉ တင်းလၢႆ ၽုၵ်ႇသႂ်ႇဝႆႉ ၵႃႈတီႈႁွႆးၶဝ်ၼၼ်ႉဢေႃႈ၊ ဝႃႈၼင်ႇၼႆၼၼ်ႉ တၵ်းလႆႈႁူႉဢေႃႈ။-

11ပိူဝ်ႈၼႆလႄႈ ထႃႇဝရႃႉၽြႃး တၵ်းယုၵ်ႉယွင်ႈ ဢၼ်ပဵၼ်ရၢၼ်ႇသူႇၶုၼ် ရေႇၸိၼ်း ၼၼ်ႉ ယူႇၽၢႆႇၼိုင်ႈ တင်းၶဝ်ၼၼ်ႉလႄႈ၊ ႁႂ်ႈရၢၼ်ႇသူႇၶဝ်လုၵ်ႉလႄႈ၊-

12ၵႃႈတီႈၽၢႆႇၼႃႈၸမ်ႉ၊ ၵူၼ်း သူႉရီႉ တင်းလၢႆ၊ ၵႃႈတီႈၽၢႆႇလင်ၸမ်ႉ၊ ၵူၼ်း ၽီႉလိတ်ႉတီႉ တင်းလၢႆ တၵ်းဢွၼ်ၵၼ်ဢႃႈပၢၵ်ႇသေလႄႈၶူပ်းၵိၼ်မဵဝ်း ဢီႉသရေႇလႃႉ ဢေႃႈ။ ၼႂ်းဝႃႈၼၼ်သေၵေႃႈ တၢင်းၸႂ်မႆႈၶႆႈၸႃႉမၼ်းၸဝ်ႈဢမ်ႇထၢတ်ႇဢမ်ႇယဵၼ်။ မိုဝ်းမၼ်းၸဝ်ႈၼၼ်ႉယင်းယဵတ်ႇယူႇဢေႃႈ။-

13ၵူၺ်းၵႃႈ ၵူၼ်းတင်းလၢႆၼႆႉ ဢမ်ႇဝၢႆႇဢမ်ႇၶိုၼ်းမႃးၸူးၵႃႈတီႈမၼ်းၸဝ်ႈ ဢၼ်ပၼ်တၢမ်ႇတီႈၶဝ်။ ဢမ်ႇၸၢင်ႈသွၵ်ႈၸၢင်ႈႁႃ ၸဝ်ႈပူဝ်ႇပႃႇ ၵၢင်ႁၢဝ်ထႃႇဝရႃႉၽြႃး။-

14ပိူဝ်ႈၼႆလႄႈ ထႃႇဝရႃႉၽြႃးၼၼ်ႉ တၵ်းတႅပ်းၵွၵ်းႁူဝ်တင်းႁၢင်၊ မႂ်ထၢၼ်တင်းတူၼ်ႈၶႅမ်ၶၢတ်ႇပႅတ်ႈသေ ၵႃႈတီႈ မဵဝ်း ဢီႉသရေႇလႃႉ ၼႂ်းဝၼ်းလဵဝ်ၵူၺ်းဢေႃႈ။-

15ၵွၵ်းႁူဝ်ၸမ်ႉ၊ ပဵၼ်ၵေႃႉဢၼ်ဢသၢၵ်ႈယႂ်ႇ ဢိၵ်ႇတင်းၵေႃႉဢၼ်မီးသရေႇလႄႈ ႁၢင်ၸမ်ႉ၊ ပဵၼ်ပရေႃးၽႅတ်ႈဢၼ်ႁေႃးလၢတ်ႈမူႉသႃႇဢေႃႈ။-

16ၶဝ်ၸိူဝ်းဢၼ်ၼႄပျႃး သဵၼ်ႈတၢင်းတီႈၵူၼ်းတင်းလၢႆၼႆႉၼၼ်ႉ ဢွၼ်ၵၼ်ၼႄပျႃး ႁႂ်ႈၶဝ်ၽိတ်းတၢင်းပိူင်ႈတၢင်းလႄႈၶဝ်ၸိူဝ်းဢၼ်ၸွမ်းၶဝ်ၼၼ်ႉ တၵ်းႁွတ်ႈထိုင်တၢင်းလူႉတၢင်းလႅဝ်ဢေႃႈ။-

17ပိူဝ်ႈၼႆလႄႈ ၸဝ်ႈၽြႃးဢမ်ႇၶိုတ်းၸႂ်ပဵင်းၸႂ် တီႈၵူၼ်းၼုမ်ႇၵူၼ်းၵမ်ၶဝ်ၼၼ်ႉ။ ဢမ်ႇဢဵတ်းလူလုၵ်ႈဢွၼ်ႇ ဢၼ်ၽၢၼ်ပေႃႈ ၽၢၼ်မႄႈၶဝ် ဢိၵ်ႇတင်းမႄႈမူၵ်းမႄႈမၢႆႈၶဝ်ၼၼ်ႉ။ ၶဝ်တင်းသဵင်ႈတင်းလူင် ပဵၼ်ၵေႃႉဢၼ်ႁၢႆႉမိူၵ်ႈ၊ ၵေႃႉဢၼ်ႁဵတ်းဢႃႉထမ်ႇမႃႉလႄႈ သူပ်းၶဝ်ၵူႈၵေႃႉၵူႈၵူၼ်း ၸၢင်ႈလၢတ်ႈၵႂၢမ်းဢၼ်ဢမ်ႇတြႃးဢေႃႈ။ ၼႂ်းဝႃႈၼၼ်သေၵေႃႈ တၢင်းၸႂ်မႆႈၶႆႈၸႃႉမၼ်းၸဝ်ႈဢမ်ႇထၢတ်ႇဢမ်ႇယဵၼ်။ မိုဝ်းမၼ်းၸဝ်ႈၵေႃႈယင်းယဵတ်ႇယူႇဢေႃႈ။-

18တၢင်းဢၼ်ႁၢႆႉဢၼ်မိူၵ်ႈၼၼ်ႉ ၸၢင်ႈမႆႈၸိူဝ်ႉၼင်ႇၽႆးလႄႈ ႁႂ်ႈတူၼ်ႈၼၢမ်ၵူႈၸိူဝ်ႉၵူႈမဵဝ်းမႆႈသုတ်းပႅတ်ႈဢေႃႈ။ ၽႆးၸပ်း ယုမ်းထိူၼ်ႇတင်းလၢႆလႄႈ ၸိူဝ်းၼၼ်ႉပိဝ်ၶိုၼ်ႈလူၺ်ႈၵႂၼ်းၽႆးဢၼ်ၼႃတၼ်ၼႃႇၼၼ်ႉဢေႃႈ။-

19ၵွပ်ႈပိူဝ်ႈတၢင်းၸႂ်မႆႈၶႆႈၸႃႉၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၼၼ်ႉလႄႈ လိၼ်ၼႆႉမႆႈသုတ်းပႅတ်ႈလႄႈ ၵူၼ်းတင်းလၢႆပဵၼ်ၽိုၼ်း ပုၼ်ႈဢၼ်တၵ်းၸိုၵ်းၽႆးသုမ်ၽႆးဢေႃႈ။ ပီႈၵၼ်ၼွင်ႉၵၼ် ၵေႃႉၼိုင်ႈတၵ်းဢမ်ႇလႆႈသေလၢႆၵေႃႉၼိုင်ႈ။-

20ပိၵ်ႉသမ်ႉတႅပ်းၽၼ်းဢဝ် ၵႃႈတီႈၽၢႆႇၶႂႃသေၵေႃႈ တၵ်းဢိုပ်းယၢၵ်ႈယူႇလႄႈ ၶူပ်းငၢၼ်ႈၵႃႈတီႈၽၢႆႇသၢႆႉသေၵေႃႈ တၵ်းဢမ်ႇလႆႈဢိမ်ႇ လႆႈတဵမ်။ ၵူၼ်းၵူႈၵေႃႉတၵ်းလႆႈၶူပ်းၵိၼ်ၼိူဝ်ႉၵူၼ်းႁိူၼ်းၸမ်ၵၼ်ဢေႃႈ။-

21မဵဝ်း မၼႃႇသေႇ တင်းမဵဝ်း ဢေႇၽရိမ်ႇ ၊ မဵဝ်း ဢေႇၽရိမ်ႇ တင်းမဵဝ်း မၼႃႇသေႇ တၵ်းၶူပ်းၵိၼ်ၵၼ်ဢေႃႈ။ တင်းသွင်မဵဝ်း ၼၼ်ႉ တၵ်းၽွမ်ႉၵၼ်ယူႇၽၢႆႇၼိုင်ႈ တင်းမဵဝ်း ယူႉတႃႉ ဢေႃႈ။ ၼႂ်းဝႃႈၼၼ်သေၵေႃႈ တၢင်းၸႂ်မႆႈၶႆႈၸႃႉမၼ်းၸဝ်ႈဢမ်ႇထၢတ်ႇဢမ်ႇယဵၼ်။ မိုဝ်းမၼ်းၸဝ်ႈၵေႃႈယင်းယဵတ်ႇယူႇဢေႃႈ။

← Chapter 8 Jump to: Chapter 10 →