Isaiah 59

Shan

← Chapter 58 Jump to: Chapter 60 →

1တူၺ်းလူး၊ မိုဝ်းထႃႇဝရႃႉၽြႃး ပွတ်းထၼ်ႈပေႃး ဢမ်ႇၵႄႇသႄႇၶျွတ်ႈဢဝ်လႆႈဢမ်ႇၸႂ်ႈ။ ႁူမၼ်းၸဝ်ႈၼၵ်းထၼ်ႈပေႃးဢမ်ႇငိၼ်းလႆႈဢမ်ႇၸႂ်ႈ။-

2တူႉၸရိူၵ်ႈသူတင်းလၢႆ ႁႂ်ႈသူၽၢတ်ႇယၢၼ်ၵၼ်တင်း ၽြႃးပဵၼ်ၸဝ်ႈသူယဝ်ႉ။ ဢပႅတ်ႈသူၸိူဝ်းၼၼ်ႉ ႁႂ်ႈၼႃႈမၼ်းၸဝ်ႈ ဝၢႆႇပႅတ်ႈသူ၊ ႁႂ်ႈမၼ်းၸဝ်ႈဢမ်ႇလႆႈငိၼ်းသူယဝ်ႉ။-

3မိုဝ်းသူၸိူဝ်းၼၼ်ႉ ၵူဝ်ႈၵိူၵ်ႇဝႆႉတင်းလိူတ်ႈလႄႈ ၼိဝ်ႉမိုဝ်းသူၸိူဝ်းၼၼ်ႉ ၵူဝ်ႈၵိူၵ်ႇဝႆႉတင်းတူႉၸရိူၵ်ႈဢေႃႈ။ သီႇသူပ်းသူၼၼ်ႉ ၸၢင်ႈမွၵ်ႇၸၢင်ႈလၢတ်ႈ ၵႂၢမ်းမူႉသႃႇလႄႈ လိၼ်ႉသူၼၼ်ႉ ၸၢင်ႈၶႆႈၸၢင်ႈလၢတ်ႈၵႂၢမ်းဢႃႉထမ်ႇမႃႉဢေႃႈ။-

4ၽူႈလႂ်ဢမ်ႇႁဵတ်းဢမူႉၸွမ်းၼင်ႇတြႃး သေၵေႃႉသေၵူၼ်း။ ၽူႈလႂ်ဢမ်ႇပႂ်ႉၸွမ်းၼင်ႇသဵတ်ႈၸႃႇ သေၵေႃႉသေၵူၼ်း။ ၶဝ်ၸၢင်ႈဢိင်ပိုင်ႈဢၼတ်ႉတႃႉလႄႈ လၢတ်ႈၵႂၢမ်းမူႉသႃႇဢေႃႈ။ ၶဝ်ပႃးပတိၵ်ႉသၼ်ႇထေႇ တၢင်းၵျၢမ်ႇတၢင်းပွင်ဢၼ်ဢမ်ႇလီဢမ်ႇငၢမ်းလႄႈ ၵိူတ်ႇလဵင်ႉဢမူႉ ဢႃႉထမ်ႇမႃႉမႃးဢေႃႈ။-

5ၶဝ်ငွမ်းၶႆႇငူးႁၢႆႉလႄႈ ႁႂ်ႈတႅၵ်ႇဢွၵ်ႇမႃးယဝ်ႉ။ ယႂ်းၵူင်ႇၵၢဝ်ၵေႃႈ ၶဝ်တေႃးႁဵတ်းဢေႃႈ။ ၵေႃႉဢၼ် ၵိၼ်ၶႆႇၶဝ်ၼၼ်ႉ ၸၢင်ႈတၢႆလႄႈတၢင်းဢၼ် ၽႃႇၶႆႇၶဝ်တႅၵ်ႇၼၼ်ႉ ၸၢင်ႈဢွၵ်ႇပဵၼ်ငူးႁၢႆႉမႃးဢေႃႈ။-

6ယႂ်းဢၼ်ၶဝ်တေႃးႁဵတ်းၼၼ်ႉ တၵ်းဢမ်ႇလႆႈပဵၼ်ၶူဝ်းၼုင်ႈၶူဝ်းမႆလႄႈ ၶဝ်ဢမ်ႇလႆႈဢဝ်တၢင်းၵမ်တၢင်းၵျၢင်ႉ ၶဝ်ၼၼ်ႉႁူမ်ႇဝႆႉတူဝ်ၶဝ်။လွင်ႈတၢင်းဢၼ် ၶဝ်ႁဵတ်းၸိူဝ်းၼၼ်ႉ ပဵၼ်လွင်ႈတၢင်းဢၼ်ႁၢႆႉဢၼ်မိူၵ်ႈလႄႈ ၵႃႈၼႂ်းမိုဝ်းၶဝ်ၼၼ်ႉ မီးလွင်ႈတၢင်းဢၼ် ႁၢဝ်ႈၵျၢမ်းၼႃႇၼၼ်ႉဢေႃႈ။-

7တိၼ်ၶဝ်ၼၼ်ႉ ၸၢင်ႈၶုၼ်ႇလႅၼ်ႈ ႁႂ်ႈလႆႈႁဵတ်းလွင်ႈတၢင်းဢၼ်ဢမ်ႇတြႃးလႄႈ ၶၼ်ၽႂ်းႁႂ်ႈလႆႈထွၵ်ႇလိူတ်ႈ ၵေႃႉဢၼ်ဢမ်ႇမီးဢပႅတ်ႈၼၼ်ႉဢေႃႈ။ တၢင်းၵျၢမ်ႇတၢင်းပွင်ၶဝ်ပဵၼ် တၢင်းၵျၢမ်ႇတၢင်းပွင် ဢၼ်ႁၢႆႉဢၼ်မိူၵ်ႈလႄႈ ၼႂ်းသဵၼ်ႈတၢင်းဢၼ်ၶဝ်ၵႂႃႇ တင်းလၢႆၼၼ်ႉ၊ မီးတၢင်းဢၼ်လူႉလႅဝ်ဢိၵ်ႇတင်း တုၵ်ႉၶႃႉတၢင်းၽၢၼ်ဢေႃႈ။-

8သဵၼ်ႈတၢင်းဢၼ်ၵတ်းယဵၼ်ၶျၢမ်းသႃႇၸိုင်၊ ၶဝ်ဢမ်ႇႁူႉဢမ်ႇၸႅင်ႈ၊ ၵႃႈၼႂ်းတၢင်းဢၼ်ၶဝ်ၵႂႃႇ ၸိူဝ်းၼၼ်ႉ ဢမ်ႇပႃးတြႃး။ ၶဝ်ပွင်မႄး သဵၼ်ႈတၢင်းဢၼ်ၵူတ်ႉဝႆႉပုၼ်ႈဢၼ်ၶဝ်တၵ်းၵႂႃႇတၵ်းၸွမ်းယဝ်ႉ။ ၵေႃႉဢၼ် ၸွမ်းၵႂႃႇၼၼ်ႉၸမ်ႉ၊ ဢမ်ႇလႆႈႁူႉၵတ်းယဵၼ်ၶျၢမ်းသႃႇလႃးလႃး။

9ပိူဝ်ႈၼႆလႄႈ တၢင်းဢၼ် ၸီႇယၢင်ႇၸွမ်းၼင်ႇတြႃးၼၼ်ႉ ၵႆၵၼ်တင်းႁဝ်းလႄႈ တြႃးတၢင်းဢၼ်သိုဝ်ႈတေႃႇၼၼ်ႉ ဢမ်ႇၶိုတ်း ဢမ်ႇထိုင်တီႈႁဝ်း။ ပိၵ်ႉသမ်ႉႁဝ်းမုင်ႈမွင်းဢၼ်လႅင်းယူႇသေၵေႃႈ ပဵၼ်ဢၼ်လပ်းသိင်ႇလႄႈ၊ ပိၵ်ႉသမ်ႉႁဝ်းမုင်ႈမွင်းသၢႆဢရွင်ႇယူႇသေၵေႃႈ လႆႈၵႂႃႇမႃးယူႇ ၵႃႈၼႂ်းတၢင်းဢၼ်ဢမ်ႇပၢင်ႇဢမ်ႇၸိုၼ်ႈဢေႃႈ။-

10ႁဝ်းလႆႈၵုမ်းၵီႈၵုမ်းၵမ်း ၸွမ်းႁူဝ်ႉၸွမ်းၽႃယူႇမိူၼ်ၸိူဝ်ႉၼင်ႇ ၵေႃႉဢၼ်ဢမ်ႇႁၼ်လႆႈၼၼ်ႉလႄႈ လႆႈတဝ်ႉတီႈတဝ်ႉတႅဝ်ႇယူႇ မိူၼ်ၸိူဝ်ႉၼင်ႇ ၵေႃႉဢၼ်ဢမ်ႇမီးမၢၵ်ႇတႃၼၼ်ႉဢေႃႈ။ ႁဝ်းတိူဝ်ႉမႅၼ်ႈလႄႈလူမ်ႉၶိင်ႇၵၢင်ဝၼ်းတဵင်ႈၼၼ်ႉ မိူၼ်ၸိူဝ်ႉၼင်ႇ ၶိင်ႇၵၢင်ၶမ်ႈၼၼ်ႉလႄႈ ႁဝ်းပဵၼ်ၸိူဝ်ႉၼင်ႇ ၶဝ်ၸိူဝ်းဢၼ်တၢႆၵႂႃႇယဝ်ႉၼၼ်ႉ ၼႂ်းတီႈဢၼ်ၶွၼ်ႇၼမ်ႉမၼ်းလိၼ်လီ ၸိူဝ်းၼၼ်ႉဢေႃႈ။-

11ႁဝ်းၵႃႈမီးလႆႈဢွၼ်ၵၼ်ပွင်ႉၶၢင်းယူႇၸိူဝ်ႉၼင်ႇမီ ၼၼ်ႉလႄႈလႆႈဢိုတ်းႁွင်ႉယူႇ မိူၼ်ၸိူဝ်ႉၼင်ႇၼူၵ်ႉတူႈၼၼ်ႉဢေႃႈ။ ႁဝ်းမုင်ႈမွင်းတၢင်းဢၼ် ၸီႇယၢင်ႇၸွမ်းၼင်ႇတြႃးလႄႈ ဢမ်ႇလႆႈ။ ႁဝ်းမုင်ႈမွင်းၵျေးၸူးတၢင်းဢၼ် ၵႄႇသႄႇၶျွတ်ႈဢဝ်သေၵေႃႈ ၵႆၵၼ်တင်းႁဝ်းၼႃႇလူင်လၢင်ဢေႃႈ။-

12ဢပႅတ်ႈၶႃႈၸဝ်ႈႁဝ်းၶဝ်ၸိူဝ်းၼၼ်ႉ ၼမ်ၼႃႇလူင်လၢင် ၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။ တူႉၸရိူၵ်ႈႁဝ်းၸိူဝ်းၼၼ်ႉၶၢမ်ႇသၢၵ်ႈသေႇယူႇၽၢႆႇၼိုင်ႈတင်းႁဝ်းဢေႃႈ။ ဢပႅတ်ႈႁဝ်းၸိူဝ်းၼၼ်ႉ ၸပ်းယူႇတီႈႁဝ်းလႄႈ ႁဝ်းႁူႉတူႉၸရိူၵ်ႈဢၼ်ႁဝ်းႁဵတ်းမႅၼ်ႈ၊-

13ဢၼ်ဝႃႈ တၢင်းဢၼ်ၽိတ်းပိူင်ႈ၊ တၢင်းဢၼ်ထဵင်ပႅတ်ႈထႃႇဝရႃႉၽြႃးလႄႈ ၸုၼ်ႉပႅတ်ႈၽြႃးပဵၼ်ၸဝ်ႈႁဝ်း၊ တၢင်းဢၼ် လၢတ်ႈၵႂၢမ်းၼိၵ်ႈၸၢၵ်ႈငႅၼ်းသႄး ဢိၵ်ႇတင်း ၵႂၢမ်းတၢင်းဢၼ်ပုင်ႇၵၢၼ်ႇ၊ တၢင်းဢၼ်ၶုၵ်းၸႂ်လႆႈၶႆႈၸႂ်ထူပ်း ၵႂၢမ်းဢၼ်ဢမ်ႇၸိုဝ်ႈဢမ်ႇၸႂ်ႈလႄႈ ဝႃႈဢွၵ်ႇၵႃႈၼႂ်းႁူဝ်ၸႂ်ၼၼ်ႉ ၸိူဝ်းၼၼ်ႉယူႇဢေႃႈ။-

14တၢင်းဢၼ်ၸီႇယၢင်ႇၸွမ်းၼင်ႇ သုတ်ႈယိုတ်းၵႂႃႇလႄႈ တြႃးတၢင်းဢၼ်သိုဝ်ႈတေႃႇၼၼ်ႉ ၸုၵ်းသဝ်းယူႇၵႃႈတီႈဢၼ်ၵႆဢေႃႈ။ သဵတ်ႈၸႃႇလူမ်ႉယူႇ ၵႃႈၼႂ်းသဵၼ်ႈတၢင်းလႄႈ ၸႂ်သၽေႃးဢၼ်သိုဝ်ႈယူဝ်းၼၼ်ႉ ဢမ်ႇၶဝ်ႈမႃးလႆႈ။-

15သဵတ်ႈၸႃႇဢမ်ႇမီးလႃးလႃးလႄႈ ၵေႃႉဢၼ်ဝႄႈပႅတ်ႈတူႉၸရိူၵ်ႈၼၼ်ႉ လႆႈၶၢမ်ႇတၢင်းဢၼ်ႁိမ်ဢဝ်ႁူင်ႇဢဝ်ဢေႃႈ။ ထႃႇဝရႃႉၽြႃး ႁၼ်လွင်ႈတၢင်းၼၼ်ႉလႄႈ ၶၢၼ်ႉႁၼ်ၵွပ်ႈပိူဝ်ႈဢၼ်ဢမ်ႇမီးတၢင်းဢၼ်ၸီႇယၢင်ႇ ၸွမ်းၼင်ႇတြႃးၼၼ်ႉဢေႃႈ။

16မၼ်းၸဝ်ႈႁၼ်လွင်ႈတၢင်းဢၼ်ဢမ်ႇမီးၵူၼ်းသေၵေႃႉသေၵူၼ်းၼၼ်ႉလႄႈ မၼ်းၸဝ်ႈဢၢမ်းလွင်ႈဢၼ်ဢမ်ႇမီးၵေႃႉဢၼ်တွင်းပၢၼ်ႇ သေၵေႃႉသေၵူၼ်းၼၼ်ႉၼႃႇလူင်လၢင်ဢေႃႈ။ ပိူဝ်ႈၼႆလႄႈ ၶႅၼ်မိုဝ်းမၼ်းၸဝ်ႈ ႁဵတ်းတၢင်းဢၼ်ၵႄႇသႄႇၶျွတ်ႈဢဝ် ပုၼ်ႈမၼ်းၸဝ်ႈလႄႈ တြႃးတၢင်းဢၼ်သိုဝ်ႈတေႃႇမၼ်းၸဝ်ႈၼၼ်ႉ ထွၵ်ႈၵမ်ႉမၼ်းၸဝ်ႈယူႇဢေႃႈ။-

17မၼ်းၸဝ်ႈဢဝ်ၶိူင်ႈဢၼ် ႁႄႉၵင်ႈႁူဝ်ဢူၵ်းဢၼ်ဝႃႈ တြႃးတၢင်းဢၼ်သိုဝ်ႈတေႃႇၼၼ်ႉ ၼုင်ႈမႆလႄႈ တိုဝ်းမွၵ်ႇႁူဝ်လဵၵ်း ဢၼ်ဝႃႈ တၢင်းဢၼ် ၵႄႇသႄႇၶျွတ်ႈဢဝ်ၼၼ်ႉဢေႃႈ။ မၼ်းၸဝ်ႈ ဢဝ်ၶူဝ်းၼုင်ႈတၢင်းဢၼ်ပၼ်ဢပႅတ်ႈၼၼ်ႉ ၼုင်ႈမႆလႄႈ ဢဝ်သိူဝ်ႈယၢဝ်းတၢင်းဢၼ်ၸႂ်ႁႅင်းယႂ်ႇၼႃႇၼၼ်ႉ ၼုင်ႈႁၢင်ႈၶိူင်ႈဢေႃႈ။-

18ၸွမ်းၵႃႈၼင်ႇတၢင်းၵမ်တၢင်းၵျၢင်ႉၶဝ် ၼၼ်ႉလႄႈ မၼ်းၸဝ်ႈ တၵ်းတွပ်ႇတႅၼ်းပၼ်ဢၵျူဝ်းဢပႅတ်ႈဢၼ်ဝႃႈ တေႃးသႃႉတၢင်းၸႂ်မႆႈၼၼ်ႉ တီႈၶဝ်ၸိူဝ်းဢၼ် ႁဵတ်းၶတ်းၵၼ်တင်းမၼ်းၸဝ်ႈၼၼ်ႉ ဢိၵ်ႇတင်းဢပႅတ်ႈဢၼ်ၶဝ်ထိူၵ်ႈၶၢမ်ႇၼၼ်ႉ တီႈရၢၼ်ႇသူႇမၼ်းၸဝ်ႈတင်းလၢႆၼၼ်ႉလႄႈ တီႈၵူၼ်းဢၼ်ယူႇၵႃႈတီႈၵုၼ်ၼႂ်းၼမ်ႉၸိူဝ်းၼၼ်ႉၵေႃႈ မၼ်းၸဝ်ႈ တၵ်းတွပ်ႇတႅၼ်းပၼ်ဢၵျူဝ်းဢပႅတ်ႈဢေႃႈ။-

19ၼင်ႇၼၼ်လႄႈ ၵူၼ်းၼႃႈတၢင်းတူၵ်းတင်းလၢႆ တၵ်းရူဝ်ႇသေႇၵူဝ်ယမ်ၼႃႇမႃႉၸိုဝ်ႈသဵင် ထႃႇဝရႃႉၽြႃးလႄႈ ၵူၼ်းၼႃႈတၢင်းဢၼ်ၵၢင်ဝၼ်းဢွၵ်ႇ တင်းလၢႆ တၵ်းရူဝ်ႇသေႇၵူဝ်ယမ်မုၼ်ၽုင်းမၼ်းၸဝ်ႈဢေႃႈ။ မိူဝ်ႈဢၼ် ရၢၼ်ႇသူႇၶဝ်ႈမႃး မိူၼ်ၸိူဝ်ႉၼင်ႇဢၼ်ၼမ်ႉထူမ်ႈႁူမ်ႇၼၼ်ႉၸိုင် ဝီႉၺိၺ်ႇ ထႃႇဝရႃႉၽြႃး တၵ်းပူၵ်းလၢမ်ႇသေလႄႈ ႁႄႉၶႅၼ်ယူႇဢေႃႈ။-

20ထႃႇဝရႃႉၽြႃး မီးဢမိင်ႉဝႆႉၸမ်ႉ၊ ၸဝ်ႈဢၼ်ထုတ်ႇဢဝ်ၼၼ်ႉ တၵ်းမႃးၵႃႈတီႈလွႆ ၸီႉဢုၼ်ႇ ဢိၵ်ႇတင်းၵႃႈတီႈဢၼ် ၵူၼ်းမဵဝ်း ယႃႇၵုပ်ႈ ဢၼ်ဝႄႈပိူင်ႈသေ ၵႃႈတီႈလွင်ႈတၢင်းဢၼ်ဢမ်ႇတြႃးၼၼ်ႉမီးၼၼ်ႉဢေႃႈ။-

21ပတီႉၺိၺ်ႇတြႃး ဢၼ်ၵဝ်ႁဵတ်းလူၺ်ႈၵၼ်တင်းၶဝ်ၸမ်ႉ၊ ဝီႉၺိၺ်ႇၵဝ် ဢၼ်ၵိင်းဝၢပ်ႈယူႇၵႃႈၼိူဝ်မႂ်း ဢိၵ်ႇတင်းၵႂၢမ်းဢၼ်ၵဝ်သႂ်ႇဝႆႉ ၵႃႈၼႂ်းသူပ်းမႂ်းၼၼ်ႉ တၵ်းဢမ်ႇလႆႈဢွၵ်ႇလႆႈႁၢႆသေၵႃႈၼႂ်းသူပ်းမႂ်း။ ၵႃႈၼႂ်းသူပ်းမဵဝ်းၸိူဝ်ႉၶိူဝ်းမႂ်း၊ ၵႃႈၼႂ်းသူပ်းမဵဝ်းၸိူဝ်ႉၶိူဝ်း ဢၼ်ပဵၼ်မႃးတီႈမဵဝ်းၸိူဝ်ႉၶိူဝ်းမႂ်းၼၼ်ႉ ယူႇၸႃႉၸဵမ်မိူဝ်ႈလဵဝ်ၼႆႉလႄႈ ၵႂႃႇၵူႈၸူဝ်ႈၵူႈပၢၼ် သိုပ်ႇသိုပ်ႇတၢမ်းတၢမ်း၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။

← Chapter 58 Jump to: Chapter 60 →