Isaiah 58

Shan

← Chapter 57 Jump to: Chapter 59 →

1သဵင်ယင်းဢမ်ႇသုတ်ႈဢမ်ႇယွမ်းလႄႈ ပၢဝ်ႇသေႃႇတႃႉ။ ၵိဝ်သဵင်မႂ်း မိူၼ်ၸိူဝ်ႉၼင်ႇ သဵင်ၼႄးၶရႃႇၼၼ်ႉသေလႄႈ ၽုၺ်ႇဢွၵ်ႇ ၼႄပျႃးတူႉၸရိူၵ်ႈ ၵူၼ်းၵဝ်တင်းလၢႆ တီႈတူဝ်ၶဝ် ဢိၵ်ႇတင်းဢပႅတ်ႈ မဵဝ်း ယႃႇၵုပ်ႈ တင်းလၢႆတီႈတူဝ်ၶဝ်တႃႉ။-

2ၶဝ်ဢွၼ်ၵၼ် ႁႃဢဝ်ၵဝ်ယူႇ ၵူႈမိုဝ်ႉၵူႈဝၼ်းလႄႈ မူၼ်ႈပျေႃႇယူႇၵႃႈၼႂ်း သဵၼ်ႈတၢင်းၵဝ် တင်းလၢႆ မိူၼ်ၸိူဝ်ႉၼင်ႇမဵဝ်းဢၼ် ၵမ်ၵျၢင်ႉၸွမ်းၼင်ႇတြႃး၊ မဵဝ်းဢၼ်ဢမ်ႇၸုၼ်ႉပႅတ်ႈ ပိင်းၺၢပ်ႈၽြႃးပဵၼ်ၸဝ်ႈ တူဝ်ၸဝ်ႈၵဝ်ႇၼၼ်ႉ လူင်ပႄႇ။ ၶဝ်ယွၼ်းတွင်ႈယွၼ်းထၢမ် လွင်ႈတၢင်းဢၼ်ၸီႇယၢင်ႇတြႃး ဢၼ်သိုဝ်ႈဢၼ်တေႃႇတင်းလၢႆၼၼ်ႉ တီႈၵဝ်လႄႈ မူၼ်ႈပျေႃႇယူႇၵႃႈၼႂ်းလွင်ႈတၢင်းဢၼ် သုတ်ႉၸပ်းသုတ်ႉၸူးၵႃႈတီႈၽြႃးပဵၼ်ၸဝ်ႈ ၼၼ်ႉယူႇလူင်ပႄႇ။-

3ၵွပ်ႈပိူဝ်ႈ ၸိူဝ်ႉၼင်ႇႁိုဝ်လႄႈ ၶႃႈၸဝ်ႈႁဝ်းၶဝ် ႁဵတ်းတၢင်းဢၼ်ၵမ်တၢင်းၵိၼ်ယူႇလႄႈ ၸဝ်ႈႁဝ်းဢမ်ႇႁၼ်တီႈၶႃႈ၊ ၵွပ်ႈပိူဝ်ႈ ၸိူဝ်ႉၼင်ႇႁိုဝ်လႄႈ ၶႃႈၸဝ်ႈႁဝ်းၶဝ် ၵမ်ၵျၢင်ႉၵႅၼ်ႇၶႅင်ၼႃႇလူင်လၢင်ယူႇလႄႈ ၸဝ်ႈႁဝ်းဢမ်ႇႁူႉဢမ်ႇမၢတ်ႈတီႈၶႃႈ၊ ၼႂ်းလွင်ႈ ဢၼ်ဝႃႈ ၸိူဝ်ႉၼင်ႇၼႆၼၼ်ႉ၊ တူၺ်းလူး၊ ၼႂ်းဝၼ်းဢၼ်သူၵမ်တၢင်းၵိၼ်ၼၼ်ႉ သူႁဵတ်းမူၼ်ႈႁဵတ်းပျေႃႇလႄႈ ႁႂ်ႈၶႃႈသူတင်းလၢႆ ႁဵတ်းယၢပ်ႇႁဵတ်းၽိုတ်ႇ ၼႃႇလူင်လၢင်ဢေႃႈ။-

4တူၺ်းလူး၊ သူထဵင်ၵၼ်ၽိတ်းၵၼ်ယူႇ၊ ဢဝ်တင်းတႃမိုဝ်းဢႃႉထမ်ႇမႃႉ ပေႃႉယႅၼ်ႉၵၼ်ယူႇသေလႄႈ ၵမ်တၢင်းၵိၼ်ဢေႃႈ။ သူၵမ်တၢင်းၵိၼ် ၼႂ်းဝၼ်းမိူဝ်ႈၼႆႉ ႁႂ်ႈသဵင်သူငိၼ်းၵႂႃႇႁွတ်ႈထိုင် ၵႃႈတီႈဢၼ်သုင်ၼၼ်ႉဢမ်ႇၸႂ်ႈ။-

5တၢင်းဢၼ် ၵမ်တၢင်းၵိၼ် ဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၼၼ်ႉ ပဵၼ်ၸိူဝ်ႉၼင်ႇၼၼ်ႁိုဝ်။ ပဵၼ်ဝၼ်းဢၼ်ၵူၼ်းၵမ်ၵျၢင်ႉ ၵႅၼ်ႇၶႅင် ၼႃႇလူင်လၢင်ဝၼ်းၼိုင်ႈ ႁိုဝ်။ ပဵၼ်တၢင်းဢၼ်ဝၢင်းႁူဝ်ၵူမ်ႈႁူဝ် မိူၼ်ၸိူဝ်ႉၼင်ႇတူၼ်ႈၶႅမ် တၢင်းဢၼ်ဢဝ်ၼင်ပေႃ ဢိၵ်ႇတင်းတဝ်ႈသိူဝ်ႇဝႆႉ ပုၼ်ႈတီႈၼွၼ်းၼၼ်ႉႁိုဝ်။ မႂ်းထုၵ်ႇလီႁွင်ႉႁဵၵ်ႈဢၼ် ၸိူဝ်ႉၼင်ႇၼႆၼၼ်ႉလႄႈဝႃႈ တၢင်းဢၼ်ၵမ်တၢင်းၵိၼ်၊ မိုဝ်ႉဝၼ်းဢၼ် ထႃႇဝရႃႉၽြႃး ထုၵ်ႇၸႂ်ၵျိူၵ်ႈၸႂ်၊ ဝႃႈၼင်ႇၼႆႁိုဝ်။-

6တၢင်းဢၼ်ၵမ်တၢင်းၵိၼ် ဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၸမ်ႉ၊ ပဵၼ်တၢင်းဢၼ် ပုတ်ႈထွတ်ႇဢၼ်မတ်ႉဢၼ်ၽုၵ်ႇဢၼ်ဢမ်ႇတြႃး၊ တၢင်းဢၼ်ၶျႃးၶူဝ်းႁၢပ်ႇ ဢၼ်ၼၵ်းၼႃႇ၊ တၢင်းဢၼ်ပွႆႇၶဝ်ၸိူဝ်းဢၼ်လႆႈၶၢမ်ႇတၢင်းဢၼ် ၼိၵ်ႈၸၢၵ်ႈငႅၼ်းသႄးၼၼ်ႉလွတ်ႈ၊ တၢင်းဢၼ်ႁၵ်းႁဵၵ်းၵၢၼ်းႁၢပ်ႇၵႃႈမီးပႅတ်ႈၼၼ်ႉ ဢမ်ႇၸႂ်ႈႁိုဝ်။-

7ပဵၼ်တၢင်းဢၼ်လဵင်ႉပၼ် တၢင်းၵိၼ်တၢင်းၶူပ်းတီႈ ၵေႃႉဢၼ်တွင်ႉမႆႈသႆႈလိူတ်ႇ၊ တၢင်းဢၼ်ဢဝ်ၶဝ်ၸိူဝ်းဢၼ်ယၢၵ်ႈၽၢၼ် ဢမ်ႇမီးတီႈယူႇတီႈသဝ်းၼၼ်ႉမႃး ၵႃႈတီႈႁိူၼ်းတူဝ်ၸဝ်ႈၵဝ်ႇ၊ တၢင်းဢၼ်ဢဝ်ၶူဝ်းၼုင်ႈပၼ် ၼႂ်းမိူဝ်ႈဢၼ်ႁၼ်ၵေႃႉဢၼ်ဢမ်ႇမီး ၶူဝ်းၼုင်ႈ၊ တၢင်းဢၼ် ယင်းဢမ်ႇသိူင်ႇဢမ်ႇမႅပ်ႉတူဝ်ၸဝ်ႈၵဝ်ႇဝႆႉသေ တီႈၶဝ်ၸိူဝ်းဢၼ် ပဵၼ်ၼိူဝ်ႉပဵၼ်လိူတ်ႈ တူဝ်ၸဝ်ႈၵဝ်ႇၼၼ်ႉလႄႈ ယူႇၼၼ်ႉဢမ်ႇၸႂ်ႈႁိုဝ်။-

8ပေႃးႁဵတ်းၸိူဝ်ႉၼင်ႇၼၼ်ၸိုင်၊ ဢၼ်လႅင်းမႂ်းတၵ်းပေႃႇဢွၵ်ႇတႆႈႁိူဝ်ႈ မိူၼ်ၸိူဝ်ႉၼင်ႇဢၼ်လႅင်းၵၢင်ၼႂ်ၼၼ်ႉလႄႈ တၢင်းဢၼ်ယူႇလီမႂ်းၼၼ်ႉ တၵ်းပဵၼ်မႃးၶၼ်ၶၼ်ၽႂ်းၽႂ်းဢေႃႈ။ ပႃႇရမီႇတၢင်းဢၼ်သိုဝ်ႈတေႃႇမႂ်းၼၼ်ႉ တၵ်းဢွၼ်ႁူဝ်မႂ်းၵႂႃႇလႄႈမုၼ်ၽုင်း ထႃႇဝရႃႉၽြႃး တၵ်းပဵၼ်ဢၼ်ႁႄႉဢၼ်ၵင်ႈယူႇ ၵႃႈတီႈၽၢႆႇလင်မႂ်းဢေႃႈ။-

9ပေႃးႁဵတ်းၸိူဝ်ႉၼင်ႇၼၼ်ၸိုင် မႂ်းႁွင်ႉႁႃလႄႈ ထႃႇဝရႃႉၽြႃး တၵ်းဢိူဝ်ဢေႃႈ။ မႂ်းတၵ်းသႅၼ်ႇႁွင်ႉလႄႈ မၼ်းၸဝ်ႈ တၵ်းမီးဢမိင်ႉလႄႈဝႃႈ၊ ၵဝ်မီးယူႇဝႃႈၼင်ႇၼႆဢေႃႈ။ ပေႃးမႂ်းပႄႉၵၢၼ်းႁၢပ်ႇ၊ တၢင်းဢၼ် ဢဝ်ၼိဝ်ႉမိုဝ်းၸီႉၼႄ၊ တၢင်းဢၼ်လၢတ်ႈၵႂၢမ်း ဢၼ်သႄႉဢၼ်သွမ်း ပႅတ်ႈသေၵႃႈၼႂ်းမႂ်းလႄႈ၊-

10မီးတၢင်း ၸႂ်ဢၼ်ဢဵတ်းလူၵေႃႉဢၼ်တွင်ႉမႆႈသႆႈလိူတ်ႇ ၼၼ်ႉလႄႈ ပၼ်ၵတ်းယဵၼ်ၶျၢမ်းသႃႇ တီႈၵေႃႉဢၼ်လႆႈၶၢမ်ႇတၢင်းဢၼ် ယၢၵ်ႈဢၼ်ၽၢၼ်ၼၼ်ႉၸိုင်၊ ဢၼ်လႅင်းမႂ်းတၵ်းပေႃႇဢွၵ်ႇတႆႈႁိူဝ်ႈ ၵႃႈၼႂ်းလွင်ႈတၢင်းဢၼ်ဢမ်ႇပၢင်ႇဢမ်ႇၸိုၼ်ႈၼၼ်ႉလႄႈ ဢၼ်လပ်းသိင်ႇမႂ်းၼၼ်ႉ တၵ်းပဵၼ်ၸိူဝ်ႉၼင်ႇဢၼ်လႅင်းၵၢင်ဝၼ်းတဵင်ဢေႃႈ။-

11ထႃႇဝရႃႉၽြႃး တၵ်းၼႄပျႃး သဵၼ်ႈတၢင်းတီႈမႂ်းယူႇတႃႇသေႇဢေႃႈ။ မၼ်းၸဝ်ႈတၵ်းလဵင်ႉလူမႂ်း ဢိမ်ႇဢိမ်ႇတဵမ်တဵမ် ၵႃႈၼႂ်းတီႈဢၼ်ႁႅင်ႈဢၼ်ႁွင်ၼၼ်ႉလႄႈ ႁႂ်ႈလုပ်ႇမႂ်းတင်းလၢႆမၼ်ႈၶိူင်ႇယူႇဢေႃႈ။ မႂ်းတၵ်းပဵၼ်ၸိူဝ်ႉၼင်ႇသူၼ်ဢူးယဵၼ်ႇ ဢၼ်ႁူတ်းၼမ်ႉၼၼ်ႉ ဢိၵ်ႇတင်းၸိူဝ်ႉၼင်ႇၼမ်ႉဢွၵ်ႇႁူး ဢၼ်ၼမ်ႉဢမ်ႇထၢတ်ႇလႆႈၼၼ်ႉဢေႃႈ။-

12မဵဝ်းၸိူဝ်ႉၶိူဝ်းမႂ်းၼၼ်ႉ တၵ်းမႄးၵုမ်းမႄးႁဵတ်း ႁွႆးဢၼ်ၵိူၼ်ႇလူႉမိူဝ်ႈဢွၼ်ၼႆႉၸိူဝ်းၼၼ်ႉဢေႃႈ။ မႂ်းတၵ်းထၢပ်ႈထႅင်ႈသေလႄႈ တႄႇႁဵတ်းၵႃႈၼိူဝ်ငဝ်ႈႁၢၵ်ႈတိူၵ်ႈ ဢၼ်ယၢမ်ႈတႄႇႁဵတ်းမိူဝ်ႈၵွၼ်ႇမိူဝ်ႈမိုၼ်ႉၼၼ်ႉ ၸိူဝ်းၼၼ်ႉဢေႃႈ။ မႂ်းတၵ်းလႆႈၶၢမ်ႇတၢင်းဢၼ် ႁွင်ႉႁဵၵ်ႈၸိုဝ်ႈ ၵေႃႉဢၼ် မႄးၵုမ်းမႄးႁဵတ်းလမ်းဝဵင်းဢၼ်ၵိူၼ်ႇလူႉ၊ ၵေႃႉဢၼ်ပွင်မႄးသဵၼ်ႈတၢင်း တီႈယူႇတီႈသဝ်းၵူၼ်းတင်းလၢႆဢေႃႈ။

13ပေႃးမႂ်းတၵ်းဢမ်ႇႁႂ်ႈတိၼ်မႂ်းဝၢႆႇၶိုၼ်းၵႂႃႇသေၵႃႈတီႈ ဝၼ်းၵမ်သိၼ် ဢမ်ႇၸွမ်းဢလူဝ်ႇတူဝ်ၸဝ်ႈၵဝ်ႇ ၼႂ်းဝၼ်းဢၼ်မူတ်းၸၢင်ႇၵဝ်လႄႈ ႁွင်ႉဝၼ်းၵမ်သိၼ်လႄႈဝႃႈ၊ ဝၼ်းတီႈဢၼ်မူၼ်ႈပျေႃႇ၊ ဝၼ်းဢၼ်မူတ်းၸၢင်ႇပုၼ်ႈ ထႃႇဝရႃႉၽြႃး ဝၼ်းဢၼ်လီရူဝ်ႇသေႇၵူဝ်ယမ်၊ ဝႃႈၼင်ႇၼႆလႄႈ၊ ယင်းဢမ်ႇႁဵတ်းၸွမ်းသဵၼ်ႈတၢင်းတူဝ်ၸဝ်ႈၵဝ်ႇ၊ ဢမ်ႇၸွမ်းဢလူဝ်ႇတူဝ်ၸဝ်ႈၵဝ်ႇ၊ ဢမ်ႇလၢတ်ႈၵႂၢမ်းတူဝ်ၸဝ်ႈၵဝ်ႇ လႄႈ ရူဝ်ႇသေႇၵူဝ်ယမ်ဝၼ်းၼၼ်ႉယူႇၸိုင်၊-

14မႂ်းတၵ်းလႆႈမူၼ်ႈပျေႃႇယူႇၵႃႈၼႂ်း ထႃႇဝရႃႉၽြႃးဢေႃႈ။ ၵဝ်တၵ်း ႁႂ်ႈမႂ်းၶီႇၵႃႈၼိူဝ်တီႈဢၼ်သုင် ၵႃႈတီႈလိၼ်မိူင်းတင်းလၢႆလႄႈ ဢဝ်ဢမူၺ်ႇဢုၵ်ႉၸႃႇ ပေႃႈမႂ်း ယႃႇၵုပ်ႈ ၼၼ်ႉ လဵင်ႉလူမႂ်းဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢွၵ်ႇသူပ်းမၼ်းၸဝ်ႈဢေႃႈ။

← Chapter 57 Jump to: Chapter 59 →